លោកអ្នកឧកញ៉ាតែម្នាក់គត់ ដែលបោះទុនវិនិយោគក្នុងគម្រោងព្រែកជីកហ្វូណនតេជោ

នៅក្នុងគម្រោងជាប្រវត្តិសាស្ត្រ នៃការសាងសង់ព្រែកជីកហ្វូណនតេជោ មានក្រុមហ៊ុនដល់ទៅ៤ ដែលបានបណ្ដាក់ទុនវិនិយោគលើគម្រោងនេះ។

ក្នុងចំណោម៤នោះ មាន៣ជាក្រុមហ៊ុនក្នុងស្រុក គឺក្រុមហ៊ុនកំពង់ផែស្វយ័តក្រុងភ្នំពេញ ក្រុមហ៊ុនគ្រប់គ្រងកំពង់ផែក្រុងព្រះសីហនុ និងក្រុមហ៊ុនOCIC ដែលស្ថិតក្រោមការគ្រប់គ្រងរស់លោកអ្នកឧកញ៉ាពុងឃាវ សែ។

ចំណែកមួយក្រុមហ៊ុនទៀត ជាក្រុមហ៊ុនចិន CRBC ដែលជាក្រុមហ៊ុនកំពុងសាងសង់ផ្លូវល្បឿនលឿនភ្នំពេញ បាវិត និងកំពុងសិក្សាគម្រោងផ្លូវល្បឿនលឿនភ្នំពេញ សៀមរាប ប៉ោយប៉ែត ។

បើតាមឯកឧត្តមស៊ុន ចាន់ថុល ឧនាយករដ្ឋមន្ត្រី និងជាប្រធានគណៈកម្មការគ្រប់គ្រងការសាងសង់គម្រោងព្រែកជីកហ្វូណនតេជោ បានបញ្ជាក់ថាគម្រោងវិនិយោគលើព្រែកជីកហ្វូណនតេជោត្រូវបានបែងចែកជាពីរកំណាត់។
ក្នុងនោះកំណាត់ទី១ពីព្រែកតាកែវនៃដៃទន្លេមេគង្គទៅព្រែកពោធិ៍ដៃទន្លេបាសាក់ ប្រវែងប្រមាណ២៦គីឡូម៉ែត្រ គឺជាការវិនិយោគដោយក្រុមហ៊ុនក្នុងស្រុក១០០ភាគរយ ។

រីឯកំណាត់ទី២ ដែលមានចម្ងាយ១៥៩គីឡូមែត្រ ពីទន្លេបាសាក់ ខេត្តតាកែវ រហូតដល់សមុទ្រខេត្តកែប និងត្រូវវិនិយោគរួមគ្នារវាងសហគ្រាសសាធារណៈ ក្រុមហ៊ុនក្នុងស្រុក និងក្រុមហ៊ុនសាជីវកម្មស្ពាននិងថ្នល់៕