ភាពតានតឹងរវាងវ៉ាស៊ីនតោន និងទីក្រុងឡាអេ បានឈានដល់កម្រិតក្តៅគគុកនិងប្រកាសអាសន្នបំផុត បន្ទាប់ពីរដ្ឋបាលរបស់លោកប្រធានាធិបតី ដូណាល់ ត្រាំ បានប្រកាសបើកយុទ្ធនាការទ្រង់ទ្រាយធំមួយក្នុងបំណងរុះរើ និងកម្ទេចឥទ្ធិពលរបស់តុលាការឧក្រិដ្ឋកម្មអន្តរជាតិ (ICC)។ វិធានការការទូតដ៏រញ៉េរញ៉ៃនេះ បានធ្វើឱ្យសហគមន៍អន្តរជាតិមានការភ្ញាក់ផ្អើលយ៉ាងខ្លាំង ចំពោះជំហររឹងត្អឹងរបស់សហរដ្ឋអាម៉េរិក ប្រឆាំងនឹងប្រព័ន្ធយុត្តិធម៌សកល។
យោងតាមការចុះផ្សាយវិភាគរបស់សារព័ត៌មានអន្តរជាតិល្បីឈ្មោះ The Guardian កាលពីថ្ងៃទី១៦ ខែកក្កដា ឆ្នាំ២០២៦ កន្លងទៅថ្មីៗនេះ រដ្ឋបាលលោក ដូណាល់ ត្រាំ ដឹកនាំដោយរដ្ឋមន្ត្រីការបរទេស លោក ម៉ាកូ រូប៊ីយ៉ូ បានប្រកាសជាផ្លូវការនូវយុទ្ធនាការវាយប្រហារជាប្រព័ន្ធទៅលើតុលាការ ICC ដែលមានមូលដ្ឋាននៅទីក្រុងឡាអេ ប្រទេសហូឡង់។ ភាគីទីក្រុងវ៉ាស៊ីនតោនបានលើកឡើងនូវហេតុផលការពារខ្លួនថា តុលាការអន្តរជាតិមួយនេះកំពុងរំលោភលើអធិបតេយ្យភាពរបស់សហរដ្ឋអាម៉េរិកយ៉ាងធ្ងន់ធ្ងរ តាមរយៈការព្យាយាមទាមទារសិទ្ធិស្រាវជ្រាវ និងកាត់ទោសទៅលើកងទ័ពអាម៉េរិក មន្ត្រីអនុវត្តច្បាប់ការពារព្រំដែន ក៏ដូចជាមេដឹកនាំនយោបាយកំពូលៗរបស់អាម៉េរិក ទាំងដែលវ៉ាស៊ីនតោនមិនមែនជាសមាជិក។.jpg)
ទោះជាយ៉ាងណា ជំហរដោះសាររឿងអធិបតេយ្យភាពជាតិរបស់សហរដ្ឋអាម៉េរិក ត្រូវបានរងការរិះគន់ និងលាតត្រដាងការពិតពីសំណាក់ក្រុមអ្នកជំនាញច្បាប់ និងអង្គការសិទ្ធិមនុស្សអន្តរជាតិជាហូរហែរ។ យោងតាមរបាយការណ៍ដដែលបានបញ្ជាក់ថា គោលដៅពិតប្រាកដរបស់ទីក្រុងវ៉ាស៊ីនតោន គឺគ្រាន់តែជាការសម្តែងលាក់បាំង ដើម្បីបង្កើតរបាំងការពារ និងស្វែងរក «និទណ្ឌភាព» ឬការរួចផុតពីទោសទណ្ឌសម្រាប់មន្ត្រី និងមេដឹកនាំរបស់ខ្លួន ពីការប្រឈមមុខនឹងការទទួលខុសត្រូវក្រោមច្បាប់អន្តរជាតិ ពាក់ព័ន្ធនឹងការចោទប្រកាន់ពីបទឧក្រិដ្ឋកម្មសង្គ្រាមនៅក្នុងសមរភូមិនានាជុំវិញពិភពលោក។ លើសពីនេះ អាម៉េរិកក៏មានបំណងរារាំងមិនឱ្យ ICC ដាក់ទណ្ឌកម្មលើមេដឹកនាំនៃប្រទេសសម្ព័ន្ធមិត្តជិតស្និទ្ធរបស់ខ្លួនផងដែរ។.jpg)
ការប្រកាសសង្គ្រាមការទូតប្រឆាំងនឹងតុលាការឡាអេពីសំណាក់លោក ដូណាល់ ត្រាំ នាពេលនេះ បានជម្រុញឱ្យសហភាពអឺរ៉ុប និងអង្គការសហប្រជាជាតិ ងើបឈរឡើងប្រកាសគាំទ្រ ICC វិញយ៉ាងរឹងមាំ និងបានសង្កត់ធ្ងន់ថា គ្មានប្រទេសណាមួយអាចស្ថិតនៅពីលើច្បាប់សកលបានឡើយ។ មហាជនទូទាំងពិភពលោកកំពុងតាមដានមើលយ៉ាងយកចិត្តទុកដាក់ថា តើប្រព័ន្ធយុត្តិធម៌អន្តរជាតិអាចទប់ទល់នឹងសម្ពាធដ៏ធ្ងន់ធ្ងរពីសំណាក់មហាអំណាចអាម៉េរិកបានកម្រិតណា៕
