ក្រោយត្រូវប្រធានគណបក្សប្រជាជនកម្ពុជា សម្តេចតេជោ ហ៊ុន សែន ប្រកាសបណ្តេញចេញពីគណបក្សប្រជាជនកម្ពុជា និងចេញពីក្របខ័ណ្ឌរដ្ឋទាំងអស់កាលពីថ្ងៃទី៣ ខែសីហា ឆ្នាំ២០២៥ រួចមកនោះ នាថ្ងៃទី៤ សីហា នេះ អ្នកស្រី ធីសុវណ្ណថា បានប្រកាសស្នើសុំរដ្ឋាភិបាលដើម្បីបង្កើតស្ថាប័នសារព័ត៌មានផ្ទាល់ខ្លួនថ្មីមួយ។
តាមរយៈវីដេអូដែលផ្សព្វផ្សាយនៅលើបណ្តាញទំនាក់ទំនងសង្គមហ្វេសប៊ុក អ្នកស្រី បានបញ្ជាក់ថា ស្ថាប័នសារព័ត៌មានដែលអ្នកស្រីគ្រោងនឹងបង្កើតនោះមានឈ្មោះថា ប្រតិកម្មប្រជាជន។
ជាស្ថាប័នថ្មីមួយដែលបង្កើតឡើងក្នុងគោលបំណងសំខាន់៣ គឺទី១ គាំទ្រដល់កងទ័ពកម្ពុជា ទី២ ជួយពលរដ្ឋរងគ្រោះ និងទី៣ ការពារសន្តិភាព។ អ្នកស្រីថា ក្រៅអំពីការកៀរគរការគាំទ្រចំពោះកងទ័ព និងផ្សព្វផ្សាយទុក្ខលំបាកនានារបស់ពលរដ្ឋជូនថ្នាក់ដឹកនាំ ស្ថាប័នព័ត៌មានថ្មីរបស់អ្នកស្រីនឹងផ្សព្វផ្សាយព័ត៌មាននានាចូលរួមការពារសន្តិភាពតាមរយៈការគាំទ្រគោលនយោបាយឈ្នះៗរបស់សម្តេចតេជោ ហ៊ុន សែន។
តាមរយៈអង្គភាពផ្ទាល់ខ្លួនថ្មីនេះ អ្នកស្រីបានប្តេជ្ញាបង្កើតមាតិកាដើម្បីឆ្លើយតបរាល់ព័ត៌មានទាំងឡាយណា ដែលមាននិន្នាការប្រឆាំង និងបំផ្លាញសន្តិភាព ដែលមានគោលការផ្ទុយនឹងរដ្ឋាភិបាល។ អ្នកស្រីបញ្ជាក់ថា គឺសុទ្ធបង្កើតឡើងពីសំណាក់ជនអគតិ ឬក្រុមជ្រុលនិយម។
ទោះខ្លួនត្រូវបានបណ្តេញចេញពីតួនាទីនានានៅក្នុងក្រមខ័ណ្ឌរដ្ឋ តែអ្នកស្រី ធី សុវណ្ណថា នៅតែប្រកាសបន្តគាំទ្រគណបក្សប្រជាជនកម្ពុជាជានិច្ច។ សូមរម្លឹកថា ការប្រកាសបញ្ចប់តួនាទីរបស់អតីតសកម្មជនគណបក្សប្រឆាំងរូបនេះ ពីតួនាទីបក្សប្រជាជន និងរដ្ឋ ព្រោះអ្នកស្រី បន្តផ្គើនបង្ហោះសារលើបណ្តាញសង្គម ប៉ះពាល់ដល់កងទ័ពកម្ពុជា ក្នុងពេលមានជម្លោះព្រំដែនជាមួយថៃ។
សាររបស់អ្នកស្រី នៅលើបណ្តាញទំនាក់ទំនងសង្គមហ្វេសប៊ុកនាថ្ងៃទី៣ ខែសីហា បានអះអាងថាទាហានជួរមុខ ភាគច្រើនមានជំងឺលើសឈាម ទឹកនោមផ្អែម ក្រពះ និងថ្លើម។
ភ្លាមៗក្រោយផ្សព្វផ្សាយសារនេះរួចមក ប្រធានគណបក្សប្រជាជនកម្ពុជា សម្តេចតេជោ ហ៊ុន សែន បានថ្លែងបញ្ជាក់ថា៖ «យើងគ្មានពេលអប់រំមន្ត្រីដែលគ្មានវិន័យ ក្នុងពេលដែលកិច្ចការជាតិកំពុងទាមទារយើងដោះស្រាយនោះឡើយ។ ម្តងហើយម្តងទៀត ធី សុវណ្ណថា បានបង្ហោះសារតាមហ្វេសប៊ុក ដែលមានចរិតមិនសមស្រប»៕
