ថ្មីៗនេះ គេហទំព័រទេសចរណ៍ពិភពលោកដ៏ល្បី Tripadvisor បានចាត់ថ្នាក់ ខេត្តសៀមរាប និង រាជធានីភ្នំពេញ ដែលជាទីកន្លែងកម្សាន្តដ៏ល្អបំផុត សម្រាប់ឆ្នាំ ២០២៥ ក្នុងតំបន់អាស៊ី។
យោងតាម Tripadvisor’s Travelers’ Choice Awards Best of The Best 2025 បង្ហាញគោលដៅទេសចរណ៍ចំនួន ២៥ កន្លែង ក្នុងចំណោមប្រទេសនៃតំបន់អាស៊ី ជាទិសដៅដែលអ្នកទេសចរណ៍មិនគួរមើលរំលង ក្នុងដំណើរកម្សាន្តឆ្នាំ ២០២៥។ ក្នុងនោះ ខេត្តសៀមរាបយើង ឈរលើលំដាប់លេខរៀងទី ៥ និងរាជធានីភ្នំពេញឈរលើលេខរៀងទី ១៨។ 
ដូចដែលគ្រប់គ្នាដឹងមកហើយថា ប្រទេសកម្ពុជាគឺជាទឹកដីអច្ឆរិយ ជាពិសេសគឺក្រុងអង្គរនៃខេត្តសៀមរាប ដែលប្រជុំដោយប្រាសាទបុរាណរាប់រយកន្លែង ផ្សារភ្ជាប់យ៉ាងស៊ីជម្រៅជាមួយនឹងរឿងរ៉ាវប្រវត្តិសាស្រ្ត វប្បធម៌ និងជំនឿ សាសនា។ បន្ថែមពីនេះ សម្រស់ធម្មជាតិដ៏ស្រស់ត្រកាល ក្នុងខេត្តសៀមរាបក៏ជាទីគយគន់សម្រាប់ភ្ញៀវទេសចរគ្រប់ៗរូបផងដែរ។ 
បើក្រឡេកទៅកាន់រាជធានីភ្នំពេញវិញ ជាទីក្រុងដ៏រស់រវើក និងទំនើបមួយ ប្រមូលផ្តុំដោយអគារខ្ពស់ៗ ផ្សារណាត់ ផ្សាររាត្រី ភ្លើងចម្រុះពណ៌នាពេលរាត្រី និងកន្លែងកម្សាន្តជាច្រើន។ កាន់តែពិសេស ព្រះបរមរាជវាំងខ្មែរ និងសារមន្ទីរជាតិ ដែលមានទីតាំងស្ថិតនៅកណ្តាលទីក្រុងនេះយ៉ាងមានភាពទាក់ទាញ។ យ៉ាងណា ថ្មីៗនេះ តាមរយៈព្រឹត្តិការណ៍សាទរកម្ពុជា ក៏បាននាំកិត្តិសព្ទប្រទេសយើងកាន់តែល្បីរន្ទឺ រហូតដល់គេហទំព័រ Agoda បានចុះផ្សាយអំពីរាជធានីភ្នំពេញ ជាទេសចរណ៍ឆ្លងឆ្នាំដ៏សប្បាយនិងមានតម្លៃសមរម្យបំផុតនៅអាស៊ីផងដែរ។
សូមជម្រាបថា បើយោងតាមក្រសួងទេសចរណ៍ កាលពីឆ្នាំ២០២៤កន្លងទៅ ប្រទេសកម្ពុជា បានស្វាគមន៍ភ្ញៀវទេសចរណ៍អន្តរជាតិប្រមាណជាង ៦,៧ លាននាក់ ដោយកើន ឡើង ២២,៩ ភាគរយ បើធៀបនឹងឆ្នាំ ២០២៣ ដែលមានចំនួន ៥,៤៥ លាននាក់។ ភ្ញៀវទេសចរបរទេសដែលមកលេងកម្ពុជាច្រើនជាងគេ រួមមាន ភ្ញៀវទេសចរថៃ វៀតណាម ចិន ឡាវ និងអាមេរិក៕
