រាជធានីភ្នំពេញ៖ ពិតជាមិនធម្មតា! សាកលវិទ្យាល័យជាតិគ្រប់គ្រង ទទួលបានចំណាត់ថា្នក់លេខ69 ក្នុងចំណោមសាកលវិទ្យាល័យនវានុវត្តន៍កម្រិតពិភពលោក ចំនួន400 តាមរយៈការវាយតម្លៃប្រចាំឆ្នាំនៃចំណាត់ថ្នាក់សាកលវិទ្យាល័យកម្រិតពិភពលោក ដោយគណៈកម្មាធិការសម្ព័ន្ធសាកលវិទ្យាល័យពិភពលោកWURI។
នាថ្ងៃទី១០ ខែកក្កដា ឆ្នាំ២០២៥ គណៈកម្មាធិការសម្ព័ន្ធសាកលវិទ្យាល័យពិភពលោក ដែលជាអ្នករៀបចំការវាយតម្លៃប្រចាំឆ្នាំនៃចំណាត់ថ្នាក់សាកលវិទ្យាល័យកម្រិតពិភពលោក The World University Rankings for Innovation (WURI) បានប្រកាសផ្តល់ចំណាត់ថា្នក់លេខ69 ជូនសាកលវិទ្យាល័យជាតិគ្រប់គ្រង ក្នុងចំណោមសាកលវិទ្យាល័យនវានុវត្តន៍កម្រិតពិភពលោក ចំនួន 400 (WURI 2025: Global Top 400 Innovative Universities) និង ចំណាត់ថ្នាក់កម្មវិធីជំនាញ (Top 100) ដែលមាន នវានុវត្តន៍ឆ្នើមលើកម្មវិធីចំនួន ៣ ប្រភេទ រួមមាន៖
១. ចំណាត់ថ្នាក់លេខ ៧ សម្រាប់ ការពង្រឹងផ្នែកគ្រប់គ្រង (Empowerment-Based Management)
២. ចំណាត់ថ្នាក់លេខ ៣៤ សម្រាប់ហេដ្ឋារចនាសម្ព័ន្ធ និង បច្ចេកវិទ្យា (Infrastructure/Technologies)
៣. ចំណាត់ថ្នាក់លេខ ៣៤ សម្រាប់សាកលវិទ្យាល័យដែលមានកេរ្តិ៍ឈ្មោះ (University Brand and Reputation)
គួរឲ្យដឹងថា សាកលវិទ្យាល័យជាតិគ្រប់គ្រង ត្រូវបានបង្កើតឡើងតាំងពីឆ្នាំ១៩៨៣ ដែលមានឈ្មោះថា វិទ្យាស្ថានវិទ្យាសាស្ត្រសេដ្ឋកិច្ច ក៏ប៉ុន្តែនៅអំឡុងទស្សវត្ស៩០ ក៏ត្រូវបានប្ដូរឈ្មោះទៅជាមហាវិទ្យាល័ពាណិជ្ជកម្ម។ នៅឆ្នាំ២០០៤ វាក៏ត្រូវបានដាក់ឈ្មោះថា សាកលវិទ្យាល័យជាតិគ្រប់គ្រង ដូចសព្វថ្ងៃនេះ។ NUM គឺជាសាកលវិទ្យាល័យរដ្ឋដែលផ្ដោតការបណ្ដុះបណ្ដាលទៅលើជំនាញពាណិជ្ជកម្ម និងគ្រប់គ្រង។
ការទទួលបានចំណាត់ថ្នាក់ល្អ នៅក្នុងចំណោមសាកលវិទ្យាល័យនវានុវត្តន៍កម្រិតពិភពលោកជាច្រើនផ្សេងទៀតនេះ បានឆ្លុះបញ្ចាំងពីការអភិវឌ្ឍន៍ដ៏ល្អប្រសើរនៅក្នុងវិស័យអប់រំរបស់កម្ពុជាប្រកបដោយប្រសិទ្ធភាព និងភាពលេចធ្លោដែលគួរឲ្យកត់សម្គាល់ ធៀបទៅនឹងសកលវិទ្យាល័យរបស់ប្រទេសផ្សេងៗទៀតនៅក្នុងតំបន់៕
