«កោះតាគៀវ» មានលក្ខណៈស្ងប់ស្ងាត់ល្អ និងមានទេសភាពស្រស់ស្អាតខ្លាំងណាស់ ប៉ុន្តែហាក់រំលងភ្នែកភ្ញៀវទេសចរបន្តិច។ កោះនេះមានឆ្នេរជាច្រើនដូចជា ឆ្នេរខ្សាច់ស ឆ្នេរប្លង់តុង និងឆ្នេរឡុងប៊ិច គឺជារមណីយដ្ឋានទេសចរធម្មជាតិដ៏សែនមនោរម្យមួយ ស្ថិតនៅក្នុងខេត្តព្រះសីហនុ មានចម្ងាយប្រមាណ ៤ គីឡូម៉ែត្រពីឆ្នេរអូរត្រេស ឬត្រឹមតែ ១ គីឡូម៉ែត្រពីឧទ្យានជាតិរាម។ ដើម្បីទៅដល់គោលដៅឋានសួគ៌នេះ លោកអ្នកអាចធ្វើដំណើរដោយការជិះកាណូតប្រហែល ២០ នាទីពីឆ្នេររាម។
នៅពេលទៅដល់លោកអ្នកនឹងបានឃើញប្លង់តុងដែលបញ្ចេញពន្លឺផ្លេកៗនៅតាមឆ្នេរសមុទ្រពេលដែលរលកវាយមក រួមជាមួយទឹកសមុទ្រថ្លាឈ្វង់ ខ្យល់អាកាសត្រជាក់បរិសុទ្ធ អាចគយគន់មើលថ្ងៃរះនិងថ្ងៃលិចនៅលើកោះ ក៏ដូចជាអាចដើរកាត់ព្រៃពីឆ្នេរមួយទៅឆ្នេរមួយទៀតដើម្បីទទួលបានអារម្មណ៍រីករាយ ជ្រះអស់ទុក្ខកង្វល់។ នៅទីនេះក៏មានរីស៊ត និងបឹងកាឡូតជាមួយតម្លៃសមរម្យ រួមទាំងមានកន្លែងបោះតង់សម្រាកលម្ហែកាយ ស្ទូចត្រី ចាប់ខ្ចង ចាប់ក្តាមនៅតាមឆ្នេនាពេលរាត្រី បង្កើតជាអនុស្សារីដែលមិនអាចបំភ្លេចបាន។
លោកអ្នកក៏អាចអាំងសាច់ និងគ្រឿងសមុទ្រស្រស់ៗជាច្រើនមានដូចជាមឹក បង្គា បង្គង និយាយរឿងក្នុងចិត្តជាមួយបងប្អូនគ្រួសារ និងមិត្តភក្តិយ៉ាងមានក្តីសុខ។ ជាមួយលក្ខណៈស្ងប់ស្ងាត់ និងទេសភាពស្រស់បំព្រង កោះតាគៀវក៏ជាតំបន់ដែលពោពេញទៅដោយសក្តានុពលធម្មជាតិបែបសមុទ្រផងដែរ។ កោះតាគៀវ គឺជាកោះដ៏តូចមួយដែលមានក្រឡាផ្ទៃចំនួន ២៨ គីឡូម៉ែត្រការ៉េ គ្របដណ្ដប់ដោយព្រៃឈើបៃតងគួរជាទីគគយគន់ ។
ហេតុនេះនៅថ្ងៃឈប់សម្រាក ឬចុងសប្តាហ៍ភ្ញៀវទេសចរកុំភ្លេចចូលទស្សនាតំបន់រមណីយដ្ឋានកោះតាគៀវផង ប្រសិនបើលោកអ្នកបានទៅដល់ខេត្តព្រះសីហនុ។ នៅខេត្តព្រះសីហនុ ក្រៅពីកោះតាគៀវ ក៏មានកោះល្បីជាច្រើនទៀតផងដែរដូចជា ឆ្នេរអូរឈើទាល កោះរុង កោះរុងសន្លឹម ឆ្នេរអូរត្រេស ឧទ្យានជាតិរាម កោះទន្សាយ កោះទន្សាយ និងកន្លែងកម្សាន្តសប្បាយៗជាច្រើនទៀត៕
