រថភ្លើងរបស់ជប៉ុន ដែលដឹកមកកម្ពុជាកាលពីអំឡុងខែមេសាកន្លងទៅ ខណៈក្នុងឱកាសពិធីបុណ្យភ្ជុំបិណ្ឌនេះនឹងដាក់ឲ្យដំណើរការតេស្តសាកល្បងរយៈពេល ៣ ថ្ងៃ ទៅកាន់គោលដៅមួយចំនួន។
កាលពីថ្ងៃទី ២៧ ខែកញ្ញា យោងតាមការចុះផ្សាយរបស់គេហទំព័រ Royal Railway Cambodia បានគូសបញ្ជាក់យ៉ាងដូច្នេះថា «ដើម្បីអបអរពិធីបុណ្យភ្ជុំបិណ្ឌប្រពៃណីខ្មែរខាងមុខនេះ ក្រុមហ៊ុន រ៉ូយ៉ាល់ រេលវេ យើងខ្ញុំនឹងដាក់ដំណើរការតេសសាកល្បងនូវទូរថភ្លើងជប៉ុន Kiha 182-183 ដឹកអ្នកដំណើរចំនួន ៣ ថ្ងៃ ទៅតាមកាលវិភាគខាងក្រោមគឺ៖
នៅថ្ងៃច័ន្ទ ទី៣០ ខែកញ្ញា នឹងធ្វើដំណើរទៅកាន់គោលដៅមួយចំនួនដូចជា៖ ពីភ្នំពេញ – ព្រះសីហនុ, ភ្នំពេញ – កំពត, ភ្នំពេញ – កែប, ភ្នំពេញ – តាកែវ។
នៅថ្ងៃអង្គារ ទី១ ខែតុលា នឹងធ្វើដំណើរពីភ្នំពេញ – កំពង់ឆ្នាំង ( រមាស ), ភ្នំពេញ – ពោធិ៍សាត់, ភ្នំពេញ – មោង និងភ្នំពេញ – បាត់ដំបង។
នៅថ្ងៃពុធ ទី២ ខែតុលា ៧:០០ នាទីព្រឹក នឹងធ្វើដំណើរពី ភ្នំពេញ – ព្រះសីហនុ, ភ្នំពេញ – កំពត, ភ្នំពេញ – កែប, ភ្នំពេញ – តាកែវ។
គេហទំព័ខាងលើបានបញ្ជាក់ទៀតថា«ដំណើរការដឹកអ្នកដំណើរសាកល្បងទាំង ៣ ថ្ងៃនេះ តម្លៃសំបុត្ររថភ្លើង នឹងរក្សាតម្លៃដើម មិនមានការផ្លាស់ប្តូរ ឬដំឡើងតម្លៃសំបុត្រឡើយ។ សូមអញ្ជើញអតិថិជនទាំងអស់មកទទួលយកបទពិសោធន៍ថ្មី ជាមួយការធ្វើដំណើរតាមរយៈទូរថភ្លើងជប៉ុនទៅកាន់ស្រុកកំណើត និងដំណើរកំសាន្តនានា»។
សូមជម្រាបជូនផងដែរថា ទូរថភ្លើងជប៉ុន Kiha 182-183 គឺជារថភ្លើងរបស់ប្រទេសជប៉ុន ដែលបានដឹកតាមកប៉ាល់ ចូលមកកាន់កំពង់ផែស្វ័យតក្រុងព្រះសីហនុ នៃប្រទេសកម្ពុជា កាលពីថ្ងៃទី ២៨ ខែមេសា ឆ្នាំ ២០២៤ កន្លងទៅ។ រថភ្លើងនេះគឺជាសមាជិកថ្មីបន្ថែមមួយទៀត ដែលបម្រើដល់វិស័យផ្លូវដែកនៅកម្ពុជា របស់ក្រុមហ៊ុន Royal Railway Cambodia៕
