ក្រុមហ៊ុនអាកាសចរណ៍អាស៊ីជាច្រើនផ្អាកការហោះហើរទៅកាន់កោះបាលី

ប្រទេសឥណ្ឌូណេស៊ី ៖ សារព័ត៌មានបរទេសបានរាយការណ៍ថា ក្រុមហ៊ុនអាកាសចរណ៍ជាច្រើននៅអាស៊ីបានផ្អាកការហោះហើរទៅកាន់កោះបាលី ប្រទេសឥណ្ឌូណេស៊ី ក្រោយពីភ្នំភ្លើង Lewotobi Laki-Laki ផ្ទុះមិនឈប់ឈរ និងបញ្ចេញផ្សែងផេះទៅលើអាកាសរហូតដល់៩គីឡូម៉ែត្រ ។

ក្រុមហ៊ុនអាកាសចរណ៍នៅប្រទេសអូស្ត្រាលី, ហុងកុង, ឥណ្ឌា, ម៉ាឡេស៊ី និងសិង្ហបុរី បានប្រកាសផ្អាកជើងហោះហើរទៅកាន់កោះបាលី កាលពីថ្ងៃទី១៣ ខែវិច្ឆិកា ឆ្នាំ២០២៤ ដោយសារការផ្ទុះភ្នំភ្លើង Lewotobi Laki-Laki ស្ថិតនៅលើកោះហ្វ័ររេស ខេត្តនូសាទែងការ៉ា តាំងពីដើមខែវិច្ឆិកា ឆ្នាំ២០២៤ ។

ក្រុមហ៊ុនអាកាសចរណ៍ Virgin Australia Airlines ឱ្យដឹងថា បានផ្អាកជើងហោះហើរចេញពីកោះបាលី មកកាន់ទីក្រុងស៊ីដនី និងទីក្រុងម៉េលប៊ន ។ រីឯក្រុមហ៊ុន Jetstar Airline បានផ្អាកជើងហោះហើរទៅ-មកកោះបាលី រហូតដល់រសៀលថ្ងៃទី១៤ ខែវិច្ឆិកា ។

ចំណែកក្រុមហ៊ុន Singapore Airlines លើកឡើងថា បានផ្អាកជើងហោះហើរទៅកោះបាលី ចំនួន២ជើង ដោយសារការផ្ទុះភ្នំភ្លើង ។ ដូចគ្នានេះ ក្រុមហ៊ុន Scoot Airlines បានផ្លាស់ប្តូរកាលវិភាគហោះហើរ និងកាត់បន្ថយជើងហោះហើរទៅកោះបាលី ។

ដោយឡែក ក្រុមហ៊ុន Cathay Pacific របស់ហុងកុង ក៏បានប្រកាសផ្អាកការហោះហើរដូចគ្នាដែរ ហើយក្រុមហ៊ុនបានផ្លាស់ប្តូរកាលវិភាគហោះហើរទៅកោះបាលី ។ រីឯក្រុមហ៊ុន Malaysia Airlines, Air Asia និង Indigo Airlines របស់ឥណ្ឌា បានផ្អាកការហោះហើរ កាលពីថ្ងៃទី១៣ ខែវិច្ឆិកា ។

លោក អាម៉ាត់ ឈៀវគី ឆាហាប់ នាយកគ្រប់គ្រងអាកាសយានដ្ឋានអន្តរជាតិកោះបាលី បានចេញសេចក្តីប្រកាសថា កាលពីថ្ងៃទី១២ ខែវិច្ឆិកា ជើងហោះហើរក្នុងស្រុក ចំនួន១២ និងក្រៅស្រុក ចំនួន២២ បានផ្អាកការហោះហើរដោយសារការផ្ទុះភ្នំភ្លើង ។

គួរបញ្ជាក់ថា ភ្នំភ្លើង Lewotobi Laki-Laki មានកម្ពស់១.៧០៣ម៉ែត្រ បានផ្ទុះយ៉ាងខ្លាំងកាលពីដើមខែវិច្ឆិកា ឆ្នាំ២០២៤ បណ្តាលឱ្យពលរដ្ឋស្លាប់ចំនួន៩នាក់ និងរងរបួស៣១នាក់ ។ ក្រោយមក ភ្នំភ្លើងនេះក៏បានផ្ទុះជាបន្តបន្ទាប់ ដែលធ្វើឱ្យពលរដ្ឋជាង១១.០០០នាក់ ជម្លៀសចេញពីតំបន់គ្រោះថ្នាក់ ៕