រង្វង់មូលប្រមោយ និមិត្តរូបដ៏សំខាន់ប្រចាំស្រុកវាលវែង ខេត្តពោធិ៍សាត់!

រូបសំណាក់សត្វដំរី ៥០៥ ក្បាល ប្រជុំគ្នានៅក្នុងបរិវេណរង្វង់មូល នៅលើខឿនក្បូរក្បាច់រចនាខ្មែរយ៉ាងមានភាពទាក់ទាញ ជាទីសក្តារៈបូជាមួយកន្លែង ទាក់ចិត្តភ្ញៀវទេសចរគ្រប់ៗរូបមិនអាចរំលងបានឡើយ នៅពេលបានមកកាន់ទឹកដីនៃស្រុកវាលវែង ខេត្តពោធិ៍សាត់។

វីដេអូចែកចាយពីបណ្តាញសង្គមហ្វេសបុកដោយគេហទំព័រលោក Tan Kimsour បានបង្ហាញពីទិដ្ឋភាពដ៏ស្រស់ស្អាតនៅឯរង្វង់មូលប្រមោយ ដោយភ្ជាប់មកជាមួយនឹងចំណងជើងថា«មានមនុស្សមិនច្រើនទេ ដែលបានស្គាល់ទីនេះ»។

រង្វង់មូលប្រមោយ ប្រសព្វផ្លូវជាតិលេខ៥៥ និងផ្លូវជាតិលេខ១០ ស្ថិតក្នុងឃុំប្រម៉ោយ ស្រុកវាលវែង ខេត្តពោធិ៍សាត់។ កាលពីដើមឡើយទីនេះ គេហៅឈ្មោះថា រង្វង់មូលដំរី៥ ព្រោះតែមានរូបចម្លាក់ដំរីតែ ៥ ប៉ុណ្ណោះ។ ប៉ុន្តែក្រោយមក នៅឆ្នាំ២០២៣ គេក៏បន្ថែមរូបសំណាក់ដំរីព័ទ្ធជុំវិញវង្វង់មូលនោះចំនួន ៥០០ ទៀត ក៏បានដាក់ឈ្មោះទីនោះថាជា រង្វង់មូលដំរី៥០៥ ឬ រង្វង់មូលប្រមោយ។

រង្វង់មូលដំរី៥០៥ ឬ រង្វង់មូលប្រមោយ នៅក្នុងស្រុកវាលវែងនេះ បានក្លាយជានិមិត្តរូបដ៏សំខាន់មួយប្រចាំខេត្តពោធិ៍សាត់ ដែលមិនត្រឹមតែជាទីជាទីសក្ការៈបូជាប៉ុណ្ណោះទេ ប៉ុន្តែវាបានក្លាយជាតំបន់ទេសចរណ៍ដ៏លេចធ្លោ និងជាប្រវត្តិសាស្ត្រនៃខេត្តទៀតផង។

បើតាមរដ្ឋបាលខេត្តពោធិ៍សាត់បានឱ្យដឹងថា និមិត្តរូបនៃដំរីទាំង៥០៥នេះ គឺតំណាងឲ្យភាពអស្ចារ្យទាំង៥៖
ទី១.សត្វដំរីគឺជាសត្វដែលកម្រមាន មាឌធំ ស្លូតបូត ចេះសាមគ្គីគ្នា ចេះជួយគ្នា មិនចោលគ្នា អង់អាចក្លាហាន ជាពិសេសមានភាពត្រជាក់ត្រជុំសុខដុមរមនា។
ទី២.ដោយសារភូមិសាស្ត្រស្រុកវាលវែងមានផ្លូវជាតិលេខ៥៥ ប្រសព្វគ្នាជាមួយផ្លូវជាតិលេខ១០ ត្រង់រង្វង់មូលឆ្ពោះទៅកាន់ឃុំទាំង០៥នៃស្រុកវាលវែង។
ទី៣.ស្រុកវាលវែងមានឈ្មោះភ្នំ១៥០០ ព្រមទាំងមានផ្លូវអន្ទង់អាំង ដែលសម្ដេចតេជោ ហ៊ុន សែន ប្រមុខរាជរដ្ឋាភិបាលប្រសិទ្ធនាមថា”ផ្លូវបុប្ផាលាក់ខ្លួន” មានឈ្មោះបោះសម្លេង ល្បីល្បាញទាំងក្នុងនិងក្រៅប្រទេស មានទេសភាពធម្មជាតិស្រស់ស្អាតគ្មានពីរ ប្រៀបដូចនៅលើឋានសួគ៌។
ទី៤.ស្រុកវាលវែងមានឃុំចំនួន០៥ ហើយឃុំនីមួយៗមានក្រុមប្រឹក្សាចំនួន០៥នាក់,
ទី៥.ស្រុកវាលវែងមានអភិបាលនៃគណៈអភិបាលស្រុកដឹកនាំចំនួន០៥ជំនាន់ ហើយបច្ចុប្បន្ននេះជាអភិបាលស្រុកជំនាន់ទី៥ផងដែរ៕