លទ្ធផលការស្ទង់មតិរបស់ក្រុមហ៊ុនអាមេរិកឈ្មោះ Patriot Polling ដែលផ្សព្វផ្សាយកាលពីថ្ងៃទី១៣ ខែមករា ឆ្នាំ២០២៥ បង្ហាញថា ពលរដ្ឋរស់នៅកោះហ្គ្រីនឡែន ប្រទេសដាណឺម៉ាក ប្រមាណ៥៧.៣% គាំទ្រគំនិតរបស់ប្រធានាធិបតីអាមេរិកថ្មី លោក Donald Trump ដែលចង់បញ្ចូលកោះនេះជាទឹកដីរបស់អាមេរិក ។ ប៉ុន្តែនាយករដ្ឋមន្ត្រីហ្គ្រីនឡែនបញ្ជាក់ថា ពលរដ្ឋហ្គ្រីនឡែនមិនចង់ក្លាយជាជ.នជាតិដាណឺម៉ាក និងជន.ជាតិអាមេរិកទេ គឺចង់ក្លាយជាប្រទេសឯករាជ្យ ។.png)
ការស្ទង់មតិនេះបង្ហាញទៀតថា ពលរដ្ឋរស់នៅកោះហ្គ្រីនឡែន ស្មើនឹង៣៧.៤% បានបដិសេធគំនិតរបស់លោក Trump ដែលចង់បញ្ចូលកោះហ្គ្រីនឡែនជាទឹកដីរបស់អាមេរិក ខណៈអ្នកឆ្លើយតបការស្ទង់មតិ៥.៣% ទៀត ពុំទាន់សម្រេចចិត្ត ។ តាមលទ្ធផលការស្ទង់មតិបញ្ជាក់ថា ពលរដ្ឋនៅកោះហ្គ្រីនឡែនភាគច្រើនចង់ក្លាយជាពលរដ្ឋអាមេរិក ។.png)
លោក Trump ធ្លាប់ស្នើទិញកោះនេះពីប្រទេសដាណឺម៉ាក កាលពីលោកកាន់តំណែងជាប្រធានាធិបតីអាមេរិកអាណត្តិមុន ហើយលោកបាននិយាយពីសំណើទិញកោះនេះម្តងទៀត នាដើមខែមករា ឆ្នាំ២០២៥ ។ ក្នុងសន្និសីទសារព័ត៌មាន កាលពីថ្ងៃទី៧ ខែមករា កន្លងមក លោកពុំបានច្រានចោលគម្រោងប្រើកម្លាំងទ័ពដើម្បីយកកោះដ៏ធំបំផុតលើពិភពលោកនេះទេ ហើយលោកចង់ឱ្យកោះនេះស្ថិតក្រោមការគ្រប់គ្រងរបស់ក្រុងវ៉ាស៊ីនតោន ។ លោកនិយាយថា លោកអាចធ្វើអ្វីម្យ៉ាងដើម្បីយកកោះនេះដើម្បីរក្សាសន្តិសុខ ។
ចំណែកនាយករដ្ឋមន្ត្រីហ្គ្រីនឡែន លោក Mute B. Egede បានថ្លែងកាលពីថ្ងៃទី១០ ខែមករា ថា កោះនេះសម្រាប់ឱ្យពលរដ្ឋហ្គ្រីនឡែនរស់នៅ ហើយយើងមិនចង់ក្លាយជាជនជាតិដាណឺម៉ាក និងជនជាតិអាមេរិកទេ ។ បំណងប្រាថ្នារបស់យើង គឺចង់ក្លាយជាប្រទេសឯករាជ្យ និងរំពឹងថា នឹងមានដំណោះស្រាយនាពេលឆាប់ៗ ។ យើងនឹងសហការជាមួយអាមេរិកក្នុងការជីកយករ៉ែ ប៉ុន្តែពុំនៅក្រោមការគ្រប់គ្រងរបស់អាមេរិកទេ ។
គួរបញ្ជាក់ថា ហ្គ្រីនឡែន (Greenland) គឺជាកោះដ៏ធំរបស់ប្រទេសដាណឺម៉ាក និងជាកោះធំជាងគេបំផុតលើពិភពលោក ។ កោះនេះស្ថិតនៅចន្លោះមហាសមុទ្រអាកទិក និងមហាសមុទ្រអាត្លង់ទិក នៅភាគខាងកើតនៃប្រជុំកោះអាកទិករបស់ប្រទេសកាណាដា ។ បច្ចុប្បន្ន នាយករដ្ឋមន្ត្រីហ្គ្រីនឡែន កំពុងរកវិធីផ្តាច់កោះនេះចេញពីប្រទេសដាណឺម៉ាក និងក្លាយជាប្រទេសឯករាជ្យ ខណៈកោះនេះសម្បូរដោយធនធានរ៉ែ និងប្រេងឥន្ធនៈ ៕
