YoonA សមាជិក Girls’ Generation ត្រូវបានគេរាយការណ៍ថាបានប្រឈមមុខនឹងការរើសអើងជាតិសាសន៍ដោយ សន្តិសុខនៅឯមហោស្រពភាពយន្តកានលើកទី៧៧។ នេះបើយោងតាមរបាយការណ៍ពី Times of India និងប្រព័ន្ធផ្សព្វផ្សាយអន្តរជាតិផ្សេងទៀត។ ក្នុងនាមជាទូតសុឆន្ឆៈកូរ៉េតែម្នាក់គត់សម្រាប់ម៉ាកគ្រឿងអលង្ការ Qeelin Yoona ត្រូវបានគេអញ្ជើញជាផ្លូវការឱ្យចូលរួមក្នុងមហោស្រពនៅថ្ងៃទី ២១ ខែឧសភា។
ក្នុងរ៉ូបពណ៌ផ្កាឈូក Yoona បានបញ្ចេញសម្រស់ដ៏ស្រស់ស្អាតរបស់នាងនៅក្នុងព្រឹត្តិការណ៍នេះ។ ទោះបីជាយ៉ាងណាក៏ដោយ មានឧបទ្ទវហេតុមួយបានកើតឡើង ខណៈដែលនាងកំពុងឡើងជណ្តើរហើយអ្នកសារព័ត៌មានព្យាយាមបង្កកឱ្យនាងឈប់សិន។ វីដេអូនៃឧបទ្ទវហេតុនេះបង្ហាញពីសន្តិសុខស្រីម្នាក់បានរារាំងរាងកាយរបស់ Yoona ពីការថតរូប ដែលធ្វើឱ្យនាងបង្ហាញអារម្មណ៍មិនស្រួលនៅលើផ្ទៃមុខ។ ទោះជាព្យាយាមរក្សាភាពស្ងប់ស្ងាត់ និងគ្រវីដៃនៅកាមេរ៉ាយ៉ាងស្ងប់ស្ងាត់ក៏ដោយ ក៏សន្តិសុខនោះមិនអនុញ្ញាតឱ្យនាងបន្តការថត និង ឱ្យនាងចូលក្នុងឆាប់ៗ។
របាយការណ៍បានសរសេរថាសន្តិសុខនេះអាចកំណត់គោលដៅជាពិសេសទៅលើស្ត្រីដែលមានពណ៌សម្បុរ ដោយសារការរឹតបន្តឹងស្រដៀងគ្នានេះមិនត្រូវបានអនុវត្តចំពោះស្ត្រីស្បែកសនៅកន្លែងតែមួយនោះទេ។ គួរកត់សម្គាល់ថា តារាចម្រៀងអាមេរិកអាហ្រ្វិក Kelly Rowland និងតារាសម្ដែងម្នាក់ទៀតក៏ធ្លាប់ទទួលរងការរើសអើងស្រដៀងគ្នានេះដែរ។
សកម្មភាពរើសអើងនេះអ្នកគាំទ្រជាច្រើនបានបង្ហាញការខឹងសម្បារយ៉ាងខ្លាំង។ អ្នកនិយមលេងអ៊ីនធឺណិតបានអំពាវនាវឱ្យបញ្ឈប់ជាបន្ទាន់នូវសន្តិសុខដែលពាក់ព័ន្ធ ដោយថ្កោលទោសទង្វើនេះថាជាការរើសអើងជាតិសាសន៍ច្បាស់ណាស់៕
