កងទ័ពជើងទឹកមូលដា្ឋនសមុទ្ររាម នៃកងយោធពលខេមរភូមិន្ទ នឹងធ្វើសមយុទ្ធរយៈពេល៣ថ្ងៃ ចាប់ពីថ្ងៃទី១១ ដល់ទី១៣ ខែមិថុនា ឆ្នាំ២០២៥។
សមយុទ្ធនេះ នឹងរៀបចំកម្មវិធីហ្វឹកហ្វឺនបាញ់គ្រាប់ពិត នៅលើដែនសមុទ្រ ស្ថិតនៅចន្លោះកោះពូលូវ៉ៃ និងកោះតាង ភូមិសាស្ត្រខេត្តព្រះសីហនុ។
ជុំវិញលំហាត់សមយុទ្ធនេះ កងទ័ពជើងទឹកមូលដា្ឋនសមុទ្ររាម បានស្នើឱ្យបងប្អូនប្រជាពលរដ្ឋ ប្រជានេសាទ មេត្តាជ្រាប និងកុំមានការភាន់ច្រឡំ ពេលមានលឺសំឡេងកាំភ្លើង រួមជាមួយការចល័តកងទ័ព នាវាចម្បាំង នៅលើផ្ទៃសមុទ្រ។
ជាពិសេស ប្រជានេសាទ ហាមដាច់ខាតកុំធ្វើដំណើរឆ្លងកាត់ ឬនេសាទ ជុំវិញតំបន់ហ្វឹកហ្វឺនបាញ់គ្រាប់ពិតនេះ ដើម្បីជៀសវាងការបង្កគ្រោះថ្នាក់ ឬហានិភ័យណាមួយ ជាយថាហេតុ។
គួរបញ្ជាក់ថា ការពីពាក់កណ្តាលខែឧសភាកន្លងទៅ កងទ័ពជើងទឹកកម្ពុជា បានធ្វើសមយុទ្ធម្តងរួចមកហើយ ដោយមានការចូលរួមពីកងទ័ពជើងទឹករំដោះប្រជាជនចិន៕
