តារាចម្រៀងដ៏មានប្រជាប្រិយភាព ពេជ្រ សូលីកា ត្រូវបានហ្វេនៗកត់សម្គាល់ថារាល់ពេលទម្លាក់បទមនោសញ្ចេតនាម្តងៗគឺត្រូវចិត្តមិត្តៗយុវវ័យទទួលបានការគាំទ្រយ៉ាងច្រើនពីទស្សនិកជន។ ជាក់ស្តែងថ្មីៗនេះបទថ្មីរបស់ សូលីកា ជាប់លេខ១មានការស្តាប់ច្រើននៅលើឆាណែលយូធូប។ នេះបញ្ជាក់ឱ្យឃើញថាទោះបីជា ពេជ្រ សូលីកា មិនមានផលិតកម្មធំជ្រកកោនជាខ្នងបង្អែកក្តីប៉ុន្តែប្រជាប្រិយភាពរបស់តារាចម្រៀងរូបនេះនៅតែរក្សាបានមានការស្តាប់រាប់លានដង។
កាលពីថ្ងៃទី២៦ ខែកក្កដា ឆ្នាំ២០២៤ តារាចម្រៀង ពេជ្រ សូលីកា បានទម្លាក់បទថ្មីមានចំណងជើងថា «ថែការចងចាំ» ដែលជាបទមនោសញ្ចេតនាឈឺចាប់ នៅតែព្រួយបារម្ភសុខទុក្ខរបស់គេ និងចងចាំតែម្នាក់ឯង ហើយគ្មានអ្នកផ្សេងមកជំនួសស្នេហាមួយនេះបាន។ មួយបទនេះកំពុងតែទទួលបានការគាំទ្រពីទស្សនិកជនមានការស្តាប់ជាង៣០០Kហើយនៅលើឆាណែលយូធូបរបស់ ពេជ្រ សូលីកា។ គិតត្រឹមរសៀលថ្ងៃទី៣០ កក្កដា នេះ ថែការចងចាំបន្តជាប់ Trending លេខ១ នៅលើយូធូបប្រទេសកម្ពុជាដែលមានការស្តាប់ច្រើនជាងគេបង្អស់។
បទរបស់ ពេជ្រ សូលីកា ទទួលបានការសរសើរយ៉ាងច្រើនមានទាំងអ្នកខ្លះបង្ហាញថាដូចជារឿងរបស់ខ្លួនជាដើម។ មិនត្រឹមតែបទថ្មីទើបតែទម្លាក់នេះទទួលបានការគាំទ្រប៉ុណ្ណោះប៉ុន្តែបទចម្រៀងជាច្រើនទៀតរបស់ ពេជ្រ សូលីកា ទទួលបានការគាំទ្រដូចគ្នាដោយបទទាំងនោះបានចេញនៅលើឆាណែលយូធូបផ្ទាល់ខ្លួនមិនមែនចេញនៅក្រោមផលិតកម្មធំនោះទេ។ បទល្បីៗដែល ពេជ្រ សូលីកា បន្តអាជីពដោយមិនមានផលិតកម្មជ្រកកោនទទួលបានការគាំទ្រមានដូចជា «ហេតុអ្វីយើងបែកគ្នា?» , «ស្នាមបេះដូង» «គ្មានឱកាស» «ផ្កាឈូកកំសត់» និងបទជាច្រើនទៀតសុទ្ធតែមានការស្តាប់រាប់លានដង។ 
ក្រៅពីទីផ្សារចម្រៀង ពេជ្រ សូលីកា ក៏ក្តោបឱកាសធ្វើជា BA ផលិតផលមួយចំនួនផងដែរ ថែមទាំងបណ្តុះបណ្តាលប្អូនស្រីដើរលើវិថីសិល្បៈដូចគ្នាទៀត។ នេះបញ្ជាក់ឱ្យឃើញថា ទោះបីជាពេលនេះ ពេជ្រ សូលីកា លែងមានផលិតកម្មធំជាខ្នងបង្អែកប៉ុន្តែអ្នកចម្រៀងរូបនេះនៅតែរក្សាប្រជាប្រិយភាពរបស់ខ្លួនបានដដែល។ ក្រៅពីកិច្ចការសិល្បៈ ពេជ្រ សូលីកា ក៏ខ្នះខ្នែងធ្វើកិច្ចការសប្បុរសធម៌ រួមទាំងចូលរួមការងារសង្គមក្លាយជាសមាជិកសមាគមកាយឫទិ្ធនារីកម្ពុជាមួយរូបផងដែរ៕
