បារមីព្រះអង្គចន្ទមុន្នីល្បីរន្ទឺខ្លាំង! ទោះនិមន្តដល់ទីណា ក៏មានញាតិញោមចាំទទួល យករបស់របរមកប្រសិទ្ធីព្រោងព្រាត

ព្រះអង្គ ធម្មវនវាសី ចន្ទមុន្នី នៅក្នុងដំណើរនិមន្តទស្សនកិច្ចទៅកាន់តំបន់ CLV ទទួលបានការគោរពស្រលាញ់ពីញាតិញោមពុទ្ធបរិស័ទរាប់សែននាក់នៅចាំទទួលព្រះអង្គ ដែលបន្ថែមពីនេះក៏មានទាំងដាក់តម្រៀបដបទឹកសុទ្ធ ប្រេងក្រឡា របររបរប្រើប្រាស់ផ្សេងៗ ដើម្បីទទួលបានពរជ័យពីព្រះអង្គផងដែរ។

ក្នុងដំណើរនិមន្តទស្សនកិច្ចរយៈពេលប្រមាណនឹង៥ថ្ងៃកន្លងមកនេះ រាប់ចាប់ពីថ្ងៃទី ២០ ខែសីហាមក ព្រះអង្គ ធម្មវនវាសី ចន្ទមុន្នី គឺបាននិមន្តដល់ខេត្តនានាជាបន្តបន្ទាប់ ដែលក្នុងនោះគឺរួមមានខេត្តក្រចេះ មណ្ឌលគិរី និងរតនគិរីជាដើម ក៏ដូចជាបានទៅពិនិត្យមើលតាមបន្ទាត់ព្រំដែននានានិងសំណេះសំណាលជាមួយព័ទ្ធបរិស័ទទីនោះបានយ៉ាងរលូន។ ហើយនៅថ្ងៃទី ២៥ ខែសីហា ព្រះអង្គបាននិមន្តដល់ទឹកដីនៃខេត្តបាត់ដំបងផងដែរ។

អ្វីជាការកត់សម្គាល់ទោះទៅនិមន្តដល់ទីណាកន្លែងណា ព្រះអង្គតែងទទួលបាននូវការគោរពស្រលាញ់ពីញាតិពុទ្ធបរិស័ទគ្រប់ស្រទាប់វណ្ណៈ ចាំទទួលយ៉ាងច្រើនកុះករ ក៏ដូចជាមានការអមដំណើរពីសំណាក់អភិបាលខេត្ត មន្ត្រី និងអាជ្ញាធរផងដែរ។ មិនត្រឹមតែប៉ុណ្ណេះ ដោយសារតែបារមីរបស់ព្រះអង្គចន្ទមុន្នីដ៏ល្បីរន្ទឺ ដោយសង្កេតឃើញថា ប្រជាជនគ្រប់ៗរូបក្នុងពេលមកទទួលដំណើរនិមន្តរបស់ព្រះអង្គ ពួកគេតែងតែដាក់តម្រៀបរបស់របរប្រើប្រាស់ផ្សេងៗនៅពីមុខខ្លួន ដែលរួមមានទាំងដបទឹកសុទ្ធ ទឹកអប់ ប្រេងខ្យល់ ប្រេងក្រឡា ផ្កាភ្ញីជាដើម ដើម្បីទទួលបានពរជ័យពីព្រះអង្គ ហើយគេជឿជាក់យ៉ាងមុតមាំថា របស់របរទាំងអស់នោះនឹងប្រែក្លាយជាសាកសិទ្ធផងដែរ។

យោងតាមការបញ្ជាក់ពី ព្រះអង្គចន្ទ មុន្នី បានឲ្យដឹងថាគោលបំណងនៃដំណើរនិមន្តទស្សនកិច្ចនេះ គឺដើម្បីចូលរួមដោះស្រាយមន្ទិលសង្ស័យដើម្បីធ្វើអោយប្រាកដប្រជាជុំវិញរឿងបាត់បង់ទឹកដីដោយសារកិច្ចព្រមព្រៀង តំបន់អភិវឌ្ឍន៍ជាមួយវៀតណាមនិងឡាវ។

គួរបញ្ជាក់ថា កាលពីថ្ងៃទី ១៩ខែសីហា យោងតាមប្រសាសន៍ដ៏ខ្ពស់ខ្ពស់របស់សម្តេចតេជោហ៊ុន សែន ដែលបានធ្វើការណែនាំ និងផ្តាំផ្ញើរអោយអាជ្ញាធរក្នុងភូមិសាស្ត្រខេត្តក្រចេះ ខេត្តមណ្ឌលគីរី ខេត្តរតនគិរី និងខេត្តស្ទឹងត្រែង ជួយបង្កលក្ខណៈងាយស្រួលដល់ព្រះអង្គចន្ទមុនី ក្នុងដំណើរនិមន្តទស្សនកិច្ចក្នុងខេត្តទាំង៤ដែលជាប់ពាក់ព័ន្ធនឹងគម្រោង CLV ព្រមទាំងផ្តល់ឲ្យនូវការរក្សាសន្តិសុខ និងសុខភាពប្រគេនព្រះអង្គ៕