បន្លែជាទូទៅគឺមានកាឡូរីខ្ពស់ជាងសាច់ ប្រសិនបើអ្នកញ៉ាំបន្លែច្រើនពេកអាចនឹងឡើងទម្ងន់។ ទោះជាយ៉ាងណាបន្លែ ៥ មុខខាងក្រោមនេះគឺមានកាឡូរីទាបណាស់ ដូច្នេះទោះអ្នកញ៉ាំច្រើនបែបណាក៏មិនធ្វើឱ្យអ្នកធាត់ដែរ។ បន្លែទាំងនេះអាចរកបានយ៉ាងងាយស្រួលនៅតាមផ្សារ តម្លៃសមរម្យ សម្បូរទៅដោយវីតាមីន និងសារធាតុរ៉ែដែលរាងកាយត្រូវការ។ ក្រៅពីជួយឱ្យយើងឆ្អែតបានយូរ វាក៏ជួយឱ្យអ្នកស្រកទម្ងន់បានយ៉ាងមានប្រសិទ្ធភាពផងដែរ។
១.ស្ពៃក្តោប៖ គឺជាបន្លែដែលមានកាឡូរីទាបបំផុតត្រឹមតែ ១២ កាឡូរីក្នុងមួយដុំប៉ុណ្ណោះ។ វាក៏សម្បូរទៅដោយជាតិសរសៃអាហារ និងវីតាមីនផ្សេងៗ ដែលជួយឱ្យអ្នកមានអារម្មណ៍ឆ្អែតបានយូរ ក៏ដូចជាជួយឱ្យចំណង់អាហារថយចុះ ហើយក៏ល្អសម្រាប់ប្រព័ន្ធរំលាយអាហារផងដែរ។
២.ប៉េងប៉ោះ៖ ប៉េងប៉ោះគឺមានកាឡូរីត្រឹមតែ ១៧.៧ កាឡូរីដែលវាសម្បូរទៅដោយវីតាមីន និងសារធាតុរ៉ែជាច្រើន។ មិនត្រឹមតែជួយឱ្យស្បែកមុខភ្លឺថ្លាប៉ុណ្ណោះទេ វាក៏ជួយដល់ប្រព័ន្ធរំលាយអាហារផងដែរ ធ្វើឱ្យអ្នកមានអារម្មណ៍ស្រស់ស្រាយ មិនធ្ងន់ក្បាលពោះ ស័ក្តិសមសម្រាប់អ្នកដែលកំពុងគ្រប់គ្រងទម្ងន់។
៣.សាឡាត់៖ មានកាឡូរីត្រឹមតែ ១៨.៤ ប៉ុណ្ណោះក្រៅពីមានរសជាតិឆ្ងាញ់ស្រួយ វាក៏ជួយឱ្យប្រព័ន្ធរំលាយអាហារដំណើរការបានល្អ ការពារ និងបំបាត់ការទល់លាមកបានយ៉ាងមានប្រសិទ្ធភាព។
៤.ល្ពៅ៖ មានកាឡូរីត្រឹមតែ ២០ កាឡូរីប៉ុណ្ណោះ ដែលវាសម្បូរទៅដោយជាតិសរសៃអាហារ ជួយឱ្យអ្នកមានអារម្មណ៍ឆ្អែតបានយូរ សក្តិសមសម្រាប់អ្នកដែលកំពុងគ្រប់គ្រងទម្ងន់។ លើសពីនេះល្ពៅក៏ល្អសម្រាប់ស្បែក និងភ្នែកផងដែរ ក៏ដូចជាមានអត្ថប្រយោជន៍ច្រើនអាចយកទៅធ្វើម្ហូបបានទាំងរសជាតិឆ្ងាញ់ និងបង្អែម។
៥.ខាត់ណា៖ គឺជាបន្លែបៃតងដែលមានកាឡូរីត្រឹមតែ ២២.៥ កាឡូរីប៉ុណ្ណោះ ជាបន្លែមានជាតិសរសៃខ្ពស់ ជួយឱ្យប្រព័ន្ធរំលាយអាហារដំណើរការបានល្អឥតខ្ចោះ និងជួយកាត់បន្ថយបញ្ហាទល់លាមក។ ទោះជាយ៉ាងណាដើម្បីសុខភាពល្អ អ្នកគួរញ៉ាំបន្លែប្រភេទផ្សេងទៀតផង ដើម្បីឱ្យរាងកាយទទួលបានអាហាររូបត្ថម្ភពេញលេញ៕
