សម្ដេចតេជោ៖ រឿងទាហានថៃប្រើប្រាស់ជំពាមកៅស៊ូ បើមិនទប់ស្កាប់នឹងឈានដល់ការប្រើអាវុ.ធ

(ភ្នំពេញ)៖ ក្រោយបទឈប់បា.ញ់ ភាគីថៃនៅតែប្រព្រឹត្តសកម្មភាពបញ្ឆេះបញ្ឆួល បង្កបញ្ហាដាក់កម្ពុជាម្ដងហើយម្ដងទៀត ហើយពេលនេះទាហានថៃបានប្រើប្រាស់ជំពាមកៅស៊ូមកបា.ញ់ចូលទឹកដីកម្ពុជា ជាហេតុធ្វើឲ្យសម្ដេចតេជោ ហ៊ុន សែន ទ្រាំមិននិយាយមិនបាន ព្រោះខ្លាចវាប្រែក្លាយពីការបា.ញ់ជំពាមកៅស៊ូ ទៅជាការប្រើប្រាស់អាវុ.ធ ហើយបំផ្លា.ញកិច្ចព្រមព្រៀងបទឈប់បា.ញ់ដែលបានឯកភាពគ្នា។

នាថ្ងៃទី8 ខែសីហា ឆ្នាំ2025 សម្ដេចតេជោ ហ៊ុន សែន នៅលើទំព័រហ្វេសប៊ុកបានមានប្រសាសន៍ថា៖ តាមពិតខ្ញុំមិនចង់និយាយរឿងនេះទេ តែបើមិននិយាយខ្លាចមេដឹកនាំថៃមិនបានដឹង និងសហគមន៍អន្តរជាតិមិនបានយល់។ សង្គ្រាមព្រំដែនកម្ពុជា-ថៃ បានផ្ទេរពីសង្គ្រាមប្រើប្រាស់អាវុធមកជាសង្រ្គាម ប្រើប្រាស់ជំពាមកៅស៊ូបាញ់ដោយគ្រាប់ឃ្លី និងកូនដុំដែក។

សម្ដេចសង្កត់ធ្ងន់ថា៖ រឿងនេះបើមើលមួយភ្លែតដូចជារឿងកំប្លែង ឬរឿងតូចតាច តែបើពិនិត្យឲ្យសុីជម្រៅ វាជារឿងធំប្រសិនបើយើងមិនទប់ស្កាត់វានោះទេ។ វានឹងប្រែក្លាយពីការប្រើជំពាមកៅស៊ូ ទៅជាការប្រើអាវុធគ្រប់ប្រភេទ ដែលនឹងបំផ្លាញចោលនូវកិច្ចព្រមព្រៀងឈប់បាញ់ដែលថ្នាក់ដឹកនាំកម្ពុជា-ថៃ ដោយមានការជួយយ៉ាងសកម្មពីនាយករដ្ឋមន្ត្រីម៉ាឡេស្រុី និងការចូលរួមពីចិន អាមេរិក ស្វែងរកបានយ៉ាងលំបាក។

ជាមួយគ្នានេះសម្ដេចបានបញ្ជាក់ថា៖ សម្រាប់កម្ពុជាប្រសិនមានប្រើ ខ្ញុំសូមឲ្យរាជរដ្ឋាភិបាលចេញបទបញ្ជាទៅកងទ័ពឲ្យបញ្ឈប់ការប្រើប្រាស់ជាបន្ទាន់។ សង្ឃឹមថា មេដឹកនាំថៃនឹងចេញបញ្ជាទៅកងទ័ពឲ្យបញ្ឈប់ការប្រើអាវុធ ដូចដែលមានក្នុងរូបភាពដែលខ្ញុំសូមភ្ជាប់ទៅជាមួយនេះដែរ។

គួរជម្រាបថា កាលពីថ្ងៃសុក្រទី8 ខែសីហាម្សិលមិញ វេលាម៉ោងប្រហែង១២៖៣០នាទី មានទាហានថៃចំនួន10នាក់ ឯកសណ្ឋានប៉ារ៉ាបានយកបន្លាលួស បំរ៉ុងឡើងមកពង្រាយបន្តទៀត នៅមុខប្រាសាទតាមាន់ធំ តែត្រូវកម្លាំងយើងស្រែកដេញ ក៏រត់ចុះទៅវិញតែម្តង។ ពួកគេក៏បានបា.ញ់ជំពាមកៅស៊ូដាក់យើងប្រហែល100គ្រាប់នៅមុខប្រាសាទ។

ទង្វើនេះបង្ហាញពីចេតនាចង់បង្ករឿង បញ្ឆេះកំហឹងកងកម្លាំងកម្ពុជា បើទោះជាបទឈប់បា.ញ់បានចូលជាធរមាន និងមានការឯកភាពគ្នាជាច្រើនចំណុចដើម្បីស្វែងរកសន្តិភាពតាមរយៈកិច្ចប្រជុំGBC រវាងប្រទេសទាំងពីរហើយក៏ដោយ៕