រឿងអាស្រូវរបស់ ម៉ាច ដាវី បេក្ខភាព Miss Grand Cambodia 2024 តំណាងខេត្តរតនៈគីរី ហាក់ដូចជាស្ងប់ស្ងាត់ហើយបន្ទាប់ពីសាមីខ្លួនចេញមកអះអាងថារូបថតរៀបការនោះគ្រាន់តែជាការសម្តែង។ យ៉ាងណាមិញ ថ្មីៗនេះ ម៉ាច ដាវី ត្រូវរងនូវមតិរិះគន់ឡើងវិញនិងអមដោយសម្តីផ្លែផ្កាថា «ពូកែសម្តែង» បន្ទាប់ពីមានវីដេអូមួយដែលនាងបានលត់ជង្គង់សូមខមាទោសទៅកាន់អ្នកគ្រប់គ្រងកម្មវិធីគឺលោកស្រី អ៊ឹម សុគន្ធា ចំពោះរឿងអាស្រូវដែលបានកើតខណៈបេក្ខភាពរូបនេះនៅតែមានសិទ្ធិចូលរួមប្រកួតដណ្តើមមកុដតម្លៃ១លានដុល្លារ។
រសៀលថ្ងៃទី១៧ មិថុនា ផេកមួយឈ្មោះថា «Beauty Pageant Reviewer »បានបង្ហោះវីដេអូខ្លីរយៈពេល២២វិនាទីដោយដាក់ចំណងជើងថា «បញ្ហាគ្រប់យ៉ាងបញ្ចប់ទៅដោយភាពល្អប្រសើរ ដាវី នៅតែអាចបន្តជាមួយកម្មវិធី និងនៅតែអាចមានឱកាសដណ្តើមមកុដដូចដើម។ ខ្ញុំមើលឡើងស្រក់ទឹកភ្នែកតាម កុំភ្លេចវីឌីអូពេញនៅ 3Fun ឆាប់ៗខាងមុខនេះ»។ នៅក្នុងវីដេអូខ្លីនេះគេបានឃើញ ម៉ាច ដាវី លត់ជង្គង់ នៅចំពោះមុខ ND Miss Grand Cambodia ដោយសំពះសូមខមាទោសចំពោះហេតុការណ៍ដែលបានកើតឡើងដោយសារតែមានជនខិលខូចបង្កឡើង។ សកម្មភាពនេះបានធ្វើឱ្យលោកស្រី អ៊ឹម សុគន្ធា រួមជាមួយបេក្ខភាពផ្សេងទៀតក៏រំជួលចិត្តរលីញរលោងទឹកភ្នែកដូចគ្នា។
ទោះយ៉ាងណា វីដេអូខ្លីនេះក៏ជំរុញឱ្យអ្នកលេងបណ្តាញសង្គមជាច្រើនបញ្ចេញមតិរិះគន់ទៅកាន់បេក្ខភាព ម៉ាច ដាវី ថាពូកែសម្តែង។ ពួកគេបានបញ្ចេញមតិថា «ស៊ូៗidolពូកែបកស្រាយ ពូកែសម្ដែង នេះហើយដែលMGIត្រូវការ ,ស៊ូបងវី មកុដរង់ចាំ មានតែបងមួយទេស័ក្តិសមពាក់មកុដព្រោះបងមានសមត្ថភាពសម្ដែងសម១០០% នេះហើយដែរ MGI ត្រូវការ winner crown ព្រោះបងមានសមត្ថភាពសែនអស្ចារ្យ, សម្តែងសមម្ល៉េះអា ដាវី គេស្តាយលុយចំណងដៃណាស់អ្នកដែលបានទៅស៊ីការយើង»។
មតិផ្សេងទៀតបានលើកឡើងថា «Miss Grand ពោរពេញដោយការសម្តែង ចឹងបានម៉ានចុងឆ្នាំក្រោយនេះបាត់អ្នកគាំទ្រចាស់ៗអស់, Miss grand ឆ្នាំនឹងសុំតែរើសឱ្យល្អ កុំឱ្យមានរឿងរញេរញ៉ៃ Drama ប្រការមុនព្យាបាល ប្រជាជនខ្មែរមើលសមត្ថភាព និងភាពពិនប្រសប់របស់អ្នកតំណាង មែនចេះតែគាំទ្រទេ Cambodia ព្រោះមានមេរៀនហើយ»។ អ្នកផ្សេងថា «គេសម្តែងមែន សម្ដែងសម 10/10»។
គួរបញ្ជាក់ថា កន្លងមកនេះបន្ទាប់ពីរឿងអាស្រូវមានគេទម្លាយរូបថតរៀបការនិងតួលេខ ម៉ាច ដាវី បានចេញមកបញ្ជាក់ថារូបថតរៀបការនោះគ្រាន់តែជាការសម្តែងដែលមានហេតុផលនៅពីក្រោយទាក់ទងនឹងការងារផ្ទាល់ខ្លួន ខណៈតួលេខអាយុកាលពីប្រកួតបវរកញ្ញាឆ្នាំ២០២០មិត្តភក្តិរបស់នាងជាដាក់ឱ្យនោះទេនាងមិនបានចាប់អារម្មណ៍ឡើយ៕
