ភាពយន្តកូរ៉េខាងត្បូងអាចជួយព្យាបាលសុខភាពផ្លូវចិត្ត និងរកវិធីដោះស្រាយបញ្ហា

ប្រទេសកូរ៉េខាងត្បូង ៖ តើលោកអ្នកធ្លាប់បានទស្សនាភាពយន្តរបស់កូរ៉េខាងត្បូងទេ? ភាពយន្តកូរ៉េខាងត្បូងមួយចំនួនត្រូវបានផលិតឡើងដើម្បីឱ្យអ្នកទស្សនាមានសុខភាពផ្លូវចិត្តល្អប្រសើរ ឬជួយព្យាបាលជំងឺផ្លូវចិត្ត ។ វាជាការព្យាបាលផ្លូវចិត្តអ្នកទស្សនាគ្រប់ជាតិសាសន៍បែបសិល្បៈ តាមរយៈតារាសម្តែងមានមន្តស្នេហ៍ និងទេពកោសល្យ ។

អ្នកស្រី ជេនី ចាង អ្នកជំនាញផ្លូវចិត្តនិយាយថា ការពិត វាមានមូលហេតុសំខាន់ៗដែលធ្វើឱ្យមនុស្សជាច្រើនជក់មើលរឿងភាគកូរ៉េខាងត្បូង ដោយសារសាច់រឿងបង្ហាញពីអារម្មណ៍សោកសៅរបស់តួសម្តែងក្រោយការបែកបាក់ស្នេហា រហូតដល់ពួកគេរកឃើញអ្នកថ្មី ។ ខ្លឹមសារនៃសាច់រឿង គឺចង់ឱ្យអ្នកទស្សនាអាចព្យាបាលដំបៅក្នុងចិត្តរបស់ខ្លួន និងត្រឡប់មករឹងមាំជាថ្មី ។

អ្នកស្រីថា ៖ «យើងម្នាក់ៗតែងតែមានសម្ពាធក្នុងគ្រួសារ, ជម្លោះ, ការឈឺចាប់ និងសេចក្តីសង្ឃឹម ហើយការមើលភាពយន្តដែលមានតួអង្គចេះដោះស្រាយបញ្ហាក្នុងជីវិត គឺជួយឱ្យអ្នកទស្សនាឆ្លងផុតឧបសគ្គក្នុងជីវិតជាក់ស្តែងបាន ។ ខ្ញុំបានកើតនៅទីក្រុងសេអ៊ូល និងធំឡើងនៅអាមេរិក ហើយការមើលភាពយន្តបានជួយឱ្យខ្ញុំទទួលស្គាល់ខ្លួនឯងថា មានដើមកំណើតនៅកូរ៉េ ដែលខ្ញុំតែងបដិសេធរហូតមក» ។

ក្នុងរយៈពេលប៉ុន្មានឆ្នាំនេះ មនុស្សនៅលើពិភពលោក បានទស្សនាភាពយន្តកូរ៉េខាងត្បូងច្រើន ជាពិសេស ពលរដ្ឋអាមេរិកបានទស្សនាភាពយន្តកូរ៉េក្នុងពេលជំងឺកូវីដ-១៩ ឆ្លងរាតត្បាតកន្លងមក ។

អ្នកស្រី ជេនី ប័រី គ្រូបង្រៀនអាមេរិក បានមើលភាពយន្តកូរ៉េក្រោយពីអ្នកស្រីធ្វើបុណ្យសពសមាជិកគ្រួសារ គឺមិត្តភក្តិប្រាប់ឱ្យអ្នកស្រីមើលរឿង « It’s Okay to Not Be Okay» កាលពីឆ្នាំ២០២០ ។ វាអាចជួយឱ្យអ្នកស្រីកាត់ចិត្ត និងឆ្លងផុតពេលវេលាដ៏លំបាកបាន ហើយចាប់ពីពេលនោះមក អ្នកស្រីក៏មើលភាពយន្តកូរ៉េជាបន្តបន្ទាប់ ដោយសារជួយឱ្យចិត្តស្ងប់ ។

ពលរដ្ឋអាមេរិកម្នាក់ទៀត គឺអ្នកស្រី អេរីន មេកខយ ប្រាប់ថា ខ្លួនមានបញ្ហាធ្លាក់ទឹកចិត្តតាំងពីក្មេងមកម៉្លេះ ប៉ុន្តែភាពយន្តកូរ៉េជួយឱ្យអ្នកស្រីចាត់ការបញ្ហានេះបាន ។ តារាសម្តែងម្នាក់ៗមានគុណសម្បត្តិខុសៗគ្នា ហើយធ្វើឱ្យអ្នកស្រីមានអារម្មណ៍ធូរស្រាលច្រើន ។

ការលើកឡើងថា ភាពយន្តកូរ៉េអាចជួយព្យាបាលផ្លូវចិត្ត គឺពុំគួរឱ្យជឿទេ ប៉ុន្តែប្រធានគ្លីនិកចិត្តសាស្ត្រនៅទីក្រុងសេងអ៊ូល និយាយថា ការមើលភាពយន្តកូរ៉េអាចកាត់បន្ថយភាពតានតឹង និងស្មុគស្មាញ តាមរយៈការព្យាបាលបែបសិល្បៈ ។ ការព្យាបាលតាមវិធីនេះត្រូវបានប្រើប្រាស់តាំងពីឆ្នាំ១៩៤០ ដោយឱ្យអ្នកមានបញ្ហាផ្លូវចិត្តគូរគំនូរ បន្ទាប់មក ក៏ព្យាបាលតាមបែបសិល្បៈផ្សេងទៀត ។

ភាពយន្តកូរ៉េខាងត្បូងអាចជួយឱ្យអ្នកទស្សនាលើពិភពលោក យល់ដឹងពីទស្សនៈថ្មីៗ និងរកវិធីដោះស្រាយបញ្ហានៅពេលស្ថិតក្នុងស្ថានការណ៍បែកបាក់គ្រួសារ ឬបាត់បង់មនុស្សជាទីស្រឡាញ់ ដែលគ្រូពេទ្យផ្លូវចិត្តពុំអាចព្យាបាលបាន ៕