យោងតាមប្រភពសារព័ត៌មាន AFP គឺបានរាយការណ៍កាលពីថ្ងៃទី២១ ខែឧសភា ឆ្នាំ២០២៤នេះបានឲ្យដឹងថា អាជ្ញាធរឥណ្ឌាបានបញ្ជាឱ្យបិទសាលារៀនមុនថ្ងៃឈប់សម្រាករដូវក្តៅ បន្ទាប់ពីសីតុណ្ហភាពនៅក្នុងប្រទេសនេះបានឡើងខ្ពស់ខ្លាំងរហូតដល់៤៧,៤អង្សាសេ ជាពិសេសគឺទីក្រុងដេលីដែលបានទទួលរងនូវឥទ្ធិពល«រលកកម្តៅយ៉ាងធ្ងន់ធ្ងរ»។
ការិយាល័យអាកាសធាតុរបស់ប្រទេសឥណ្ឌាបានព្រមានអំពី “លក្ខខណ្ឌរលកកំដៅធ្ងន់ធ្ងរ” នៅក្នុងសប្តាហ៍នេះ ដោយការស្ទង់សីតុណ្ហភាពកម្តៅបានឡើងដល់កម្រិតខ្ពស់បំផុតមិនធ្លាប់មាន គឺ ៤៧.៤ អង្សាសេ នៅតំបន់ជាយក្រុង Najafgarh នៃទីក្រុង Delhi ប្រទេសឥណ្ឌា។
ជាមួយគ្នានោះ អាជ្ញាធរនៅក្នុងរដ្ឋមួយចំនួនរបស់ប្រទេសឥណ្ឌា បានប្រកាសឲ្យបិទសាលាជាបន្តបន្ទាប់ ដើម្បីការពារប្រជាពលរដ្ឋរបស់ពួកគេពីផលប៉ះពាល់ដោយសារតែរលកកម្តៅដ៏ខ្លាក្លាលើកនេះ ដែលរដ្ឋទាំងនោះគឺរួមមាន ទីក្រុងដេលី, Haryana, Madhya Pradesh, Punjab និង Rajasthan ជាដើម។
នេះមិនមែនជាការចម្លែកទេសម្រាប់ប្រទេសឥណ្ឌា ដែលសីតុណ្ហភាពកម្តៅក្នុងរដូវក្តៅតែងមានការកើនឡើងខ្ពស់ជាងប្រទេសដទៃទៀត។ ទោះជាយ៉ាងណា ការស្រាវជ្រាវវិទ្យាសាស្ត្រជាច្រើនឆ្នាំបានរកឃើញថា ការប្រែប្រួលអាកាសធាតុកំពុងបណ្តាលឱ្យរលកកំដៅមានរយៈពេលកាន់តែយូរ ញឹកញាប់ និងកាន់តែខ្លាំងបន្ថែមទៀតសម្រាប់ប្រទេសនានាជាសកល។
ជាមួយគ្នានេះ នាយកដ្ឋានឧតុនិយមឥណ្ឌាបានព្រមានពីផលប៉ះពាល់នៃកំដៅលើសុខភាព ជាពិសេសចំពោះទារក ចាស់ជរា និងអ្នកដែលមានជំងឺរ៉ាំរ៉ៃ ក៏ដូចជាបានដាក់ចេញនូវវិធានការទប់ស្កាត់ផ្សេងៗ ដូចជាហាមមិនឲ្យស្ថិតនៅក្រោមកម្តៅថ្ងៃរយៈពេលយូរម៉ោងពេក ផឹកទឹកឲ្យបានគ្រប់គ្រាន់ និងតាមដានសុខភាពជាប្រចាំជាដើម។ ខណៈដែលជំងឺដាច់សរសៃឈាមខួរក្បាលបាននឹងកំពុងរាយលុកខ្លាំងនៅក្នុងរដូវក្តៅ និងបានបណ្តាលឲ្យមនុស្សនៅទូទាំងពិភពលោកបាត់បង់ជីវិតជាបន្តបន្ទាប់ផងដែរ៕
