ជាទូទៅប្រាសាទ ឬព្រះវិហារនីមួយៗកសាងឡើងដើម្បីជាការគោរពដល់ព្រះអទិទេព។ ឧទាហរណ៍ដូចប្រាសាទអង្គរវត្តរបស់ខ្មែរយើងសាងសង់ឡើងដើម្បីឧទ្ទិសឱ្យព្រហ្មញ្ញសាសនា ខណៈប្រាសាទ Borobudur របស់ឥណ្ឌូនេស៊ីសាងសង់ឡើងដើម្បីឧទ្ទិសថ្វាយដល់ព្រះពុទ្ធសាសនាមហាយាន។ ដោយឡែកព្រះវិហារដ៏ចំណាស់មួយនេះវិញស្រាប់តែសាងសង់ឡើងដើម្បីគោរពសាសានាដល់ទៅពីរគឺអ៊ីស្លាមផង និងគ្រិស្តផង ដែលមើលទៅមានលក្ខណៈខុសប្លែកពីគេ។.png)
ព្រះវិហារ Hagia Sophia របស់ប្រទេសទួរគី ដែលត្រូវបានសាងសង់ក្នុងឆ្នាំ ៥៣២ នៅអ៊ីស្តង់ប៊ុលបច្ចុប្បន្នមានអាយុកាល ១៥០០ ឆ្នាំហើយ គឺជាព្រះវិហារគ្រិស្តសាសនាដ៏ធំបំផុតមួយនៅក្នុងពិភពលោក ហើយបន្ទាប់មកបានប្តូរទៅជាវិហារអ៊ីស្លាមវិញក្រោមអាណាចក្រអូតូម៉ង់ក្នុងសតវត្សទី ១៥។ ដូច្នេះ Hagia Sophia ក៏ជាវិហារអ៊ីស្លាមដ៏ធំមួយ និងជាគោលដៅទេសចរណ៍ដ៏ល្បីល្បាញនៅក្នុងទីក្រុងអ៊ីស្តង់ប៊ុលផងដែរ។ ហេតុនេះបច្ចុប្បន្នព្រះវិហារ Hagia Sophia ត្រូវបានគេស្គាល់ថាជាព្រះវិហារតែមួយគត់ក្នុងលោកដែលគោរពសាសនាដល់ទៅពីរ។
សម្រាប់ប្រវត្តិនោះដំបូងឡើយព្រះវិហារ Hagia Sophia ត្រូវបានសាងសង់ក្នុងឆ្នាំ ៥៣២ ក្រោមការដឹកនាំរបស់អធិរាជ Justinianos នៃចក្រភព Byzantine សម្រាប់ឧទ្ទិសថ្វាយដល់គ្រិស្តសាសនាដែលមានរយៈពេល ១០០០ ឆ្នាំហើយ ប៉ុន្តែដោយសារមានរឿងចម្រូងចម្រាសផ្ទៃក្នុង ព្រះវិហារ Hagia Sophia ក៏ត្រូវបានដួលរលំបន្ទាប់ពីកុបកម្ម។ នៅឆ្នាំ ១៤៥៣ ព្រះវិហារនេះក៏បានជួសជុលឡើងវិញស្ថិតក្រោមការគ្រប់គ្រងរបស់ចក្រភពអូតូម៉ង់ដែលស្តេចកំពុងកាន់អំណាចនោះជាអ្នកគោរពសាសនាអ៊ីស្លាម ហើយក៏ប្រែក្លាយព្រះវិហារនេះទៅជាវិហារអ៊ីស្លាមវិញ។
ព្រះវិហារ Hagia Sophia មានពីជាន់ដោយជាន់ក្រោមគោរពសាសនាអ៊ីស្លាម និងជាន់លើគោរពសាសនាគ្រិស្ត ជាមួយផ្ទៃដីជាង ៥,៥០០ ម៉ែត្រការ៉េ។ ដោយសារតែ Hagia Sophia គឺជាអគារសាសនា អ្នកទស្សនាត្រូវតែស្លៀកសំលៀកបំពាក់ឱ្យបានសមរម្យ ទាំងបុរស និងស្ត្រីត្រូវស្លៀកសម្លៀកបំពាក់វែងៗដែលគ្របលើស្មា ទ្រូង និងជង្គង់របស់ពួកគេឱ្យជិត លើសពីនេះស្ត្រីក៏ត្រូវគ្របសក់របស់ពួកគេដោយកន្សែងផងដែរ។ ទោះជាយ៉ាងណាភ្ញៀវទេសចរដែលមិនមែនជាអ្នកកាន់សាសនាអ៊ីស្លាមគឺមិនអាចទស្សនាជាន់ក្រោមនៃវិហារបានឡើយ៕
