«ផាត់សណ្តាយ» ដែលមានទីតាំងស្ថិតនៅឃុំផាត់សណ្តាយ ស្រុកកំពង់ស្វាយ ខេត្តកំពង់ធំ គឺជាសហគមន៍ទេសចរធម្មជាតិមួយ ដែលមានសក្តានុពលបំផុតក្នុងការទាក់ទាញភ្ញៀវទេសចរឱ្យមកចូលលេងទស្សនាកម្សាន្តជាហូរហែ។ យោងតាមក្រសួងព័ត៌មាន សហគមន៍នេះត្រូវបានបង្កើតឡើងតាំងពីឆ្នាំ ២០១៩ ដែលមានទំហំផ្ទៃដីប្រមាណ ២៣,០០០ ហិកតា ជាសហគមន៍អេកូទេសចរណ៍ដែលមានធនធានធម្មជាតិដ៏សម្បូរបែប និងជាអេកូទេសចរណ៍ដ៏សំខាន់ ដែលមានការបម្រើសេវាកម្មផ្ទះស្នាក់នៅ សេវាម្ហូបអាហារ សេវាកម្មទូក និងបោះតង់ជាដើម។.png)
លើសពីនេះអេកូទេសចរណ៍ធម្មជាតិផាត់សណ្តាយ ក៏មានព្រៃសហគមន៍ ព្រៃលិចទឹកជាច្រើនហិកតា ទស្សនាសត្វស្លាបចម្រុះជាច្រើនប្រភេទ ឱ្យចំណី និងទស្សនាត្រីមេពូជ ក៏ដូចជាទស្សនាព្រែកអភិរក្សទាំង ៥ របស់សហគមន៍ រួមទាំងទស្សនាថ្ងៃរះនិងថ្ងៃលិចនៅផ្ទៃបឹងទន្លេសាប ដែលជាទីចាប់អារម្មណ៍របស់ភ្ញៀវទេសចរគ្រប់ជាតិសាសន៍ផងដែរ។
ដូច្នេះដើម្បីទៅគោលដៅដ៏មានប្រជាប្រិយភាពនេះ លោកអ្នកអាចធ្វើដំណើរតាមផ្លូវគោក ប្រើប្រាស់មធ្យោបាយដោយរថយន្តឬម៉ូតូក៏បាន ឬតាមរយៈកាណូតរបស់សហគមន៍ចេញពីទីរួមខេត្តតាមស្ទឹងសែនមកកាន់សហគមន៍ក៏បាន។
នៅពេលទៅដល់សហគមន៍អេកូទេសចរណ៍ធម្មជាតិនេះ លោកអ្នកមិនត្រឹមតែអាចសម្រាកលម្ហែកាយយ៉ាងសប្បាយរីករាយ និងមានក្តីសុខជាមួយទេសភាពធម្មជាតិដ៏ល្អឥតខ្ចោះប៉ុណ្ណោះទេ លោកអ្នកក៏អាចមើលឃើញផ្ទាល់អំពីជីវភាពរស់នៅប្រចាំថ្ងៃ របស់ប្រជាសហគមន៍ដែលរស់នៅជុំវិញនោះប្រមាណជាង ១០០០ គ្រួសារដែលភាគច្រើនពួកគាត់ពឹងអាស្រ័យលើវិស័យទេសចរណ៍។.png)
ហេតុនេះសហគមន៍អេកូទេសចរណ៍ធម្មជាតផាត់សណ្តាយ គឺជាកន្លែងដែលមានបរិយាកាសស្រស់ស្រាយ ជាមួយនឹងសោភ័ណភាពស្រស់ស្អាត ខ្យល់ត្រជាក់បរិសុទ្ធនៃផ្ទះបណ្តែតទឹក មានវត្តបុរាណ និងមានទីទួលបុរាណរាប់រយឆ្នាំ សក្តិសមសម្រាប់ដំណើរកម្សាន្តជាគ្រួសារ និងមិត្តភក្តិ៕
