គ្រប់ភាវៈមានជីវិតទាំងអស់នៅលើផែនដីយើងនេះ គឺសុទ្ធតែមានការកើត ចាស់ ឈឺ ស្លាប់ មិនថាមនុស្ស សត្វ រុក្ខជាតិ ឬក៏ពពួកមីក្រូសារពាង្គកាយណានោះទេ គឺសុទ្ធតែស្ថិតក្នុងវដ្ដសង្សារនេះទាំងអស់។ ប៉ុន្តែដោយឡែកមានសត្វកម្រមួយប្រភេទ ដែលរស់នៅក្នុងមហាសមុទ្រ ត្រូវបានគេចាត់ទុកថា ជាសត្វមានជីវិតអមតៈនោះគឺ Turritopsis doohmii ឬជាទូទៅហៅថាចាហួយអមតៈ។ 
Turritopsis doohmii គឺជាភាវសមុទ្រដែលមានជីវិតអមតៈ ដោយវាមានជីវិតរស់នៅតាំងពីកំឡុងជាង ៥០០ លានឆ្នាំមុនមកម្ល៉េះ នេះបើយោងតាមការចុះផ្សាយរបស់ BBC Earth កាលពីពេលថ្មីៗនេះ។ យោងតាមអ្នកវិទ្យាសាស្រ្តបានពន្យល់ថា Turritopsis doohmii គឺមានរូបរាងដូចជាខ្ញែរសមុទ្រតូចៗធម្មតាដែរ ដែលវាមានទ្រង់ទ្រាយដូចជាកណ្ដឹងប្រវែង ៥ មីលីម៉ែត្រ ឡោមព័ទ្ធដោយពុកមាត់ពិសមិនតិចជាង ៨០សរសៃ រីឯដងខ្លួនរបស់វាមានសភាពថ្លា អាចមើលឃើញឆ្លុះដល់ក្នុងពោះដែលមានពណ៌ក្រហមភ្លឺទៀតផង។ 
ជាទូទៅចាហួយអមតៈច្រើនស៊ីសត្វតូចៗជាអាហារ ជាពិសេសគឺពពួកដង្កូវតែម្តង ដោយពួកវាប្រើពុកមាត់បញ្ចេញពិស ហើយកៀរបញ្ចូលក្នុងមាត់របស់វា។ មាត់របស់សត្វនេះទៀតសោត ក៏ប្រើជាទ្វារធំបញ្ចេញលាមកផងដែរ ចំណែកឯខ្ញែរសមុទ្រញី ក៏ភ្ញាស់ពងតាមទ្វារធំនេះដែរ ក្រោយពីខ្ញែរសមុទ្រឈ្មោលបាញ់ស្ពើមចូលទៅ។ ខ្ញែរសមុទ្រអមតៈពួកវាមិនងាប់នោះទេ ដោយពួកវានឹងប្ដូរខ្លួនទៅជាផូលីពម្ដងទៀត ដោយពុកមាត់របស់វានឹងរួញទៅវិញ រាង្គកាយរបស់វាក៏រួញទៅវិញដែរ ហើយធ្លាក់ទៅបាតមហាសមុទ្រ ដើម្បីផ្ដើមដំណើរជីវិតជាថ្មីម្ដងទៀត។ 
ហេតុនេះកោសិកាដែលធំពេញវ័យរបស់ពួកវា នឹងរលាយទៅជារូបដើមវិញ។ ហើយនៅទីបំផុត ពួកវានឹងត្រលប់ទៅជាក្មេងខ្ចីម្ដងទៀត ហើយវានៅតែរស់នៅបែបនេះម្ដងហើយម្ដងទៀត។ ចំណែកប្រភពរស់នៅរបស់ខ្ញែរសមុទ្រអមតៈនេះវិញ ត្រូវបានគេរកឃើញថាមានច្រើននៅសមុទ្រការីបៀន ទ្វីបអាមេរិកកណ្ដាល ប៉ុន្តែវាមិនមែនជាអាហារ សម្រាប់មនុស្សយកទៅបរិភោគ ដើម្បីបង្កើនអាយុ ឬសម្រាប់ធ្វើឱ្យជីវិតអមតៈនោះទេ ព្រោះប្រសិនបើយើងញ៉ាំវានឹងធ្វើឱ្យរមាស់ពេញរាងកាយតែម្តង៕
