តារាចម្រៀង គង់ ច័ន្ទរដ្ឋា បានទម្លាក់បទថ្មីរបស់ខ្លួនមានចំណងជើងថា «បៀ.មស្ករកៅស៊ូ»កាលពីពេលថ្មីៗនេះ ប៉ុន្តែបានធ្វើឱ្យមតិវែកញែកនៅលើបណ្តាញសង្គមក្នុងនោះលោកអាចារ្យធំ ក៏បានបញ្ចេញមតិដោយសង្ឃឹមថាមួយបទនេះមិនមែនជាបទអប់រំពីការរួ.មភេ.ទទៅចុះ និងទុកឱ្យសែប្រធានសមាគមស្តាប់ដែរទៅ។
នៅថ្ងៃទី៩ មីនា តារាចម្រៀង គង់ ច័ន្ទរដ្ឋា បានទម្លាក់បទថ្មីមានចំណងជើងថា «បៀ.មស្ករកៅស៊ូ» ដោយបញ្ជាក់ថាជាបទ Original Song និពន្ធដោយ លាង ស៊ាងលីន មានទាំង Version បុរសផងដែរ។ ទោះយ៉ាងណាមួយបទនេះពីអ្នកនាង គង់ ច័ន្ទរដ្ឋា ត្រូវបានអ្នកលេងបណ្តាញសង្គមបញ្ចេញមតិរិះគន់។ ប៉ារ៉ូលក្នុងបទចម្រៀងខាងលើនេះដែលធ្វើឱ្យឡើងកម្តៅខ្លាំងនោះគឺ «បៀមធ្វើឱ្យបងនឹក.. បងធ្វើមុខឡើងភ្លឹក..ក្តក់យកជាតិទឹក…»។
ទន្ទឹមមហាជនអ្នកលេងបណ្តាញសង្គមបញ្ចេញមតិរិះគន់ទៅលើបទចម្រៀង គង់ ច័ន្ទរដ្ឋា ថាដូចជានិយាយពីផ្លូវភេទនេះ ខាងលោកអាចារ្យធំ ក៏បានលូកមាត់ដែរថា «ខ្ញុំសង្ឃឹមថា មិនមែនជាបទអប់រំពីការរួមភេទចុះ។ ទុកឱ្យ សែប្រធានសមាគមស្តាប់ដែរទៅ អរគុណ!»។
តារាចម្រៀង គង់ ច័ន្ទរដ្ឋា មានបទផ្ទាល់ខ្លួនផ្សេងដូចជា «មូសខាំ» «មុខសញ្ញា»និងបទ«អរគុណអ្នកចាស់ » ជាដើម។ តារាចម្រៀងរូបនេះបានលេចមុខតាមរយៈកម្មវិធីប្រគំតន្ត្រីនានាផងដែរ។
គួរកត់សម្គាល់ថា រយៈពេលចុងក្រោយនេះតារាចម្រៀងមួយចំនួនត្រូវបានមហាជនរិះគន់ទៅលើបទចម្រៀងដែលមហាជនគិតថានិពន្ធឡើងពីភាពមិនសមរម្យដូចជាបទរបស់លោក ឆន សុវណ្ណារាជ មានចំណងជើងថា «ពូក៏ដូចប៉ា» បទរបស់ ញឹមសួន សោភាទេពី មានចំណងជើងថា «ចាប់ក» ជាដើម។ ទោះបីជាបទខ្លះរងនូវមតិមិនល្អពីសាធារណជនក្តីប៉ុន្តែតារាចម្រៀងមួយចំនួននៅច្រៀង និងអ្នកនិពន្ធខ្លះនៅបន្តផលិតបទប្រភេទដែលចេញទៅដឹងថាប្រឈមមុខនឹងការរិះគន់ពីមហាជន៕
