«ប្រាសាទនាគព័ន្ធ» ដែលមានទីតាំងស្ថិតនៅក្នុងភូមិលាងដៃ ឃុំលាងដៃ ស្រុកអង្គរធំ ខេត្តសៀមរាប គឺជាប្រាសាទអច្ឆរិយៈមួយរបស់ប្រទេសកម្ពុជា និងជាគោលដៅទេសចរណ៍ដ៏មានភាពទាក់ទាញមួយក្នុងចំណោមប្រាសាទបុរាណជាច្រើនទៀតនៅខេត្តសៀមរាប។ ប្រាសាទនេះត្រូវបានសាងសង់ឡើង នាចុងសតវត្សទី១២ ដោយព្រះបាទជ័យវរ្ម័នទី៧ ដើម្បីឧទ្ទិសថ្វាយព្រះពុទ្ធសាសនាមហាយាន។ ប្រាសាទនាគព័ន្ធ ស្ថិតនៅលើដីកោះមួយទំហំ ៣៥០ ម៉ែត្របួនជ្រុង ដែលមានស្រះជុំវិញចំនួន ៤ និងបារាយណ៍យ៉ាងធំមួយនៅខាងក្រៅ។ 
បារាយណ៍នេះគឺមានបណ្តោយ ៣៦០០ ម៉ែត្រ និងទទឹង ៩៣០ ម៉ែត្រ អាចផ្តល់នូវទិដ្ឋភាពដ៏សម្បូរបែបនៃប្រាសាទនាគព័ន្ធ។ ដូច្នេះនៅពេលលោកអ្នកបានទៅដល់ប្រាសាទដ៏អស្ចារ្យនេះ នឹងបានឃើញទេសភាពរុក្ខជាតិបៃតងខៀវខ្ចីដ៏ស្រស់បំព្រងព័ទ្ធជុំវិញប្រាសាទ ទស្សនាសត្វស្លាបទឹកជាច្រើនប្រភេទហោះហើរស្វែងរកចំណី ក៏ដូចជាទទួលបានបទពិសោធន៍នៃការដើរឆ្លងស្ពានឈើជិត ៤០០ ម៉ែត្រ រួមទាំងផ្តិតយករូបភាពស្រស់ស្អាតជាច្រើនកន្លែងទុកជាអនុស្សាវរីយ៍បានផងដែរ។
លើសពីនេះចំណតសម្រាប់ចតរថយន្ត និងម៉ូតូ ក៏មានរបៀបរៀបរយធ្វើឱ្យភ្ញៀវទេសចរ ដែលទៅទស្សនាប្រាសាទតែងតែបង្ហាញស្នាមញញឹមមិនចេះដាច់ និងទទួលបានភាពកក់ក្តៅជានិច្ច។ ប្រាសាទនាគព័ន្ធមិនត្រឹមមានទេសភាពស្រស់ស្អាតគ្រប់រដូវកាលប៉ុណ្ណោះទេ បច្ចុប្បន្នក៏បានក្លាយជាទីតាំងទេសចរណ៍វប្បធម៌ ជំនឿ និងសាសនាដ៏ពេញនិយមបំផុត សម្រាប់សុំសេចក្ដីសុខ និងសុំទឹកលុបមុខផងដែរ។
ហេតុនេះប្រសិនបើលោកអ្នកបានទៅលេងខេត្តសៀមរាបហើយសូមកុំរំលង «ប្រាសាទនាគព័ន្ធ» ឱ្យសោះព្រោះនៅទីនេះពីមួយថ្ងៃទៅមួយថ្ងៃកាន់តែមានសម្រស់ស្រស់ស្អាត ជាពិសេសគឺទិដ្ឋភាពថ្ងៃរះ និងថ្ងៃលិចតែម្តងដែលលោកអ្នកអាចរីករាយទស្សនាបានយ៉ាងមានក្តីសុខ៕
