តៃវ៉ាន់ហាមពលរដ្ឋធ្វើដំណើរទៅចិន ក្រោយចិនកំណត់វិធានការបែបនេះ

តៃវ៉ាន់ ៖ កាលពីថ្ងៃទី២៧ ខែមិថុនា ឆ្នាំ២០២៤ សារព័ត៌មានរ៉យទ័ររាយការណ៍ថា អាជ្ញាធរតៃវ៉ាន់បានដាស់តឿនពលរដ្ឋរបស់ខ្លួនដែលចង់ធ្វើដំណើរទៅប្រទេសចិន គួរតែផ្អាកការធ្វើដំណើរបណ្តោះអាសន្នសិន ប្រសិនបើពុំចាំបាច់ ។ ការដាស់តឿនរបស់អាជ្ញាធរតៃវ៉ាន់ គឺក្រោយពីកាលពីពេលថ្មីៗនេះ ចិនបានគំរា.ម ប្រហា.រ ជីវិ.ត ពលរដ្ឋតៃវ៉ាន់ណាដែលគាំទ្រឯករាជ្យរបស់តៃវ៉ាន់ ។

លោក Liang Wenjie មន្ត្រីនាំពាក្យការិយាល័យកិច្ចការដីគោករបស់តៃវ៉ាន់ និយាយថា ចាប់ពីចុងខែមិថុនា ឆ្នាំ២០២៤ ពលរដ្ឋតៃវ៉ាន់ពុំគួរធ្វើដំណើរទៅប្រទេសចិន, ហុងកុង និងម៉ាកាវ ទេ ។ លោកបន្តថា ការដាស់តឿននេះ គឺដើម្បីទប់ស្កាត់ការគំរាមកំហែងអាយុជីវិតដល់ពលរដ្ឋតៃវ៉ាន់ដែលធ្វើដំណើរទៅចិន ក្រោយពីចិនបានកំណត់វិធានការជាច្រើនដើម្បីពង្រឹងសន្តិសុខជាតិ ។

លោកបន្ថែមថា បើពុំចាំបាច់ទេ ពលរដ្ឋតៃវ៉ាន់កុំធ្វើដំណើរទៅប្រទេសចិនដាច់ខាត ហើយការដាស់តឿនរបស់អាជ្ញាធរតៃវ៉ាន់នេះ មិនមែនជាការហាមឃាត់ការធ្វើដំណើរទៅចិនទេ ប៉ុន្តែវាជាវិធានការដើម្បីការពារសុវត្ថិភាពរបស់ពលរដ្ឋតៃវ៉ាន់ ។ ម្យ៉ាងទៀត ពលរដ្ឋតៃវ៉ាន់អាចក្លាយជាឧបករណ៍របស់ចិនដាក់សម្ពាធមកលើតៃវ៉ាន់ ។

ពេលប្រព័ន្ធផ្សព្វផ្សាយសួរថា វិធានការចុងក្រោយរបស់តៃវ៉ាន់ អាចពុំផ្តល់លទ្ធផលវិជ្ជមានដល់ទំនាក់ទំនងរវាងតៃវ៉ាន់និងចិន លោក Liang Wenjie និយាយថា វិធានការនេះ គឺផ្តោតទៅលើពលរដ្ឋដែលគាំទ្រឯករាជ្យរបស់តៃវ៉ាន់ តាមរយៈពាក្យសម្តី និងទង្វើ ហើយមានចំនួនតិចតួចណាស់ ។

ចំពោះបញ្ហាពលរដ្ឋតៃវ៉ាន់ ដែលចិនយល់ឃើញថា ជាបុគ្គលបែងចែកទឹកដីតៃវ៉ាន់ចេញពីចិន ហើយចិនអាចចាប់ខ្លួនពលរដ្ឋតៃវ៉ាន់នៅប្រទេសផ្សេងទៀត និងបញ្ជូនទៅចិន តាមការស្នើសុំរបស់រដ្ឋាភិបាលចិន លោក Liang Wenjie និយាយថា ការបែងចែកទឹកដីរវាងតៃវ៉ាន់ និងចិន គឺជាការចោទប្រកាន់ផ្នែកនយោបាយ ។ ប្រទេសអភិវឌ្ឍន៍នានាពុំគួរសហការជាមួយចិនដើម្បីចាប់ខ្លួនពលរដ្ឋតៃវ៉ាន់ទេ ។ ប៉ុន្តែបើប្រទេសណាមួយសហការជាមួយចិន តៃវ៉ាន់ពុំអាចហាមឃាត់បានឡើយ ។

ប្រធានាធិបតីថ្មីរបស់តៃវ៉ាន់ លោក Lai Ching-te បានព្យាយាមចរចាជាមួយចិន ប៉ុន្តែចិនបដិសេធ ពីព្រោះចិនចាត់ទុកថា ប្រធានាធិបតីថ្មីតៃវ៉ាន់រូបនេះមានគំនិតបែងចែកទឹកដីតៃវ៉ាន់ចេញពីចិន ។ កន្លងមក ប្រធានាធិបតីថ្មីតៃវ៉ាន់ពុំព្រមទទួលស្គាល់ថា តៃវ៉ាន់ជាទឹកដីមួយផ្នែករបស់ចិន ដោយលោកនិយាយថា មានតែពលរដ្ឋតៃវ៉ាន់ប៉ុណ្ណោះ ទើបមានសិទ្ធិកំណត់អនាគតរបស់តៃវ៉ាន់ ៕