ការធ្វើលំហាត់ប្រាណនៅពេលព្រឹកគឺពិតជាល្អខ្លាំងណាស់សម្រាប់សុខភាពរាងកាយរបស់យើង ហើយប្រសិនបើអនុវត្តជារៀងរាល់ថ្ងៃនោះគឺកាន់តែល្អ។ ទោះជាយ៉ាងណា អ្នកជំនាញបានណែនាំថា លំហាត់ទាំង ៣ នេះគឺជាលំហាត់ប្រាណដ៏សក្តិសមបំផុតនៅពេលព្រឹក ព្រោះវាមិនត្រឹមជួយឱ្យមានសុខភាពរាងកាយល្អប៉ុណ្ណោះទេ វាក៏ជួយសម្រកទម្ងន់ និងពន្លូតកម្ពស់យ៉ាងមានប្រសិទ្ធភាពផងដែរ។ ដូច្នេះអត្ថបទនេះនឹងប្រាប់ពីលំហាត់ប្រាណទាំង ៣ ដែលសក្តិសមបំផុតក្នុងការហាត់ប្រាណពេលព្រឹក៖
១.Jumping Jack៖ គឺជាលំហាត់ប្រាណដ៏ល្អមួយ ជួយពង្រឹងសាច់ដុំ សម្រកជាតិខ្លាញ់ និងជំរុញការរំលាយអាហារយ៉ាងមានប្រសិទ្ធភាព មានន័យថាអ្នកនឹងបន្តដុតកាឡូរីពេញមួយថ្ងៃ ទោះបីជាអ្នកមិនហាត់ប្រាណធ្ងន់ធ្ងរក៏ដោយ។
វិធីសាស្ត្រ៖ ដំបូងត្រូវលាតសន្ធឹងដៃនិងជើង រួចលោតឱ្យខ្ពស់តាមដែលអាចធ្វើបាន។ ក្នុងពេលជាមួយគ្នានេះ ដៃជើងរបស់អ្នកត្រូវយោលតាមរាងកាយ បន្ទាប់មកធ្វើចលនាបែបនេះដដែលៗឱ្យបាន ៥ ទៅ ១០ នាទី។ 
២.រត់តិចៗដោយលើកជង្គង់ឱ្យខ្ពស់៖ ការរត់ដោយប្រើជង្គង់ខ្ពស់គឺជាការធ្វើលំហាត់ប្រាណថាមវន្តដែលបង្កើនអត្រាបេះដូងរបស់អ្នក និងហ្វឹកហាត់សាច់ដុំពោះ ដែលលំហាត់នេះជួយដុតកាឡូរី និងពង្រឹងរាងកាយរបស់អ្នកឱ្យមាំមួន។
វិធីសាស្ត្រ៖ ដំបូងអ្នកត្រូវចាប់ផ្តើមរត់នៅនឹងកន្លែង ហើយលើកជង្គង់របស់អ្នកឱ្យខ្ពស់តាមដែលអាចធ្វើទៅបាន រក្សារាងកាយរបស់អ្នកឱ្យសកម្ម និងរក្សាល្បឿនឱ្យលឿនរយៈពេល ១-២ នាទី ឬយូរជាងនេះប្រសិនបើអ្នកអាចធ្វើបាន។
៣. Planks៖ លំហាត់នេះគឺមានប្រយោជន៍ខ្លាំងណាស់សម្រាប់ការពង្រឹងរាងកាយ ជាពិសេសគឺក្បាលពោះរបស់អ្នក ដោយរក្សាក្បាលខ្ពស់ឱ្យរាបស្មើ រឹងមាំគាំទ្រឥរិយាបថល្អ និងតុល្យភាព។ លើសពីនេះទៀត plank ក៏ជួយពង្រឹងសាច់ដុំជាច្រើនដូចជា ជើង ដៃ និងខ្នង ដែលជួយក្នុងការដុតកាឡូរី។
វិធីសាស្ត្រ៖ គេងផ្កាប់ ប៉ុន្តែមិនផ្អិបជាប់នឹងកន្ទេលនោះទេ ដោយរក្សារាងកាយរបស់អ្នកនៅក្នុងបន្ទាត់ត្រង់ពីក្បាលដល់កែងជើង ត្រូវរក្សាទីតាំងនេះឱ្យបានយូរតាមដែលអាចធ្វើទៅបាន និងបង្កើនពេលវេលាបន្តិចម្តងៗ នៅពេលដែលកម្លាំងរបស់អ្នកប្រសើរឡើង៕
