តារាចម្រៀង ឆន សុវណ្ណារាជ ប្រកាសពហិកាមិនច្រៀងបទ«មួយខែដប់ថ្ងៃ» និងបទចម្រៀងចំនួន៦បទផ្សេងទៀតរបស់លោកដែលយកតាមលំនាំបទចម្រៀងថៃកាលពីមុន។ តារាចម្រៀងរូបនេះក៏បានសុំអភ័យទោសដល់ទស្សនិកជនទុកជាមុនប្រសិនជាមានការសំណូមពរមកកាន់លោកតែលោកមិនអាចបកស្រាយបានឡើយ។
មិនអាចបដិសេធបាននោះទេថាជាច្រើនឆ្នាំមុនបទចម្រៀងខ្មែរជាច្រើនគឺយកតាមលំនាំបទប្រទេសជិតខាងប៉ុន្តែនាពេលបច្ចុប្បន្ននេះគឺមានការនិពន្ធថ្មីស្នាដៃកូនខ្មែរជាច្រើនជាពិសេសបទចម្រៀងសិល្បករល្បីឈ្មោះដូចជា វណ្ណដា ជាដើមគឺមានតារាផ្ទះលេខ២យកលំនាំតាមវិញដែលអាចបញ្ជាក់ថាវិស័យសិល្បៈកម្ពុជាមានការរីកចម្រើនគួរឱ្យកត់សម្គាល់។ យ៉ាងណាមិញទន្ទឹមនឹងបទចម្រៀងខ្លះយកតាមលំនាំបទសៀមកាលពីមុននោះគេសង្កេតឃើញថាសិល្បករខ្មែរក៏បានប្រកាសពហិកាមិនបន្តការច្រៀងចម្រៀងនោះតទៅទៀត។
នៅថ្ងៃទី១៦ សីហា តារាចម្រៀង ឆន សុវណ្ណារាជ បានប្រកាសថា «រាល់ការសំណូមពរបទចម្រៀងរបស់ខ្ញុំបាទដែលខ្ញុំមិនអាចច្រៀងបានដូចជាបទ _មួយខែដប់ថ្ងៃ _ជួបដើម្បីបែក
_បងដឹង _រឿងនិទានមុនចូលគេង _មិនហ៊ានប្រាប់អូនផ្ទាល់មាត់ _វេលាទឹកភ្នែក _សប្បាយចិត្តទេអូន»។ មិនអាចច្រៀងតបតាមការសំណូមពរពីទស្សនិកជននេះលោកបានបញ្ជាក់ថាដោយសារតែបទចម្រៀងនេះយកលំនាំតាមបទសៀម ខណៈលោកពហិកាមិនច្រៀងជាដាច់ខាត។.png)
លោក ឆន សុវណ្ណារាជ ថា «ដោយសារបទទាំងនេះជាបទដែលយើងយកតាមលំនាំថៃកាលពីប៉ុន្មានឆ្នាំមុន គឺខ្ញុំបាទសុំធ្វើការពហិការមិនច្រៀងទៀតឡើយ សូមអរគុណទុកជាមុនសម្រាប់ការយោគយល់»។
គួរបញ្ជាក់ផងដែរ កន្លងមកនេះតារាចម្រៀង ហេង ពិទូ ក៏បានប្រកាសមិនច្រៀងបទចម្លងតទៅទៀតហើយលោកបានធ្វើការលុបចម្រៀងពីរបទចេញពីបណ្តាញសង្គមយូធូបរបស់លោកផងដែរ៕
