យុវជនអៀរឡង់បំបែកកំណត់ត្រាពិភពលោក ដោយការដុតភ្លើងពេញខ្លួនប្រាណ ហើយលោតបង្វិលក្បាលចុះក្រោម

ប្រទេសអង់គ្លេស ៖ កាលពីថ្ងៃទី២៨ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា យុវជនម្នាក់នៅប្រទេសអៀរឡង់ខាងជើង ឈ្មោះ Ryan Luney បានធ្វើឱ្យពិភពលោកភ្ញាក់ផ្អើលយ៉ាងខ្លាំង ក្រោយពីបំបែកកំណត់ត្រាពិភពលោក (Guinness World Records) ដោយការលោតបង្វិលក្បាលចុះក្រោមពេលភ្លើងកំពុងឆាបឆេះពេញខ្លួនប្រាណ ចំនួន៧លើក និងចំណាយពេលត្រឹមតែ៣០វិនាទីប៉ុណ្ណោះ ។

លោក Ryan Luney អាយុ២៨ឆ្នាំ បានបំបែកកំណត់ត្រាពិភពលោកជាច្រើនលើក ដោយការស្លៀកឈុតការពារខ្លួនជាច្រើនជាន់ មុនពេលដុតភ្លើងលើរាងកាយ បន្ទាប់មក លោកក៏លោតបង្វិលក្បាលចុះក្រោមយ៉ាងឆាប់រហ័ស ។ លោកនិយាយមកកាន់ Guinness World Records ថា ៖ «ខ្ញុំបានយកសម្លៀកបំពាក់ជាច្រើនជាន់ទៅត្រាំក្នុងជែល និងយកវាទៅក្លាសេ ប្រមាណជាង២៤ម៉ោង ទើបខ្ញុំយកឈុតនេះមកស្លៀកដើម្បីការពារកំដៅ» ។

ពេលត្រៀមខ្លួនរួចរាល់ហើយ ក្រុមការងារជំនាញក៏យកភ្លើងមកដុតលើខ្លួនលោក Ryan Luney ហើយលោកក៏ចាប់ផ្តើមលោតបង្វិលក្បាលចុះក្រោមឱ្យបានលឿនបំផុត និងតស៊ូជាមួយអណ្តាតភ្លើងដែលកំពុងឆេះរាលដាលពេញខ្លួន ។ លោកផ្តោតតែម្យ៉ាងគត់ គឺកម្រើកខ្លួនឱ្យបាន ហើយបន្តកម្រើកខ្លួនជាបន្តបន្ទាប់យ៉ាងឆាប់រហ័ស ពីព្រោះបើនៅស្ងៀមអាចពិបាកដកដង្ហើម និងពិបាកធន់ជាមួយកំដៅភ្លើង ។

នៅទីបំផុត លោក Ryan Luney ក៏អាចបំបែកកំណត់ត្រាពិភពលោកដោយជោគជ័យ ដោយការលោតបង្វិលក្បាលចុះក្រោម ចំនួន៧លើក ពេលភ្លើងកំពុងឆេះពេញរាងកាយ និងចំណាយពេលត្រឹមតែ៣០វិនាទីប៉ុណ្ណោះ ។ ក្រោយមក ក្រុមការងារជំនាញក៏យកបំពង់ពន្លត់អគ្គិភ័យមកបាញ់ពន្លត់ភ្លើង និងយកកន្សែងមករុំលើខ្លួនលោកភ្លាមៗ សំណាងល្អ លោក Ryan Luney ពុំរងរបួសធ្ងន់ធ្ងរទេ បើទោះជារាងកាយទាំងមូលត្រូវភ្លើងឆេះក្តី ។

នេះជាការបង្ហាញសមត្ថភាពយ៉ាងក្លាហាន ប៉ុន្តែវាប្រឈមនឹងគ្រោះថ្នាក់ខ្លាំងបំផុត ។ ភាពក្លាហាននេះពុំគួរយកគំរូតាមដាច់ខាត ពីព្រោះបើខ្វះចំណេះដឹងពីវិធីការពារខ្លួនឱ្យមានសុវត្ថិភាព ឬធ្វេសប្រហែសតែបន្តិច គឺប្រឈមនឹងការស្លាប់ ៕