ការផលិតវីដេអូធ្វើម្ហូបឱ្យអ្នកភូមិបរិភោគធ្វើឱ្យភូមិនេះល្បីល្បាញខ្លាំងក្នុងបណ្តាញសង្គម

ប្រទេសបង់ក្លាដែស ៖ សារព័ត៌មាន KBN សូមនាំលោកអ្នកទៅមើលភូមិមួយនៅប្រទេសបង់ក្លាដែស ដែលភូមិនេះល្បីល្បាញយ៉ាងខ្លាំងនៅក្នុងយូធូប (YouTube) និងមានអ្នកតាមដានរហូតដល់ជាង៤លាននាក់ ។ ភាពល្បីល្បាញនេះ ដោយសារអ្នកភូមិបានបង្ហាញពីការធ្វើម្ហូបជាទ្រង់ទ្រាយធំក្នុងយូធូប ។ ចង់ដឹងអត់ថា តើអ្នកភូមិនេះធ្វើម្ហូបតាមវិធីណាខ្លះ?

ភូមិមួយនៅប្រទេសបង់ក្លាដែស ល្បីល្បាញយ៉ាងខ្លាំងក្នុងយូធូប ដោយសារការបង្កើតមាតិកាទាក់ទាញចំណាប់អារម្មណ៍អ្នកមើលយ៉ាងខ្លាំង ។ នៅក្នុងវីដេអូនីមួយៗបានបង្ហាញពីការធ្វើម្ហូបអាហារជាទ្រង់ទ្រាយធំជាច្រើនមុខ ដូចជាការធ្វើម្ហូបក្នុងពិធីជប់លៀងដែរ ។ លើសពីនេះ ក្នុងវីដេអូបានបង្ហាញតាំងពីការចាប់ផ្តើមដើររកបន្លែបង្ការ ឬគ្រឿងផ្សំ រហូតដល់ពេលចម្អិន ។

ម្ចាស់វីដេអូដែលបង្កើតមាតិកាចម្អិនម្ហូបអាហារទ្រង់ទ្រាយធំនេះឈ្មោះ Delwar Hussain បានបង្ហោះវីដេអូក្នុងយូធូបឈ្មោះ «AroundMeBD» និងមានអ្នកតាមដានរហូតដល់ជាង៤លាននាក់ ។ ពីដំបូង Hussain និងក្រុមការងាររបស់ខ្លួន បានផលិតវីដេអូការចម្អិនអាហារសម្រាប់តែក្នុងភូមិប៉ុណ្ណោះ ហើយពុំនឹកស្មានថា វីដេអូទាំងនេះទទួលបានការចាប់អារម្មណ៍យ៉ាងខ្លាំង រហូតដល់មានអ្នកទស្សនារាប់សែន ឬរាប់លាននាក់ ក្រោយពេលបង្ហោះវីដេអូចូលយូធូបរយៈពេលខ្លី ។

ពេលផលិតវីដេអូដំបូង ក្រុមការងារបានធ្វើតាមសមត្ថភាពនិងចំនួនប្រាក់ដែលមាន ហើយពេលថតវីដេអូរួច ពួកគេបានចំណាយពេលជិះរថយន្ត ចាប់ពី៦ម៉ោង ទៅ១២ម៉ោង ចេញពីភូមិទៅកាន់ទីក្រុងថាកា ដើម្បីប្រើប្រាស់អ៊ីនធើរណេតក្នុងហាងកាត់តវីដេអូ និងបង្ហោះវីដេអូចូលយូធូប ។ Hussain ប្រាប់ថា ភូមិនេះស្ថិតនៅឆ្ងាយដាច់ស្រយាល និងគ្មានសេវាអ៊ីនធើរណេតប្រើប្រាស់ទេ ទើបចំណាយពេលជិះរថយន្តមកទីក្រុងថាកា ។

ពេលយូធូបឈ្មោះ «AroundMeBD» ទទួលបានប្រាក់ចំណូលកាន់តែច្រើន Hussain ជាម្ចាស់យូធូប ក៏បានយកប្រាក់ចំណូលនេះទៅទិញបន្លែបង្ការ ត្រីសាច់ និងគ្រឿងផ្សំទុកឱ្យអ្នកភូមិធ្វើម្ហូប ដើម្បីចែកក្មេងៗ និងមនុស្សចាស់ក្នុងភូមិរាប់រយនាក់បានបរិភោគឆ្ងាញ់ ។ ក្រៅពីនេះ Hussain ក៏បានយកប្រាក់មួយចំនួនទៅទិញឧបករណ៍សម្រាប់ថត និងផលិតវីដេអូ ក៏ដូចជាផ្តល់ប្រាក់ឱ្យអ្នកភូមិចំនួន៥០នាក់ ទុកឱ្យពួកគេធ្វើម្ហូបកាន់តែមានទ្រង់ទ្រាយធំជាងមុន ។

ប្រាក់ចំណូលពីយូធូបខ្លះទៀត Hussain បានប្រគល់ទៅឱ្យមន្ទីរពេទ្យសម្រាប់ជាថ្លៃព្យាបាលមនុស្សចាស់ៗដែលមកជួយចម្អិនអាហារ និងសម្រាប់ទុកជួសជុលផ្ទះខូចខាតដោយសារភ្លើងឆេះព្រៃផងដែរ ។ បច្ចុប្បន្ន យូធូបរបស់ Hussain ទទួលបានការពេញនិយមយ៉ាងខ្លាំងនៅលើពិភពលោក រហូតដល់មានអ្នកភូមិផ្សេង និងជនបរទេសបានធ្វើដំណើរមកមើលការធ្វើម្ហូបក្នុងភូមិទៀតផង ៕