ក្តៅចិត្តពេក ប៉ីប៉ី ឌី ជេ.រអតិថិជនពាក់ស្បែកជើងជាន់លើសាឡុងនិងដាក់ទំនាយអ្នកលួចតុក្កតា

អ្នកមួយចំនួនធំជ្រាបមកហើយថាថៅកែហាងដ៏ល្បីល្បាញ ប៉ីប៉ី ឌី មិនស្លូតនោះទេត្រូវប្រើសម្តីធ្ងន់គឺធ្ងន់ហើយមិនទុកមុខឱ្យអ្នកណាដែលធ្វើខុសទំនងនោះទេ។ ជាក់ស្តែងភ្ញៀវដែលមកកាន់ហាងរបស់ខ្លួនធ្វើឱ្យប្រឡាក់សាឡុងក៏លោកជេរដែរ ខណៈបានដាក់ទំនាយអ្នកដែលលួចយកតុក្កតាដែលលោកខំទិញមកពីប្រទេសជប៉ុន។

បង្ហោះសារទាំងរាត្រីថ្ងៃទី១៩ កុម្ភៈ ប៉ីប៉ី ឌី បានបង្ហាញរូបភាពមួយសន្លឹកអមដោយសំណេរក្តៅចិត្តថា «អាភ្ញៀវ ឬ មីភ្ញៀវណាក៏ចង្រៃម៉េស? នៅផ្ទះវាពាក់ស្បែកឡើងជាន់សាឡុងដែរមែន? ភ្ញៀវក៏ដោយ ភ្លើរចឹងអញដៀលក្បាលហើយ…»។ ប្រយោគមួយនេះគេបានឃើញគណនីហ្វេកប៊ុកមួយដែលមិនមានរូបភាពឈ្មោះថា «អេមម៉ា កូនពៅ» បានចូលខម្មិនថា ប៉ីប៉ី ឌី ល្បីពេកដៀលក្បាលគេជាភ្ញៀវ។ គណនីនេះសរសេរថា «ហើយចុះ លោកម្ចាស់ហាងមិនផុសវីដេអូកាំម៉េរ៉ាទៅ ល្បីពេកដៀលក្បាលគេជាភ្ញៀវតាមក្បាលវាល់រឺ?»។

ការខម្មិននេះដែរ ប៉ីប៉ី ឌី បានចូលទៅឆ្លើយតបវិញថា «ភ្ញៀវភ្លើចឹងអញដៀលក្បាលចឹង មិនមែនចេះតែដៀលតាមក្បាលវ៉ាល់ទេ ទោះមិនល្បីក៏ដៀលបាន…»។

យប់ដដែល ប៉ីប៉ី ឌី ក៏បានបង្ហោះរូបមួយសន្លឹកទៀត គឺរូបតុក្កតាដែលគេដឹងថាលោកខំប្រមូលទិញក្នុងពេលដំណើរទេសចរណ៍នៅប្រទេសជប៉ុនត្រូវបានចោរលួចយកទៅ។ លោកបានបញ្ជាក់ថា «ចោរលួចតុក្កតា នៅ Coffee Corner សន្ធរម៉ុក 2 អត់យកមកឱ្យអញវិញ អញដាក់ទំនាយឱ្យដុនដាប….»។
គួរបញ្ជាក់ថា បច្ចុប្បន្ន ប៉ីប៉ី ឌី កាក់កបនឹងមុខជំនួញជាច្រើនដោយបានបង្កើតសាខាជាច្រើនកន្លែងនិងមាននៅតាមបណ្តាខេត្តមួយចំនួនទៀត។ លោកត្រូវបានទស្សនិកជនសរសើរថាពូកែលើទីផ្សារយ៉ាងខ្លាំងទើបមុខជំនួញដំណើរការបានយ៉ាងល្អ រាល់ពេលលោកប្រម៉ូតផលិតផលអ្វីតែងតែធ្វើឱ្យទីផ្សារកក្រើក ហើយអ្នកដែលរកស៊ីស្រដៀងគ្នានេះគឺទទួលបានផលកាក់កបទៅជាមួយ។

ជាមួយនឹងមុខរបរជោគជ័យថ្មីៗនេះ ប៉ីប៉ី ឌី ក៏បានបរិច្ចាគទឹកប្រាក់ចំនួន១០លានរៀលទៅកាន់មន្ទីរពេទ្យកុមារអង្គរផងដែរ៕