ទីបំផុត តារាចម្រៀងតូចច្រឡឹង សុវត្ថិឌី ធារីកា និងស្វាមី សម្រេចបំណងក្នុងការទទួលបានសមាជិកថ្មីហើយដោយអ្នកទាំងពីរជិតក្លាយជាឪពុកម្តាយគេហើយបន្ទាប់ពីរៀបការបានជាង១ឆ្នាំ។ ដំណឹងដ៏រំភើបមួយនេះ ធារីកា គឺបានចែករំលែកទៅកាន់អ្នកគាំទ្រឱ្យទទួលបានអារម្មណ៍រំភើបជាមួយគ្នា។
នៅថ្ងៃទី៨ មីនា នេះតារាចម្រៀង សុវត្ថិឌី ធារីកា បានបង្ហោះរូបភាពជាច្រើនសន្លឹកអមមកជាមួយខ្លឹមសារថា «ថ្ងៃដែលទន្ទឹងរង់ចាំឆ្នាំនេះពួកយើងទទួលបានកាដូដែលក្រុមគ្រួសារទាំងមូលរង់ចាំ ហើយក្នុងឱកាសនេះនាងខ្ញុំនិងស្វាមី ចង់ចែករំលែកដំណឹងល្អនេះ ដល់ពុកម៉ែបងប្អូនឱ្យបានទទួលនូវអារម្មណ៍រំភើបនេះជាមួយគ្នាដែរ»។ ដំណឹងដែលតារាចម្រៀង សុវត្ថិឌី ធារីកា ពរពោះកូនដំបូងនេះគឺមានការចូលរួមអបអរសាទរជាច្រើនពីអ្នកក្នុងចង្កោមសិល្បៈនិងទស្សនិកជនជាអ្នកគាំទ្រ។
គួរបញ្ជាក់ថា តារាចម្រៀង សុវត្ថិឌី ធារីកា និងស្វាមីលោក សូផានិត បានដឹកដៃគ្នាចូលរោងការនាខែមករា ឆ្នាំ២០២៤បន្ទាប់ពីមានទំនាក់ទំនង៣ឆ្នាំ។ ប្រវត្តិស្នេហារបស់អ្នកទាំងពីរគឺមានការចាប់អារម្មណ៍ខ្លាំងពីទស្សនិកជនគឺជា«ស្នេហាដែលឃើញភ្លាមស្រលាញ់ភ្លាម» ហើយឈានដល់ពិធីមង្គលការតែម្តង។ ជាក់ស្តែងក្នុងពេលស្ថិតនៅទំនាក់ទំនង តារាចម្រៀងរូបនេះមិនបានបង្ហាញអ្វីនៅលើបណ្តាញសង្គមនោះទេទាល់តែជិតដល់ថ្ងៃមង្គលការដើរអញ្ជើញការតែម្តង។
បន្ទាប់ពីរៀបការរួច សុវត្ថិឌី ធារីកា គឺនៅបន្តអាជីពសិល្បៈដដែលដោយបានចូលរួមសម្តែងក្នុងថ្ងៃពិធីនានា។ សុវត្ថិឌី ធារីកា ក៏ទើបទម្លាក់បទថ្មីរបស់ខ្លួននៅក្នុងទ្រនំថោន មានចំណងជើងថា «ម៉េចអ៊ីចឹងពួកម៉ាក» ៕
