កាលពីថ្ងៃទី ១ ខែកក្កដា ឆ្នាំ២០២៤នេះ យោងតាមការ Live នៅលើគេហទំព័រហ្វេសបុកផេកផ្លូវការរបស់លោកជំទាវហ៊ុន ស៊ីណាត បានធ្វើការបកស្រាយវិភាគទៅលើបញ្ហាផ្សេងៗនៅក្នុងសង្គមខ្មែរ។ ជាមួយគ្នានោះដែរ លោកជំទាវក៏បានសង្កត់ធ្ងន់ៗទៅបញ្ហារឿងវិនិយោគិនធំៗ ដែលចង់មករកស៊ីបណ្តាក់ទុកនៅកម្ពុជា។ លោកជំទាវបានបង្ហើបចំៗពីមូលហេតុចំបងៗដែលធ្វើអោយអ្នកវិនិយោគទុន តែងតែបាត់បង់ទំនុកចិត្តក្នុងការវិយោគនៅប្រទេសកម្ពុជាយើង លោកជំទាវមានប្រសាសន៍ថា ក៏ព្រោះតែមានមន្ត្រីក្រោមថ្នាក់មួយចំនួនបានប្រព្រិត្តិអំពើពុ.ករលួយ។
តាមរយៈការ Live នៅត្រង់នាទីទី ៤៨ លោកជំទាវបានរៀបរាប់សង្កត់ធ្ងន់ៗថា «កាលគ្រាមួយ នៅពេលដែលលោកជំទាវបានទៅដល់ប្រទេសថៃ ក៏បានជួបនឹងថៅកែចិនមា្នក់ ហើយក៏សាកសួរ ហេតុអ្វីក៏មកថៃដែរ? មករកស៊ីវិនិយោគទាំងនៅខ្មែរនិងថៃមែនដែរឬទេ? ថៅកែចិននោះឆ្លើយថា «គាត់លែងទៅស្រុកខ្មែរហើយ ដោយសារតែខ្មែរធ្វើស៊ីគាត់ពេក» ។ 
លោកជំទាវបានបន្តទៀតថា «ចំពោះរឿងទាក់ទាញវិនិយោគិនពីបរទេសមកកម្ពុជានេះ គឺថ្នាក់ដឹកនាំជាន់ខ្ពស់ លោកប្រឹងប្រែងណាស់ តែងខ្នះខ្នែង អំពាវនាវជនបរទេសមកវិនិយោគនៅកម្ពុជាបានយ៉ាងច្រើនផុសផុល។ ដោយឡែកថ្នាក់ក្រោមមួយចំនួនទៅវិញទេ ពូកែខាងចាត់ចែងរឿងទឹកតែរួចជាស្រេច ទាំងដែលមិនទាន់នឹងទទួលបានលទ្ធផលអ្វីផងនោះ ហើយក៏សូមមេត្តាបញ្ឈប់នូវរាល់ទង្វើទឹកតែលើតុក្រោមតុ ខណៈទង្វើនេះហាក់មិនសមទំនងទាល់តែសោះ»។
លោកជំទាវលើកឡើងទៀតថា «ទាក់ទិននឹងបញ្ហាការបាត់បង់ទំនុកចិត្តពីវិនិយោគិនបរទេសនេះ នឹងធ្វើឲ្យជនបរទេសមិនហ៊ានមកបណ្តាក់ទុននៅក្នុងប្រទេសយើងនោះទេ ខណៈគេនឹងទៅបណ្តាក់ទុកនៅថៃឬក៏វៀតណាមជំនួសវិញ ស្របពេលដែលវានឹងជះឥទ្ធិពលជាវិជ្ជមានដល់កំណើនសេដ្ឋកិច្ចជាតិ ក៏ជាការជួយជំរុញកំណើនភ្ញៀវទេសចរក្នុងប្រទេសគេកាន់តែខ្លាំងឡើងផងដែរ»៕
