ទីបំផុត MV បទថ្មីរបស់ក្រុមតន្រ្តីកូរ៉េខាងត្បូង HYUKOH ជាមួយ Sunset RollerCoaster បានទម្លាក់ជាផ្លូវការហើយ ខណៈ MV មួយបទនេះថតនៅប្រទេសកម្ពុជាដោយបានបង្ហាញរូបភាពស្រស់ស្អាតជាច្រើននៅតំបន់ប្រាសាទអង្គរវត្ត។ មិនត្រឹមតែប៉ុណ្ណោះតារាសម្តែង Cho Hyun Chul ដែលមានវត្តមាននៅក្នុង MV បានកោតសរសើរប្រទេសកម្ពុជាពេញៗមាត់ថា មានប្រជាជនមានស្នាមញញឹមស្រស់ស្អាត ពេលលោកមកដល់ទីនេះ ប្រៀបដូចជាលោកកើតនៅប្រទេសកម្ពុជា។
នៅល្ងាចថ្ងៃទី១០ ខែកក្កដា HYUKOH ក្រុមតន្រ្តីរបស់កូរ៉េខាងត្បូងរួមជាមួយ Sunset RollerCoaster បានសហការគ្នាចេញស្នាដៃថ្មីមានចំណងជើងថា «GLUE» ខណៈ MV មួយបទបានបង្ហាញពីទិដ្ឋភាពទាំងស្រុងនៅប្រទេសកម្ពុជាគឺនៅខេត្តសៀមរាប។ មុននឹងឈានចូលដល់បទចម្រៀងគេបានបង្ហាញពីតារាសម្តែង Cho Hyun Chul កំពុងស្ថិតនៅប្រាសាទអង្គរវត្តបាននិយាយត្រួសៗពីប្រទេសកម្ពុជាថាប្រទេសយើងមានស្នាមញញឹមដ៏ស្រស់ស្អាត ដោយតារាប្រុសរូបនេះពាក់អាវយឺតរូបព្រះបាទជ័យវរ្ម័នទី៧។
តារាសម្តែងក្នុង MV នេះបានបង្ហាញពីភាពរីករាយរបស់ខ្លួន រត់លេងយ៉ាងសប្បាយនៅបរិវេនប្រាសាទអង្គរវត្ត។ លោកក៏បាននិយាយទៀតថា ប្រជាជនកម្ពុជាមានចិត្តល្អ ជាអ្នកគោរពសាសនាព្រះពុទ្ធ លោកបានតថ្លៃអាវយឺតដែលមានតម្លៃ៥ដុល្លារបញ្ចុះតម្លៃនៅសល់៤ដុល្លារ។ Cho Hyun Chul បាននិយាយទៀតថា លោកមានអារម្មណ៍ប្រទេសកម្ពុជាដូចជាស្រុកកំណើតលោកហាក់ដូចជាលោកបានកើតនៅទីនេះ មានអារម្មណ៍ថាស្ងប់ពេលនៅទីនេះ ឃើញស្នាមញញឹមអ្នកនៅទីនេះ។.png)
បន្ទាប់ពីការរៀបរាប់របស់តារាសម្តែងរូបនេះហើយបទចម្រៀងក្រុមតន្រ្តី HYUKOH ជាមួយ Sunset RollerCoaster ក៏បានមកដល់ដោយរូបភាពនៅក្នុង MV បានបង្ហាញពីទិដ្ឋភាពស្រស់ស្អាតនៃប្រាសាទបាយ័ន ដោយបានបង្កើតចលនាយ៉ាងគួរឱ្យទាក់ទាញទៅតាមបារ៉ូលចម្រៀង។ ក្រៅពីប្រាសាទបាយ័ន MV នេះក៏បានបង្ហាញពីទិដ្ឋភាពដ៏ខៀវស្រងាត់ព្រៃព្រឹក្សា សម្រស់ធម្មជាតិរបស់ប្រទេសកម្ពុជា ប្រាសាទតាព្រហ្ម រូបចម្លាក់ផ្សេងៗ ទឹកជ្រោះជាដើម។
ឃើញមានការពេញចិត្តពីសំណាកតារាកូរ៉េ រួមទាំងបង្ហាញប្រាសាទរបស់ប្រទេសកម្ពុជាគ្មានពីរនៅលើលោកបង្ហាញនៅក្នុង MV នេះអ្នកគាំទ្រកម្ពុជាបានចូលទៅខម្មិនអរគុណបង្ហាញពីការស្រលាញ់ដែលមានឱ្យមកប្រទេសកម្ពុជាផងដែរ៕
