ប្រទេសអង់គ្លេស ៖ រូបភាពបឹងមានទឹកពណ៌ខៀវនេះ គឺមនុស្សភាគច្រើនពុំធ្លាប់បានឃើញ និងពុំធ្លាប់ស្គាល់ពីមុនទេ ។ បើយើងឃើញរូបភាពស្អាតៗរបស់វា យើងមុខជាចង់ទៅកម្សាន្តនៅទីនេះឱ្យបានម្តងក្នុងមួយជីវិតមិនបាន ប៉ុន្តែគួរតែប្រយ័ត្នបន្តិចចំពោះរូបភាពស្អាតដែលបានឃើញនេះ ។
បឹង «Blue Lagoon» ឬមានឈ្មោះមួយទៀតថា «បឹងពុល» ស្ថិតនៅទីក្រុង Buxton ប្រទេសអង់គ្លេស គឺជាបឹងមួយមានទឹកពណ៌ខៀវថ្លាគួរឱ្យចង់ងូតខ្លាំងណាស់ ហើយថែមទាំងមានបរិយាកាសល្អនៅជុំវិញទៀតផង ។ ប៉ុន្តែភាពស្រស់ស្អាតនេះ គ្រាន់តែជារូបភាពបំភាន់ភ្នែកប៉ុណ្ណោះ ដោយសារនៅបាតបឹងសម្បូរទៅដោយជាតិពុល និងមានគ្រោះថ្នាក់ខ្លាំងដល់សុខភាពហួសពីការស្មាន ។
បើយើងសង្កេតមើលបឹងនេះឃើញថា វាមានទឹកពណ៌ខៀវបែបធម្មជាតិ ទើបធ្វើឱ្យបឹងនេះទាក់ទាញចំណាប់អារម្មណ៍ភ្ញៀវទេសចរយ៉ាងខ្លាំង ដែលបានធ្វើដំណើរឆ្លងកាត់ទីនេះ ។ ប៉ុន្តែតើមានភ្ញៀវទេសចរណាខ្លះជ្រាបថា បឹងនេះនឹងផ្តល់គ្រោះថ្នាក់ដល់ភ្ញៀវទេសចរយ៉ាងខ្លាំង ។ បឹង Blue Lagoon មានកម្រិត Ph ខ្ពស់ខ្លាំងរហូតដល់១១.៣ (វាជារង្វាស់ជាតិអាស៊ីតរបស់ទឹក) ។
ពលរដ្ឋរស់នៅក្នុងតំបន់នេះបានដឹងយ៉ាងច្បាស់ថា វាជាបឹងពោពេញទៅដោយកំទេចកំទីរថយន្ត, ខ្មោចសត្វ, កាកសំណល់ចេញពីរាងកាយមនុស្ស និងសំរាមយ៉ាងច្រើនសន្ធឹកសន្ធាប់ ។ ហេតុនេះ បើយើងចុះទៅងូតទឹកបឹង មានន័យថា យើងកំពុងតែងូតទឹកកខ្វក់សម្បូរទៅដោយខ្មោចសត្វ, កាកសំណល់ស្អុយ និងពោរពេញដោយសារធាតុអាម៉ូញាក់ ។ រីឯមូលហេតុធ្វើឱ្យទឹកបឹងមានពណ៌ខៀវថ្លាបែបនេះ គឺវាកើតឡើងដោយសារភ្នំថ្មនៅព័ទ្ធជុំវិញ ។
ហេតុនេះ ផ្ទៃទឹកថ្លាដ៏ស្រស់ស្អាតរបស់បឹង ហាក់ដូចជាបោកប្រាស់ភ្នែកភ្ញៀវទេសចរដែលបានធ្វើដំណើរឆ្លងកាត់ទីនេះ ដើម្បីឱ្យពួកគេចង់ចុះងូតទឹកលេង និងពុំចាប់អារម្មណ៍ពីការដាក់ស្លាកសញ្ញាបញ្ជាក់ថា ជាតំបន់គ្រោះថ្នាក់ ។ អ្នកងូតទឹកបឹងនេះភាគច្រើនមានបញ្ហារមាស់ស្បែក, ឈឺភ្នែក, ឈឺពោះ និងឆ្លងមេរោគផ្សេងៗ ។
សរុបមក បឹងដ៏គ្រោះថ្នាក់នេះ គឺជាឧទាហរណ៍មួយយ៉ាងល្អសម្រាប់ឱ្យយើងគ្រប់គ្នាដឹងថា អ្វីៗដែលមានភាពស្រស់ស្អាតនៅផ្នែកខាងក្រៅ គឺអាចមានគ្រោះថ្នាក់យ៉ាងខ្លាំងនៅផ្នែកខាងក្នុង ៕
