ចាន់ ឡៃវលក្ខណ៍ អតីតបេក្ខនារីក្នុងកម្មវិធី «Cambodian Idol Season 3» កំពុងធ្វើឱ្យទស្សនិកជនមានការចាប់អារម្មណ៍យ៉ាងខ្លាំងនៅលើបណ្តាញសង្គមទិកតុកក្រោយពីបង្ហើរសំឡេងដ៏ក្រអួលក្រអៅគ្មានភ្លេងអមជាមួយទៅលើបទ «អាទិទេពស្នេហ៍»។.png)
ស្ថិតក្នុងគ្រួសារដែលមានឈាមជ័រជាអ្នកសិល្បៈ ចាន់ ឡៃវលក្ខណ៍ កំពុងតែធ្វើឱ្យ មហាជនចាប់អារម្មណ៍ច្រើនទៅលើទឹកដមសំឡេងរបស់នាង។ កាលពីពេលថ្មីៗនេះ ចាន់ ឡៃវលក្ខណ៍ បានបង្ហើរសំឡេងគោកជាមួយនឹងបទ «អាទិទេពស្នេហ៍» នៅក្នុងខ្សែភាព យន្តខ្មែរ«កូនពស់កេងកង» ហើយត្រូវបានមហាជន កោតសរសើរមិនដាច់ពីមាត់។ 
វីដេអូជិត១នាទីរបស់ វលក្ខណ៍ បានទាក់ទាញការទស្សនារាប់ម៉ឺនដង ជាមួយនឹងការចុច Like ជាង១ម៉ឺននាក់ នៅលើបណ្តាញសង្គមទិកតុករបស់នាង ខណៈ វលក្ខណ៍ គ្រាន់តែច្រៀងតបតាមការសំណូមពររបស់អ្នកគាំទ្រ ដោយមិនមានភ្លេងអ្វីឡើយ។
សំឡេងរបស់ វលក្ខណ៍ ទៅលើបទ «អាទិទេពស្នេហ៍» ទទួលបានមតិសរសើរជា ច្រើនដោយលើកឡើងស្រដែងៗគ្នាថា «ពីរោះខ្លាំងណាស់»។ 
គួរឱ្យដឹងថា បច្ចុប្បន្ន ចាន់ ឡៃវលក្ខណ៍ គឺជាតារាចម្រៀងមួយរូបហើយរូបនាងក៏ធ្លាប់សម្តែងក្នុងខ្សែភាពយន្តខ្មែរផងដែរ។ ចាន់ ឡៃវលក្ខណ៍ ក៏ជាអតីតបេក្ខនារីក្នុងការប្រកួត «Cambodian Idol Season 3» បានចូលប្រកួតក្នុងកម្មវិធីនេះតាំងពីអាយុ១៧ឆ្នាំដែលនាងមានស្រុកកំណើតនៅខេត្ត ពោធិ៍សាត់។ 
កន្លងមកជាច្រើនឆ្នាំសម្រស់ វលក្ខណ៍ កាន់តែស្រស់ស្អាតហើយសមត្ថភាពរបស់នាងកាន់តែខ្ពស់។ កាលពីឆ្នាំ២០២៤ វលក្ខណ៍ ក៏បានសាងប្រជាប្រិយភាពតាមរយៈបទ Cover «ជាតិនេះជាតិណាក៏ស្រឡាញ់»ដែលជាចម្រៀងក្នុងខ្សែភាពយន្តរបស់ស្ថានីយទូរទស្សន៍ PNN ផងដែរ៕
