មកដឹងពីមូលហេតុដែលពូជស្រូវ OM ឆ្នាំនេះ ត្រូវបានធ្លាក់ថ្លៃយ៉ាងគំហុក!

រដូវប្រមូលផលបានឈានចូលមកដល់ហើយ ខណៈស្រូវប្រាំងប្រភេទ OM នៅឆ្នាំនេះបានជួបវិបត្តិទីផ្សារ ដោយសារឈ្មួញវៀតណាមឈប់ឡើងមកទិញ ធ្វើអោយតម្លៃស្រូវធ្លាក់ចុះ ជាហេតុនាំឲ្យកសិករខ្មែរមានការតវ៉ានិងត្អូញត្អែរ។

យោងតាមការគូសបញ្ជាក់ពីលោកស្រី ឃី មុន្នី អគ្គនាយិការងក្រុមហ៊ុននាំចេញអង្ករ Amru Rice Cambodia បានឲ្យដឹងថា ស្រូវប្រភេទ OMដែលពូជនាំចូលពីប្រទេសវៀតណាម ធ្វើបាន១ឆ្នាំ២ដង ដោយផ្តល់ទិន្នផលខ្ពស់ ហើយមានទីផ្សារខ្ពស់កាលពីឆ្នាំ២០២៣និង២០២៤។ កាលនោះ ស្រូវ OM ១គីឡូក្រាម តម្លៃរហូតដល់ទៅ១៣០០រៀល ឯណ្ណោះ។

យ៉ាងណាអំឡុងឆ្នាំ ២០២៣ និង ២០២៤នោះ រដ្ឋាភិបាលឥណ្ឌាដែលមានចំណែក៣០ភាគរយនៃទីផ្សារអង្ករអន្តរជាតិ បានបិទការនាំចេញអង្ករ ធ្វើអោយប្រទេសវៀតណាមមានឱកាសបានឡើងមកទិញពីកម្ពុជាដើម្បីយកទៅលក់បន្តបំពេញទីផ្សារជំនួសឥណ្ឌា។ ប៉ុន្តែនៅចុងឆ្នាំ២០២៤ និង២០២៥នេះ ស្រាប់តែរដ្ឋាភិបាលឥណ្ឌាបានបើកចំហរអោយនាំចេញអង្ករវិញ ធ្វើអោយវៀតណាមក៏ឈប់ឡើងមកទិញពីខ្មែរដែរ។ សូមជម្រាបថា នាពេលបច្ចុប្បន្ន ឥណ្ឌាបានក្លាយជាប្រទេសផ្គត់ផ្គង់អង្ករទី១ លើពិភពលោក និងមានតម្លៃថោកបំផុតផងដែរ។

យោងតាមសហព័ន្ធស្រូវអង្ករកម្ពុជាថ្មីៗនេះ ស្រូវសើម ពូជ OM មានតម្លៃចន្លោះពី៧៦០ដល់៨៣០រៀលក្នុង១គីឡូក្រាម លើទឹកដីខេត្តកំពង់ចាម កំពង់ធំ សៀមរាប បន្ទាយមានជ័យ កំពង់ឆ្នាំង បាត់ដំបង ពោធិសាត់ តាកែវ និងព្រៃវែង។

យ៉ាងណា ជាដំណឹងល្អមួយ នាថ្ងៃទី ១៥ ខែមករានេះ ក្រុមហ៊ុននាំចេញអង្ករ Amru Rice Cambodia បានប្រកាសថានឹងប្រមូលទិញស្រូវOM ពីកសិករ ក្នុងរង្វង់តម្លៃ៨៨០រៀលក្នុង១គីឡូក្រាម ដោយអាស្រ័យលើទីតាំង។ ក្រុមហ៊ុនគ្រោងនឹងទិញស្រូវស្តុកទុកខ្ទង់១២០០០តោនផងដែរ៕