បន្ទាប់ពី វណ្ណដា បានសម្តែងបទ J+O II នៅក្នុងកម្មវិធីរបស់ខ្លួនកាលពីខែមករា កន្លងមកនេះ តារារ៉េប ជី ដេវិត មិនឱ្យចាញ់ចិត្តបានសម្តែងបទ Diss Track ទាំង៣បទទៅកាន់ វណ្ណដា ក្នុងថ្ងៃប្រគំតន្រ្តីផ្ទាល់ខ្លួនវិញម្តង។
មិនមែន១បទហើយក៏មិនមែនពីរបទប៉ុន្តែនៅក្នុងថ្ងៃប្រគំតន្រ្តីផ្ទាល់ខ្លួនកាលពីរាត្រីថ្ងៃទី៣០ខែមីនា ឆ្នាំ២០២៥ តារាចម្រៀង ជី ដេវិត បានធ្វើឱ្យអ្នកគាំទ្ររបស់ខ្លួនភ្ញាក់ផ្អើលជាមួយនឹង Diss Track មានដូចជាបទ «ចុមអាអូនអត់ដេក» «ថីអ្ហែងថី» និងបទ «អ្ហែង ចង់ទៅណា?»។ ទាំង៣បទនេះត្រូវបានទស្សនិកជនដឹងថាគឺជាបទ Diss Track ទៅកាន់ វណ្ណដា ដែលបទ «ចុមអាអូនអត់ដេក» ទម្លាក់បទតាំងពីចុងខែតុលា ឆ្នាំ២០២២ នៅពេល វណ្ណដា ទម្លាក់បទ « J+O II» បន្ទាប់ពីដឹងថាលេចធ្លាយបទចម្រៀងក្នុងអាល់ប៊ុមរបស់ខ្លួន និងបាន Dissទៅកាន់ ជី ដេវិត ។ ពីរបទទៀតគឺជាបទនៅដើមឆ្នាំ២០២៥ បន្ទាប់ពី វណ្ណដា បានសម្តែងបទ J+O II នៅក្នុងកម្មវិធីផ្ទាល់ខ្លួននិងវីដេអូខ្លីនិយាយពីរឿងចាប់ដៃ ប៉ុន្តែពីរបទនេះភាគីម្ខាងទៀតមិនបានតបតវិញឡើយ។
ការសម្តែងបទ Diss Track របស់ ជី ដេវិត នេះគឺត្រូវបានហ្វេនៗរបស់លោកថាសប្បាយៗកុំ Toxic ព្រោះម្តងម្នាក់ទេ។ តាមរយៈវីដេអូដែលបានចែករំលែកនៅលើប្រព័ន្ធអនឡាញ ជី ដេវិត ក៏បាននិយាយប្រាប់ហ្វេនៗរបស់ខ្លួនដែរថា ជី ដេវិត មិនដែលខ្លាចអ្នកណានោះទេតាំងពីដើមមក។
គួរឱ្យដឹងថាមិនត្រឹមតែមានបញ្ហាចំពោះអាយដលនិងអាយដលទេ ប៉ុន្តែអ្នកគាំទ្រមួយចំនួនទាំងតារាចម្រៀង ជី ដេវិត និង វណ្ណដា តែងតែមានជម្លោះនៅលើបណ្តាញសង្គមអស់រយៈពេលជាយូរឆ្នាំមកហើយ។ អ្នកគាំទ្រមួយចំនួនដែលមានការឈ្លោះប្រកែកគ្នាគឺបានស្ងប់ស្ងាត់មួយរយៈបន្ទាប់ពីតារាចម្រៀងទាំងពីរបានចាប់ដៃគ្នាក្រោមការជួយជ្រោមជ្រែងពីពិធីការិនី ខៀវ សានសាណា តែក៏មិនយូរប៉ុន្មានហ្វេនៗមួយចំនួនរបស់អ្នកទាំងពីរឈ្លោះគ្នាជារឿយៗមិនដែលដាច់សោះឡើយ៕
