មិត្តល្អ! ជប៉ុន ត្រៀមជួយស្តារផ្លូវជាតិលេខ១ តាមសំណើសុំរបស់រដ្ឋាភិបាលកម្ពុជា

នៅកិច្ចប្រជុំពិភាក្សាការងារជាមួយដៃគូអភិវឌ្ឍន៍ ចៃកា (JICA) អំពីគម្រោងស្ថិតក្នុងរបៀងសេដ្ឋកិច្ចភាគខាងត្បូងនៃកម្ពុជា ក្រសួងសាធារណការ និងដឹកជញ្ជូនបានស្នើឱ្យជប៉ុនជួយស្តារកំណាត់ផ្លូវជាតិលេខ ១ ពីភូមិសាស្ត្ររាជធានីភ្នំពេញ ទៅដល់កំពង់ផែស្វយ័តភ្នំពេញ និងការសាងសង់បន្ថែមនូវស្ពានឆ្លងកាត់ទន្លេមេគង្គ ដើម្បីកាត់បន្ថយការកកស្ទះចរាចរណ៍ និងសម្រួលដល់ធ្វើដំណើរ ឬដឹកទំនិញនានា ចេញ-ចូល ឆ្លងកាត់រាជធានីភ្នំពេញ។

ពាក់ព័ន្ធករណីនេះភាគីខាងជប៉ុន ចៃកា (JICA) បានឯកភាពទទួលយកសំណើ ហើយនឹងដាក់ឆ្លងទៅថ្នាក់ដឹកនាំរបស់ខ្លួន។

ជាមួយគ្នានោះផងដែរ ក្រសួងសាធារណការ ក៏បានថ្លែងអំណរគុណដល់ ចៃកា (JICA) ដែលជាតំណាងរដ្ឋាភិបាលជប៉ុន ដែលតែងតែជួយស្តារ និងធ្វើឱ្យប្រសើរឡើងនូវហេដ្ឋារចនាសម្ព័ន្ធនានានៅកម្ពុជានាពេលកន្លងមក។

សូមរម្លឹកដែរថា គម្រោងសាងសង់កំណាត់ផ្លូវលេខ១ ដំណាក់កាលទី៤ មានប្រវែងសរុប ៤ គីឡូម៉ែត្រ គិតចាប់ពីទីប្រជុំជន ត្រង់ចំណុចគល់ស្ពានព្រះមុនីវង្សច្បារអំពៅ ត្រើយខាងកើត ត្រូវបានសម្ពោធដាក់ប្រើប្រាស់ កាលពីថ្ងៃទី១៣ ខែមីនា ឆ្នាំ២០១៨ ក្រោមអធិបតីភាពសម្ដេចតេជោ ហ៊ុន សែន អតីតនាយករដ្ឋ មន្ត្រីកម្ពុជា។

គម្រោងនេះ បានចំណាយថវិកាសរុបជាង ២៣លានដុល្លារ ក្នុងនោះថវិកាប្រមាណជា ១៦លានដុល្លារ ជាជំនួយឥតសំណងរបស់រដ្ឋាភិបាលជប៉ុន និងថវិកា ៧,៨៧លានដុល្លារ ជាថវិកាបដិភាគរបស់រាជរដ្ឋាភិបាលកម្ពុជា សម្រាប់ដោះស្រាយគោលនយោបាយ និងផលប៉ះពាល់៕