តារាចម្រៀង ម៉ង់ ចាន់កញ្ញា អតីតបេក្ខភាព Cambodian Idol រដូវកាលទី២ បានទម្លាយរឿងរ៉ាវក្នុងចិត្តពេញដោយទឹកនេត្រាហើយអ្នកគាំទ្រមួយចំនួននៅពុំទាន់បានដឹងពីបញ្ហារបស់នាងនោះទេ។ កញ្ញា បានទម្លាយថានៅពេលនាងអាយុ៩ឆ្នាំ ម្តាយរបស់នាងពិការជើងហើយត្រូវឪពុករត់ចោលទៀត។ ចំណែកនាងធ្លាប់ត្រូវបានគេប្រើពាក្យមិនសមរម្យអំឡុងពេលនៅជាអ្នកចម្រៀងក្នុងPub ពេលរាត្រី។ ក្រៅពីអាជីពជាអ្នកចម្រៀង ម៉ង់ ចាន់កញ្ញា ក៏មានទេពកោសល្យបញ្ចូលសំឡេងផងដែរ។
ក្នុងសប្តាហ៍ថ្មីនៃកម្មវិធី VTALK ម៉ង់ ចាន់កញ្ញា បានចូលរួមផ្តល់បទសម្ភាសន៍ជាមួយពិធីករ ពិធីការិនីដោយទម្លាយរឿងរ៉ាវមួយចំនួនដែលទស្សនិកជនពុំធ្លាប់បានដឹងពីមុនមកឡើយបន្ទាប់ពីនាងបានច្រៀងនៅលើឆាកស្រែកទ្រហោយំ។ កញ្ញា បានរៀបរាប់ពីមូលហេតុដែលបកស្រាយបទចម្រៀង ស្អប់ម៉ែ ហើយស្រែកទ្រហោយំដោយសារតែបទនេះដូចជីវិតពិតនាងពេក។ កញ្ញា ថាចំណុចដែលដូចនោះគឺនាងមិនចូលចិត្តនៅពេលម្តាយនាងហត់ លំបាក ប៉ុន្តែមិនប្រាប់ការពិត។.png)
តារាចម្រៀងរូបនេះថា នាងឆ្លងកាត់លំបាកជាមួយម្តាយច្រើនណាស់ម្តាយនាងពិការជើងដោយសារតែគ្រោះថ្នាក់ចរាចរណ៍ប៉ុន្តែមិនដែលបោះបង់នាងទេហើយអ្វីដែលធ្វើឱ្យនាងអាណិតម្តាយខ្លាំងនោះគឺមានគ្រោះថ្នាក់ពិការជើងហើយត្រូវបានប្តីក្បត់ចិត្តមានអ្នកថ្មីហើយនៅទីបំផុតឪពុករបស់នាងនៅតែចាកចោលនាងនិងម្តាយនិងបងនាង ពេលនាងមានអាយុ៩ឆ្នាំ។ អ្វីដែលជាការចងចាំបំផុត ម៉ង់ ចាន់កញ្ញា ថានាងបានឃើញម្តាយងើបឡើងអង្គុយយំមិនដឹងរកអ្វីចិញ្ចឹមកូនបើខ្លួនឯងកំពុងធ្លាក់ខ្លួនពិការហើយពេលនោះគឺពឹងលើយាយទាំងស្រុងគាត់ដើរបេះបន្លែយកទៅលក់។
ឆ្លងកាត់ទុក្ខលំបាករាប់មិនអស់ ម៉ង់ ចាន់កញ្ញា បានឡើងមករាជធានីភ្នំពេញរៀនបណ្តើរធ្វើជាអ្នកចម្រៀងតាម Pub បណ្តើរឯម្តាយនៅស្រុកខេត្តកំពង់ឆ្នាំង។ កញ្ញា ថាពេលច្រៀងពេលយប់ជិះម៉ូតូជួនកាលមានអ្នកទះកែបម៉ូតូពីក្រោយធ្វើឱ្យភ័យក៏មាន។ លើសពីនេះការពិបាកមួយទៀតពេលច្រៀងនៅតាម Pub គឺរងពាក្យសម្តីពីភ្ញៀវមិនឱ្យតម្លៃមកនាង ទាំងពាក្យសម្តីគំរាមសុំលេខទូរស័ព្ទ។ នាងពិតជាមានភាពឈឺចាប់នៅពេលនាងមកច្រៀងតែមួយគត់ដើម្បីយកលុយផ្គត់ផ្គង់គ្រួសារបែរជានិយាយដាក់នាងថា «ស្អីជាអ្នកចម្រៀងសោះ»ដែលមិនឱ្យតម្លៃនាង។
មកទល់ពេលនេះ ម៉ង់ ចាន់កញ្ញា បានស្តារស្ថានភាពគ្រួសាររួចផុតការលំបាកជាងមុនហើយមានផ្ទះខ្លួនឯងនៅភ្នំពេញនិងបាននាំម្តាយរស់នៅជាមួយបន្ទាប់ពីឃ្លាតគ្នាអស់រយៈពេលជិត១០ឆ្នាំ។ កញ្ញា ថាដ្បិតថាពេលនេះនាងមិនភាពជោគជ័យខ្លាំងប៉ុន្តែមិនលំបាកដូចកាលពីមុនទេនោះទេ។ កញ្ញា បានលេចមុខនៅតាមកម្មវីធីមង្គលការ ការប្រគំតន្ត្រីនានា និងមានបទចម្រៀងផ្ទាល់ខ្លួននៅក្នុងផលិតកម្មរស្មីហង្សមាស។ បទរបស់ កញ្ញា ដែលទទួលបានការគាំទ្រជាងគេមានចំណងជើងថា «មនុស្សស្រីមិនអន់ទេ»៕
