ទំពាំងល្អរបស់ជាតិ! យុវតីកម្ពុជាម្នាក់នេះ ឡើងនិយាយលើវេទិការរបស់អង្គការសហប្រជាជាតិនៅទីក្រុងញូវយ៉ក

ជាក្មេងស្រីដែលស្រលាញ់ផ្នែកបច្ចេកវិទ្យា អាយុ១៥ឆ្នាំចូលរួមបង្កើតកម្មវិធីក្នុងទូរស័ព្ទ និងត្រឹមវ័យ១៩ឆ្នាំអាចបង្រៀនពីការសរសេកូដបាន។ ពេលនេះយុវតីកៅ ម៉េងហ័ង បានចូលរួមធ្វើជាវាលគ្មិនក្នុងកិច្ចពិភាក្សា “អំណាចសម្រាប់នារី” ( Power For Girls ) នៃអង្គការសហប្រជាជាតិ (UNISEF) ប្រចាំទីក្រុងញូយ៉ក សហរដ្ឋអាមេរិក តំណាងអោយយុវតីនៅកម្ពុជាក្នុងគោលបំណងលើកកម្ពស់ស្រី្ត និង ក្មេងស្រីអោយបានយល់ដឹង និងមានសិទ្ធសិក្សារៀនសូត្រពីផ្នែកបច្ចេកវិទ្យា។

ជាមោទនភាពសម្រាប់ប្រទេសកម្ពុជា ដែលមានយុវតីដែលមានសមត្ថភាពខ្លាំងពូកែ បានថ្លែងសារដ៏មានឥទ្ធិពលនៅក្នុងអង្គវេទិការដែលរៀបចំឡើងដោយអង្គការសហប្រជាជាតិ នៅចំពោះមុខសមាជិកចូលរួមសុទ្ធតែជាថ្នាក់ដឹកនាំសង្គមស៊ីវិល និងបុគ្គលល្បីៗមកពីបណ្ដាប្រទេសជាច្រើននៅជុំវិញពិភពលោក។

ថ្លែងក្នុងវេទិការនៃអង្គការសហប្រជាជាតិយុវតីម៉េងហ័ង បានលើកឡើងថា “ខ្ញុំគ្រាន់តែជាក្មេងស្រីម្នាក់ដែលមានក្ដីសុបិន្តធំ ចង់ដឹងនិងស្រលាញ់ផ្នែកបច្ចេកវិទ្យា ប៉ុន្តែជាអកុសលខ្ញុំរស់នៅក្នុងបរិយាកាសមួយដែលមនុស្សជាច្រើនយល់ថា ក្មេងស្រីមិនគួររៀនខ្ពស់ពេក និងមិនជឿថាក្មេងស្រីអាចទៅណាឆ្ងាយបាននោះទេ”។ ក្នុងន័យនេះម៉េងហ័ង ចង់សំដៅដល់ការមិនព្រមបោះបង់ក្ដីស្រមៃក្នុងការស្រលាញ់បច្ចេកវិទ្យារបស់ខ្លួន ចង់អោយមនុស្សផ្លាស់ប្ដូរការគិត និងចង់អោយក្មេងស្រីដទៃទៀតមានឳកាសក្នុងការសិក្សាពីអ្វីដែលពួកគេស្រលាញ់។

យុវតីដ៏មានសមត្ថភាពខាងលើបានបន្តថា នាងបានបង្កើតនូវកម្មវិធីទូរស័ព្ទដៃមួយឡើងមក ដើម្បីជួយដោះស្រាយបញ្ហាសហគមន៍តាំងពីអាយុ១៥ឆ្នាំមកម្ល៉េះ។ ចាប់តាំងពីពេលនោះមកនាងចាប់អារម្មណ៍លើផ្នែកបច្ចេកវិទ្យាជាខ្លាំង។ ក្នុងនាមជាក្រុមផ្ដល់ប្រឹក្សានារីទូទាំងពីភពលោកតំណាងនារីនៅកម្ពុជា នាងមានគំនិតក្នុងការជួយដល់ក្មេងស្រីនៅក្នុងសហគមន៍ ជាពិសេសគឺក្មេងស្រីៗដែលរស់នៅជនបទ អោយពួកគេមានឳកាសក្នុងការបានយល់ដឹងអំពីបច្ចេកវិទ្យាកាន់តែច្រើន។

នៅក្នុងឳកាសដដែលនេះ ម៉េងហ័ង បានអំពាវនាវដល់ភាគីពាក់ព័ន្ធ ទាំងរដ្ឋាភិបាល អង្គការសង្គមស៊ីវិល រួមទាំងវិស័យឯកជនអោយធ្វើយ៉ាងណាជួយជម្រុញអោយការផ្ដល់អំណាច និងការគាំទ្រដល់ស្រ្តីអោយទទួលបានជោគជ័យលើវិស័យបច្ចេកវិទ្យានេះនៅពេលអនាគត៕