អ្នកបង្កើតមាតិកាបង្កភាពសើចសប្បាយដល់ទស្សនិកជនទ្រាំមិនបានបានពន្លះផាំងៗទៅកាន់គូស្នេហ៍វ័យក្មេងមួយគូដែលកំពុងតែមានភាពផ្អែមល្ហែមជញ្ជក់គ្នាគ្មានមានអៀនខ្មាសបង្ហោះនៅលើបណ្តាញសង្គម។ Yuro ថាការល្បីមានច្រើនណាស់ហេតុអ្វីធ្វើរឿងឱ្យគេស្អប់យ៉ាងនេះ។ ទន្ទឹមននឹងពន្លះគូស្នេហ៍នេះលោកក៏ធ្វើឱ្យអ្នកគាំទ្រព្រួយបារម្ភព្រោះតែលោកថាក្នុងខ្លួនលោកគិតតែពីចង់ស្លាប់។.png)
នៅយប់ថ្ងៃទី៦ ខែកុម្ភៈ Yuro បានចែករំលែកវីដេអូមួយដោយបានដាក់ខ្លឹមសារថា «ពេលខ្លះខ្ញុំអត់យល់ចំពោះពីរនាក់ប្អូនៗហ្នឹង ចង់ល្បីការទាមទារចំណាប់អារម្មណ៍ពីប្រជាជនមានវិធីច្រើនណាស់ ធ្វើចម្រៀងក៏បាន ធ្វើកំប្លែងឱ្យគេសើចក៏បាន ធ្វើ video ការងារពីការជួយសង្គមក៏បាន មានច្រើនទៀតសុទ្ធតែជារឿងល្អៗដែលអាចធ្វើបាន ហេតុអ្វីបានជាប្អូនៗពីរនាក់ចូលចិត្តធ្វើឱ្យគេស្អប់…»។
អ្នកបង្កើតមាតិការូបនេះបានសង្កត់ធ្ងន់ថា «ការធ្វើទាំងប៉ុន្មានរបស់ប្អូនៗវាជារឿងផ្ទាល់ខ្លួនរបស់ប្អូនៗទេ តែវាធ្វើឱ្យអ្នកមើលវាពិបាកភ្នែកមើលនិងណែនទ្រូងអំពីចរិតរបស់ប្អូនៗ»។ រូបភាពមិនសមរម្យរបស់យុវតីនិងយុវជននេះបានធ្វើឱ្យសាធារណជនប្រើប្រាស់បណ្តាញសង្គមបញ្ចេញមតិរិះគន់ចាស់ដៃព្រោះតែបានប្រព្រឹត្តអំពើដែលគ្មានភាពខ្មាសអៀនបែបនេះ។
គួរឱ្យដឹងថា អ្នកបង្កើតមាតិកា Yuro មិនទាន់ត្រឡប់វិលមកផ្តល់ភាពសប្បាយរីករាយដល់អ្នកគាំទ្រនៅឡើយទេដោយសារតែលោកកំពុងសម្រាកព្យាបាលជំងឺរបស់ខ្លួនជាច្រើនមុខស្ថិតនៅក្នុងដំណាក់កាលតាមដាននិងត្រូវពិនិត្យជាថ្មីនៅក្រៅប្រទេស។ អ្នកគាំទ្រក៏មានការព្រួយបារម្ភនៅពេលលោកបានបង្ហោះសំណេរថ្មីៗនេះនៅលើ Story ថាលោកប្រឹងធ្វើគ្រប់បែបយ៉ាងដើម្បីឱ្យខ្លួនឯងសប្បាយចិត្តមកវិញតែចេះតែកើតទុក្ខនិងមានអារម្មណ៍គិតតែចង់ស្លាប់ទៅវិញ៕
