រដ្ឋមន្ត្រីក្រសួងការពារជាតិថៃអរគុណរាជរដ្ឋាភិបាលកម្ពុជាជួយកាត់បន្ថយភាពតានតឹងនៅព្រំដែន

ប្រទេសថៃ ៖ សារព័ត៌មានថៃ News In Thailand បានរាយការណ៍កាលពីថ្ងៃទី៨ ខែមិថុនា ឆ្នាំ២០២៥ ថា លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិប្រទេសថៃបានអរគុណរាជរដ្ឋាភិបាលកម្ពុជា ដែលបានសហការរួមគ្នាកាត់បន្ថយជម្លោះនៅតំបន់ព្រំដែន និងប្រកាន់ខ្ជាប់នូវគោលការណ៍សន្តិភាពដើម្បីដោះស្រាយបញ្ហា ។

កាលពីថ្ងៃទី៨ ខែមិថុនា កន្លងមក លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃនិយាយថា លោកទទួលបានសេចក្តីរាយការណ៍ពីកិច្ចចរចារវាងភាគីទាំងពីរ ហើយលទ្ធផលបង្ហាញដូចគ្នាថា ពេលនេះ កងកម្លាំងកម្ពុជា-ថៃ បានសម្រេចកែសម្រួលកម្លាំងកងទ័ពទាំងសងខាងដើម្បីកាត់បន្ថយជម្លោះ និងការប្រឈមមុខ ។ ហេតុនេះ វាធ្វើឱ្យស្ថានការណ៍ក្នុងតំបន់ព្រំដែនមានភាពល្អប្រសើរជាងមុន ។

ក្នុងនាមតំណាងឱ្យក្រសួងការពារជាតិ និងកងទ័ពថៃ លោក Phumtham រដ្ឋមន្ត្រីក្រសួងការពារជាតិ សូមអរគុណរាជរដ្ឋាភិបាលកម្ពុជា ជាពិសេសបំផុត អរគុណដល់កងទ័ពជួរមុខរបស់កម្ពុជា ដែលបានចូលរួមចរចាជាមួយថៃកាត់បន្ថយភាពតានតឹងដោយប្រកាន់ខ្ជាប់តាមគោលការណ៍សន្តិភាព ដើម្បីផលប្រយោជន៍ពលរដ្ឋទាំងពីរប្រទេស ។

លោក Phumtham បន្តថា ការចរចាគ្នានេះ គឺកងទ័ពកម្ពុជា-ថៃបានចុះត្រួតពិនិត្យតំបន់ និងកន្លែងជីកដីនៅតំបន់ព្រំដែនរួមគ្នា និងកប់ដីនៅតំបន់ព្រំដែនតាមកិច្ចព្រមព្រៀងរបស់ប្រទេសទាំងពីរ ។ កម្ពុជា-ថៃ ក៏បានកែសម្រួលកម្លាំងកងទ័ពទាំងសងខាងនៅឈរជើងក្នុងតំបន់ដែលព្រមព្រៀងគ្នាពេលស្ថានការណ៍ប្រក្រតីកាលពីឆ្នាំ២០២៤ រួចរាល់ហើយ ។

ប្រទេសទាំងពីររំពឹងថា នឹងដោះស្រាយបញ្ហាតាមយន្តការកិច្ចប្រជុំគណៈកម្មការព្រំដែនរួម (JBC) នៅថ្ងៃទី១៤ ខែមិថុនា ឆ្នាំ២០២៥ ដើម្បីឱ្យស្ថានការណ៍ល្អប្រសើរឡើងវិញតាមរយៈការដោះស្រាយបញ្ហាយ៉ាងសន្តិវិធី ។

ក្រសួងការពារជាតិថៃសូមអរគុណកងទ័ពថៃ អរគុណមេទ័ពភូមិភាគទី២ និងកងទ័ព ដែលប្រកាន់យកការដោះស្រាយបញ្ហាដោយសន្តិវិធី ។ ចាប់ពីពេលនេះ សូមកិច្ចសហការឱ្យពលរដ្ឋទាំងពីរប្រទេសប្រុងប្រយ័ត្នក្នុងការចែកចាយព័ត៌មានផ្សេងៗ ដើម្បីកុំឱ្យស្ថានការណ៍ឈានទៅកើតជម្លោះជាថ្មី ។ នេះបើតាមការលើកឡើងរបស់លោក Phumtham ៕