ប្រទេសជប៉ុន ៖ គេហទំព័រ CGTN បានផ្សព្វផ្សាយកាលពីថ្ងៃទី៣ ខែកុម្ភៈ ឆ្នាំ២០២៥ ថា តាំងពីជំងឺគ្រុនផ្តាសាយរីករាលដាលខ្លាំងនៅប្រទេសជប៉ុននៅចុងខែធ្នូ ឆ្នាំ២០២៤ ធ្វើឱ្យមន្ទីរពេទ្យ និងគ្លីនិកលក់ថ្នាំជាច្រើនកន្លែងខ្វះខាតថ្នាំព្យាបាល ។ ការខ្វះខាតថ្នាំបណ្តាលមកពីពលរដ្ឋជប៉ុនកើតជំងឺនេះកាន់តែច្រើន ហើយមន្ទីរពេទ្យមួយចំនួនបានរក្សាទុកថ្នាំច្រើនពេក ។
វិទ្យាស្ថានជាតិជំងឺឆ្លងរបស់ជប៉ុនបញ្ជាក់ថា ចាប់ពីថ្ងៃទី២ ខែកញ្ញា ឆ្នាំ២០២៤ ដល់ថ្ងៃទី២៦ ខែមករា ឆ្នាំ២០២៥ ប្រទេសជប៉ុនមានអ្នកជំងឺផ្តាសាយរហូតដល់ជាង៩លាននាក់ ។ ពេលជំងឺផ្តាសាយរីករាលដាលខ្លាំង មន្ត្រីសុខាភិបាលបានអំពាវនាវឱ្យពលរដ្ឋអនុវត្តវិធានការការពារសុខភាព ដូចជា ៖ ពាក់ម៉ាស់ និងលាងសម្អាតដៃ ។.png)
កាលពីថ្ងៃទី១១ ខែមករា ឆ្នាំ២០២៥ ក្រសួងសុខាភិបាល ការងារ និងសុខុមាលភាពរាយការណ៍ថា នៅចុងខែធ្នូ ឆ្នាំ២០២៤ ជប៉ុនមានអ្នកជំងឺផ្តាសាយច្រើនបំផុត គិតចាប់ពីការកត់ត្រាទិន្នន័យនៅឆ្នាំ១៩៩៩ ។ ទិន្នន័យពីមន្ទីរពេទ្យប្រមាណ ៥,០០០កន្លែង បញ្ជាក់ថា បានព្យាបាលអ្នកជំងឺផ្តាសាយរហូតដល់៣១៧,៨១២នាក់ (ជាង៣១ម៉ឺននាក់) នៅចុងខែធ្នូ ឆ្នាំ២០២៤ ឬជាមធ្យមមានអ្នកជំងឺផ្តាសាយ៦៤នាក់ក្នុងមន្ទីរពេទ្យ១កន្លែង ដែលជាចំនួនខ្ពស់ជាងការប្រកាសរបស់រដ្ឋាភិបាល ស្មើ៣០នាក់ ។
ក្រៅពីជំងឺផ្តាសាយកើតលើមនុស្ស ប្រទេសជប៉ុនក៏ប្រឈមនឹងការឆ្លងរាតត្បាតជំងឺផ្តាសាយបក្សីផងដែរ ។ កាលពីខែមករា ឆ្នាំ២០២៥ អាជ្ញាធរខេត្តចំនួន៥ បានសម្លាប់មាន់ និងសត្វស្លាបប្រមាណ៥លានក្បាល ដើម្បីទប់ស្កាត់ការឆ្លងរាតត្បាតជំងឺផ្តាសាយបក្សី ។ 
ក្រសួងកសិកម្ម ព្រៃឈើ និងនេសាទប្រកាសថា ការឆ្លងរាតត្បាតជំងឺផ្តាសាយបក្សីពុំទាន់ធ្លាក់ចុះទេ ហើយស្ថានការណ៍នេះកាន់តែអាក្រក់ខ្លាំងឡើង ។ វានឹងប៉ះពាល់ដល់តម្លៃពងមាន់ ហើយតាំងពីដើមឆ្នាំ២០២៥ ពងមាន់បានឡើងថ្លៃ១៥% ៕
