ឧទ្យានមួយកន្លែងនៅក្នុងប្រទេសថៃ ត្រូវបានកសាងឡើង ដើម្បីបង្ហាញពីភក្តីភាពរបស់ប្រជាជនថៃ ដែលមានចំពោះព្រះមហាក្សត្ររបស់ពួកគេ។ រូបសំណាក់លង្ហិន កម្ពស់ ១៤ ម៉ែត្រ ចំនួន ៧ ដែលតំណាងឲ្យព្រះមហាក្សត្រទាំង ៧ អង្គ ដ៏មានឥទ្ធិពលបំផុតក្នុងប្រវត្តិសាស្រ្តថៃ កំពុងបង្ហាញខ្លួនតាមជើងភ្នំយ៉ាងមានភាពលេចធ្លោ។
ឧទ្យាន Rakabhati (រាជាបាកឌី) ក្នុងទំហំផ្ទៃដី ៣៦ ហិចតា ដែលមានទីតាំងស្ថិតនៅក្នុងស្រុកហ៊ូហ៊ិន ក្នុងខេត្តប្រាជួប ឃីរីខាន់ ប្រទេសថៃ។ ឧទ្យាននេះក៏ត្រូវបានគេចាត់ទុកថាជាសួនកម្សាន្តប្រវត្តិសាស្រ្ត ទេសចរណ៍ និងទីកន្លែងគោរពស្ញប់ស្ញែងចំពោះអតីតស្តេចថៃទាំង៧ ជំនាន់។ ទីនេះត្រូវបានបង្កើតឡើងដោយកងទ័ពភូមិន្ទថៃដោយចំណាយថវិកាប្រមាណនឹង ២៨ លានដុល្លារអាមេរិក ដែលបានដាក់សម្ពោធជាផ្លូវការកាលពីអំឡុងឆ្នាំ២០១៥។
រូបសំណាក់សំរិទ្ធទាំង៧ ដែលតំណាងឲ្យព្រះមហាក្សត្រថៃទាំង ៧អង្គ គឺរួមមាន៖
១ ព្រះបាទរាមខេមហាំង នៃសម័យសុខោទ័យ
២ ព្រះបាទណារ៉េសួន នៃសម័យអយុធ្យា
៣ ព្រះបាទណារៃ នៃសម័យអយុធ្យា
៤ ព្រះបាទតាក់ស៊ីន នៃសម័យថុនបុរី
៥ ព្រះបាទរាមាទី១ នៃសម័យរតនៈកូស៊ីន
៦ ព្រះបាទមងគុត្ត នៃសម័យរតនៈកូស៊ីន
៧ ព្រះបាទជូឡាឡុងកន នៃសម័យរតនៈកូស៊ីន។
កាន់តែអស្ចារ្យ រូបសំណាក់ព្រះមហាក្សត្រថៃទាំង៧អង្គ ដែលបង្ហាញអំពីក្រសែភ្នែកសំឡឹងមើលទៅមុខក្នុងទិសដៅតែមួយយ៉ាងអង់អាច ក្លាហាន ដែលឆ្លុះបញ្ចាំងពីភាពរឹងមាំនៃរបបរាជានិយម និងការការពារប្រទេសបានយ៉ាងមានភាពរុងរឿង តាំងពីអតីតកាល រហូតមកដល់បច្ចុប្បន្ន៕
