សោកស្តាយ! អតីតសមាជិក One Direction លាចាកលោកទាំងវ័យក្មេង

យោងតាម សារព័ត៌មាន Reuters នៅល្ងាចថ្ងៃទី ១៦ ខែតុលា ម៉ោងក្នុងស្រុកត្រូវនឹងព្រឹកថ្ងៃទី១៧ ខែតុលា ម៉ោងនៅកម្ពុជា លោក Liam Payne អតីតសមាជិក One Direction បានធ្លាក់ពីលើជាន់ទី៣ នៃសណ្ឋាគារមួយក្នុងប្រទេសអាហ្សង់ទីនដែលមានកម្ពស់ពី១៣ ទៅ ១៤ ម៉ែត្រ។ របួសរបស់តារាចម្រៀងរូបនេះ «ធ្ងន់ធ្ងរខ្លាំងមិនអាចសង្គ្រោះបាន» ។ ពីមុនកន្លែងសង្គ្រោះបន្ទាន់បានទទួលរបាយការណ៍ពីបុរសម្នាក់ថា «មានមនុស្សមានអាកប្បកិរិយាខុសឆ្គង អាចប៉ះពាល់ដោយថ្នាំញៀ.ន»។

មុនពេលលោកស្លាប់ តារាចម្រៀងរូបនេះបានប្រកាសជាសាធារណៈអំពីការតស៊ូរបស់ខ្លួនជាមួយនឹងការញៀន និងចំណាយពេលនៅក្នុងកន្លែងស្តារនីតិសម្បទា។ ក្នុងឆ្នាំ ២០២៣ តារាចម្រៀងរូបនេះបានចែករំលែកវីដេអូមួយនៅលើ YouTube ដោយបង្ហាញថាលោកបានឈប់ជក់បារីអស់រយៈពេល ៦ ខែបន្ទាប់ពីចំណាយពេលជិត ១០០ ថ្ងៃនៅឯកន្លែងសម្រាកកាយនៅរដ្ឋ Louisiana (សហរដ្ឋអាម៉េរិក) ។ លោកបាននិយាយថាលោកគ្រប់គ្រងជីវិតរបស់ខ្លួនបានប្រសើរជាងមុន ដោយចំណាយពេលសម្រាប់ខ្លួនឯង និងគ្រួសារ។

នៅដើមខែតុលាឆ្នាំនេះ Liam Payne មានវ័យ៣១ឆ្នាំបានចូលរួមការប្រគំតន្ត្រីនៅទីក្រុង Buenos Aires ប្រទេសអាហ្សង់ទីន។ កាលពីថ្ងៃទី១៦ ខែតុលា នៅលើ Snapchat តារាចម្រៀងរូបនេះបានបង្ហោះដំណើរកម្សាន្តរបស់ខ្លួននៅប្រទេសអាហ្សង់ទីន ដោយនិយាយអំពីការជិះសេះ លេងប៉ូឡូ និងបំណងប្រាថ្នាចង់ត្រឡប់មកផ្ទះវិញដើម្បីមើលឆ្កែរបស់ខ្លួន។ លោកបាននិយាយនៅក្នុងវីដេអូថា «ថ្ងៃនេះជាថ្ងៃដ៏អស្ចារ្យមួយនៅក្នុងប្រទេសអាហ្សង់ទីន» ។
នៅពេលដែលក្រុម One Direction ឈប់បន្តសកម្មភាពនៅឆ្នាំ ២០១៥ Liam Payne បានចាប់ផ្តើមអាជីពទោល ដោយបានចេញបទចម្រៀង Strip That Down ក្នុងឆ្នាំ២០១៧ និងអាល់ប៊ុមក្នុងឆ្នាំ២០១៩។ នៅខែមីនា Liam Payne បានចេញបទចម្រៀង Teardrops ។ លោកមានកូនប្រុសម្នាក់ជាមួយតារាចម្រៀង Cheryl ក្នុងឆ្នាំ ២០១៧ ពួកគេបានបែកបាក់គ្នាមួយឆ្នាំក្រោយមក។ Liam Payne មានទំនាក់ទំនងជាមួយតារាម៉ូដែល Maya Henry ក្នុងឆ្នាំ២០១៩ ហើយបានភ្ជាប់ពាក្យនៅខែសីហា ឆ្នាំ២០២០។ ទទួលបានដំណឹងដ៏សោកសៅនេះ អ្នកក្នុងចង្កោមសិល្បៈនិងអ្នកគាំទ្របានបង្ហាញអារម្មណ៍សោកសៅនិងរន្ធត់ចិត្តចំពោះមរណភាពតារាប្រុសរូបនេះ។

ក្នុងឆ្នាំ ២០១០ Liam Payne ទទួលបានកិត្តិនាមទូទាំងពិភពលោកក្នុងនាមជាសមាជិកនៃក្រុមចម្រៀងប៉ុប One Direction ។ ក្រុមនេះបានចាប់ផ្តើមសកម្មភាពរបស់ខ្លួនបន្ទាប់ពីទទួលបានចំណាត់ថ្នាក់លេខ ៣ នៅ ចក្រភពអង់គ្លេសនៃកម្មវិធី X Factor ក្នុងឆ្នាំ២០១០ ប៉ុន្តែត្រូវបានរំសាយនៅឆ្នាំ ២០១៦ ដោយសារតែសមាជិកបានបន្តអាជីពទោល និងគម្រោង។
Entertainment Weekly ធ្លាប់បានចាត់ថ្នាក់ One Direction ជាក្រុមចម្រៀងប្រុសដ៏អស្ចារ្យបំផុតទីបីគ្រប់ពេល។ យោងតាម គេហទំព័រ Celebrity Net Worth តារាចម្រៀង Liam Payne រកបានប្រហែល ៧០ លានដុល្លារអាម៉េរិក នៅពេលចូលរួមជាមួយ One Direction និងបន្តអាជីពទោល៕