បឹងកន្សែង ដែលជាបឹងធម្មជាតិមួយស្ថិតនៅចំកណ្តាលបេះដូងនៃខេត្តរតនគិរី និងជាតំបន់រមណីយដ្ឋានទេសចរណ៍ដ៏មានសក្តានុពលបំផុតមួយក្នុងខេត្តភាគឦសាន បច្ចុប្បន្នបានកំពុងឆក់យកបេះដូងភ្ញៀវទេសចរជាតិ និងអន្តរជាតិឱ្យមកគយគន់ជាមួយសម្រស់ធម្មជាតិដ៏ស្រស់ត្រកាល ពោរពេញទៅដោយផ្កាចោលក្លិនក្រអូបឈ្ងុយឈ្ងប់ ជារមណីយដ្ឋានល្អឯកប្រកបដោយភាពទាក់ទាញបំផុត។
បឹងកន្សែងដែលមានទីតាំងស្ថិតក្នុងភូមិអូរកន្សែង ឃុំបឹងកន្សែង ស្រុកបានលុង ខេត្តរតនគីរី គឺជាកន្លែងដែលមានបរិស្ថានស្អាត សោភណ្ឌភាពល្អ ប្រកបដោយអនាម័យខ្ពស់ ហេដ្ឋារចនាសម្ព័ន្ធជុំវិញបរិវេណមាត់បឹងស្រស់ស្អាត មានរៀបចំសួនច្បារស្រស់បំព្រង និងបំពាក់ភ្លើងបំភ្លឺសាធារណៈ សាងសង់រូបសំណាក់គ្រួសារដំរី គួរជាទីចាប់អារម្មណ៍យ៉ាងខ្លាំង។ ភ្ញៀវទេសចរដែលទៅលេងនៅបឹងនេះហើយគឺទទួលបានអារម្មណ៍ស្រស់ស្រាយ និងបង្កើតអនុស្សារីល្អៗជាច្រើនដែលមិនអាចបំភ្លេចបាន។
បឹងកន្សែងគឺជាកន្លែងកម្សាន្តដ៏ល្បីប្រចាំខេត្តរតនគិរី និយាយរួមទៅ បឹងនេះគឺជាទីកន្លែងដ៏សែនមនោរម្យបើបានទៅដល់ខេត្តរតនៈគិរីហើយ សូមកុំរំលងរមណីយដ្ឋានប្រវត្តិសាស្រ្តនេះឱ្យសោះ។ គួរបញ្ជាក់ដែរថា បឹងធម្មជាតិដ៏ស្រស់ត្រកាលមួយនេះ ពីមុនត្រូវបានអ្នករស់នៅក្នុងខេត្តរតនគិរីភាគច្រើនប្រាប់ឱ្យដឹងថា ក្នុងសម័យអតីតកាល នៅតំបន់មាត់បឹងកន្សែង សំបូរទៅដោយរុក្ខជាតិជាច្រើនប្រភេទដុះមានផ្ការីកចោលក្លិនក្រអូបឈ្ងុយឈ្ងប់ ហើយនៅក្នុងផ្ទៃបឹងវិញមានផ្ទៃទឹកថ្លាឈ្វេងមានដុះប្រមូលផ្ដុំដោយសារាយ និងព្រលិតជាដើម។
ទោះជាយ៉ាងណាបច្ចុប្បន្នបឹងកន្សែងបានក្លាយជាកន្លែងដែលមានបរិស្ថានស្អាត សោភណ្ឌភាពល្អ និងជារមណីយដ្ឋានល្អឯកប្រកបដោយភាពទាក់ទាញ ដោយមានការរៀបចំដាក់ឧបករណ៍ហាត់ប្រាណ និងឧបករណ៍សម្រាប់ក្មេង ជិះលេងតាមមាត់បឹង ការសាងសង់បង្គន់អនាម័យសាធារណៈ ធ្វើឱ្យកន្លែងនេះកាន់តែទាក់ទាញភ្ញៀវទេសចរ៕
រូបភាព៖ Chesda Snapher
