តើយើងនៅតែផឹកកាហ្វេជួយកុំឱ្យងងុយដេកពេលកំពុងបំពេញការងារ មែនទេ? អ្នកធ្វើការក្នុងការិយាល័យជាច្រើននាក់តែងតែផឹកកាហ្វេដើម្បីឱ្យមានអារម្មណ៍ស្រស់ថ្លាជារៀងរាល់ថ្ងៃ ហើយអ្នកខ្លះទៀតបានផឹកកាហ្វេអស់ជាច្រើនកែវក្នុង១ថ្ងៃ ។ ប៉ុន្តែអ្នកជំនាញផ្នែកចំណីអាហារបានណែនាំឱ្យផឹកភេសជ្ជៈនេះ១កែវជំនួសវិញ ដើម្បីជួយឱ្យស្វាងងងុយ និងមានអារម្មណ៍ផ្តោតជាមួយការងារ ។
អ្នកជំនាញនិយាយថា បើទោះជាកាហ្វេសម្បូរទៅដោយកាហ្វេអ៊ីនធ្វើឱ្យមានអារម្មណ៍ស្រស់ថ្លា ឬថាមពលក្តី ប៉ុន្តែការផឹកកាហ្វេខ្មៅ២កែវ អាចធ្វើឱ្យមានផលប៉ះពាល់ផ្សេងៗ ។ ដូច្នេះ គួរតែផឹកទឹកតែជំនួសវិញ ពីព្រោះក្រៅពីទឹកតែ អាចធ្វើឱ្យអារម្មណ៍ស្រស់ថ្លាហើយ វាក៏ជួយឱ្យយើងផ្ចង់អារម្មណ៍នឹងការងារទៀតផង ។
អ្នកស្រី Zhang Beizhen អ្នកជំនាញផ្នែកចំណីអាហារនៅតៃវ៉ាន់ បានសរសេរក្នុងហ្វេសប៊ុកថា កាហ្វេសម្បូរដោយកាហ្វេអ៊ីនអាចជំរុញដល់ប្រព័ន្ធសរសៃប្រសាទកណ្តាល និងធ្វើឱ្យមានអារម្មណ៍ស្រស់ថ្លា ឬបាត់ងងុយដេក ប៉ុន្តែបើរាងកាយទទួលយកកាហ្វេអ៊ីនច្រើនពេក វានឹងបណ្តាលឱ្យអារម្មណ៍ធុញថប់, បេះដូងលោតញាប់ និងញ័រដៃ ។ ដូច្នេះ ពុំគួរទទួលកាហ្វេអ៊ីនចូលរាងកាយ លើស៣០០មីលីក្រាមក្នុង១ថ្ងៃទេ រីឯការផឹកកាហ្វេខ្មៅ២កែវ ក៏ធ្វើឱ្យរាងកាយទទួលកាហ្វេអ៊ីនច្រើនដែរ ។
ទឹកតែ ក៏មានកាហ្វេអ៊ីនដូចគ្នាដែរ ប៉ុន្តែមានបរិមាណតិចជាងកាហ្វេពាក់កណ្តាល មានន័យថា ទឹកតែ នឹងជំរុញប្រព័ន្ធសរសៃប្រសាទតិចជាងកាហ្វេ ។ ក្រៅពីនេះ ទឹកតែ មានសារធាតុ Theanine ជួយឱ្យអារម្មណ៍ស្រស់ថ្លា និងបង្កើនការផ្តោតអារម្មណ៍, មានសារធាតុប្រឆាំងអុកស៊ីតកម្មខ្លាំង ហើយវាអាចកាត់បន្ថយ Radicals ដែលរាងកាយផលិតពេលសម្រាកយប់ជ្រៅ ។ ដូច្នេះ ទឹកតែ គឺជាជម្រើសល្អជាងកាហ្វេ ដើម្បីជួយដល់ការផ្តោតអារម្មណ៍ របស់យើង ។
ចំណែកការផឹកកាហ្វេនឹងផ្តល់ប្រយោជន៍ច្រើន ហើយការស្រាវជ្រាវខ្លះបង្ហាញថា កាហ្វេអាចជួយឱ្យសុខភាពបេះដូងល្អប្រសើរ ប៉ុន្តែវាមានប្រយោជន៍បាន លុះត្រាតែផឹកក្នុងបរិមាណសមល្មម កុំផឹកច្រើនពេក ។
ក្រៅពីនេះ នៅមានវិធីផ្សេងទៀតដើម្បីកុំឱ្យងងុយដេកនៅកន្លែងធ្វើការ រួមមាន ៖ បើកចម្រៀងស្តាប់, តាំងចិត្ត និងផ្តោតអារម្មណ៍, ទទួលយកពន្លឺថ្ងៃ, ទំពារទឹកកក, លុបមុខដោយទឹកត្រជាក់, ពត់ដៃ ពត់ជើង និងដើរចុះ-ឡើង ៕
