តារាសម្តែងហុងកុងដ៏ល្បីល្បាញលោក Louis Koo ត្រូវបានប្តឹងដោយអ្នកជំនួញ Alex Dong ជុំវិញការចោទប្រកាន់ថាមិនសងប្រាក់កម្ចីចំនួន ៨.៣ លានដុល្លារហុងកុង ប្រមាណ១.១លានដុល្លារអាម៉េរិក។យោងតាមកាសែត South China Morning Post បានឱ្យដឹងថា ពាក្យបណ្តឹងនេះទាក់ទងនឹងការវិនិយោគដែលក្រុមហ៊ុនទាំងពីរបានធ្វើនៅក្នុងឆ្នាំ២០១៣ក្នុងការបណ្តាក់ទុនម៉ូតមួយ។
ឯកសាររបស់តុលាការដែលបានចេញផ្សាយកាលពីថ្ងៃពុធ ទី១២ មិថុនា បានបង្ហាញថា ដំបូងអ្នកទាំងពីរបានវិនិយោគ ២៤.៩ លានដុល្លារហុងកុងរួមគ្នាដើម្បីទិញភាគហ៊ុន ៤៩% នៅក្នុង Eyeteam Limited ដែលជាអ្នកចែកចាយផលិតផលពីម៉ាកល្បីៗមួយចំនួន ។ ការវិនិយោគនេះត្រូវបានបញ្ជូនតាមរយៈ Product Power ដែលជាក្រុមហ៊ុនគ្រប់គ្រងទាំងស្រុងដោយតារាសម្តែង Louis Koo ។
ឯកសារបញ្ជាក់បន្ថែមថា នៅពេលនោះតារាសម្តែងរូបនេះមិនមានថវិកាគ្រប់គ្រាន់ទេ ដូច្នេះហើយបានស្នើសុំឱ្យ Alex Dong ផ្តល់ប្រាក់កម្ចីគ្មានការប្រាក់ដល់លោកចំនួន ៨.៣លានដុល្លារហុងកុង ដែលត្រូវសងវិញក្នុងរយៈពេល ៥ ឆ្នាំ ហើយមកដល់ពេលនេះ ប្រាក់កម្ចីនេះមិនត្រូវបានសងវិញទេ។
ភាពជាដៃគូនេះបានបន្តរហូតដល់ឆ្នាំ ២០១៤ នៅពេលដែលពួកគេបានសម្រេចចិត្តវិនិយោគនៅក្នុងក្រុមហ៊ុនមួយដែលដំណើរការភោជនីយដ្ឋាន Ming Kitchen នៅ Causeway Bay ។ ពួកគេគ្រោងនឹងទិញភាគហ៊ុន ៧០% តាមរយៈក្រុមហ៊ុន Cool Label របស់តារាសម្តែងរូបនេះ ។
ដូចនេះ ក្រុមអ្នកច្បាប់របស់អ្នកជំនួញរូបនេះមិនត្រឹមតែស្វែងរកការសងវិញនូវទឹកប្រាក់ចំនួនជាង១លានដុល្លារអាម៉េរិកប៉ុណ្ណោះទេ ថែមទាំងទាមទារឱ្យតារាប្រុសវ័យ៥៤ឆ្នាំរូបនេះសងបំណុលក្នុងទម្រង់នៃការផ្ទេរភាគហ៊ុនដូចដែលលោកបានសន្យាជាមួយអ្នកជំនួញ Alex Dong។
Louis Koo បានសកម្មក្នុងការកម្សាន្តអស់រយៈពេល៣០ ឆ្នាំមកហើយ ដែលលោកសាងភាពល្បីល្បាញសម្រាប់ខ្សែភាពយន្ត TVB ជាច្រើន៕
