ជប៉ុន និងកូរ៉េ បង្ហាញភាពតានតឹងដាក់គ្នា ក្រោយចែកកោះមួយមិនដាច់

រដ្ឋាភិបាលកូរ៉េខាងត្បូង បានសម្តែងការខឹងជាខ្លាំង ក្រោពីជប៉ុនបានបោះពុម្ពផ្សាយគោលនយោបាយការទូតប្រចាំឆ្នាំរបស់ខ្លួន ដែលអះអាងថាប្រជុំកោះ Dokdo គឺជាផ្នែកមួយនៃប្រទេសជប៉ុន។

ទីប្រជុំកោះ Liancourt Rocks ត្រូវកូរ៉េខាងត្បូងហៅថា Dokdo រីឯជប៉ុនហៅថា Takeshima បានក្លាយជាតំបន់តានតឹងរវាងប្រទេសទាំងពីរ ដោយអស់រយៈពេលរាប់ឆ្នាំហើយ នៅតែមិនអាចបែងចែកដាច់។

បើតាមប្រវត្តិសាស្ត្រ កូរ៉េខាងត្បូង បានគ្រប់គ្រងទីប្រជុំនេះ ចាប់ពីឆ្នាំ១៩៤៥មក គឺនៅពេលអាណានិគមជប៉ុន នៅឧបទ្វីបកូរ៉េដួលរលំ តែត្រូវបានជប៉ុនទាមទារថាវាជារបស់ខ្លួន និងបានចោទកូរ៉េខាងត្បូងដណ្តើមយកទៅដោយខុសច្បាប់។

ជប៉ុន ធ្លាប់បានប្តឹងឡើងទៅតុលាការអន្តរជាតិចំនួន៤ដង ក៏ប៉ុន្តែកូរ៉េខាងត្បូងមិនព្រមចូលខ្លួន ហេតុដូច្នេះតុលាការអន្តរជាតិ មិនមានសិទ្ធសម្រេចសេចក្តីនោះទេ។

បើក្រឡេកមកមើលពីទីតាំងភូមិសាស្ត្រ កោះនេះ ស្ថិតនៅចម្ងាយប្រមាណជា២១១គីឡូម៉ែត្រពីដែនទឹកជប៉ុន ធៀបនឹងកូរ៉េខាងត្បូងមានចម្ងាយដល់ទៅ២១៦គីឡូម៉ែត្រ។

គួរបញ្ជាក់ថា បច្ចុប្បន្នជប៉ុន មានជម្លោះដែនកោះជាមួយរុស្ស៊ី ចំនួន៤កោះ កូរ៉េ២កោះ និងចិនមួយកោះ ដែលមកទល់បច្ចុប្បន្នមិនទាន់ចែកដាច់៕