«ខែរ៉ម៉ាឌន» ដែលមានន័យថាជា «ខែបួសរបស់សាសនិកឥស្លាម» គឺជាកាតព្វកិច្ចរបស់សាសនិកឥស្លាមនៅទូទាំងពិភពលោក ព្រោះការបួសនេះជាកាតព្វកិច្ចទី៤ នៅក្នុងមូលដ្ឋានគ្រឹះទាំង៥ របស់សាសនាឥស្លាម។ ពិធីនេះនឹងប្រារព្ធឡើងរយៈពេលមួយខែពេញ ដែលតម្រូវឲ្យជនមូស្លីមតមអាហារនិងទឹកនៅពេលថ្ងៃ ក៏ដូចជាហាមរួមភេទក្នុងអំឡុងពេលនោះជាដាច់ខាត។
យោងតាមការបង្ហោះរបស់ គណៈដឹកនាំជាន់ខ្ពស់នៃសាសនាឥស្លាមកម្ពុជា កាលពីពេលថ្មីៗនេះបានបញ្ជាក់ថា «ចាងហ្វាងនៃគណៈដឹកនាំជាន់ខ្ពស់នៃសាសនាឥស្លាមកម្ពុជា សូមជម្រាបជូនដំណឹងដល់បងប្អូនសាសនិកឥស្លាមបានជ្រាបថា ការចូលបួសរ៉ម៉ាឌនគឺចាប់ផ្ដើមនៅថ្ងៃអង្គារ ទី១២ មីនា ២០២៤ ត្រូវនឹងថ្ងៃទី១ ខែរ៉ម៉ាឌន ឆ្នាំ១៤៤៥ មូហាំម៉ាត់សករាជ នេះតទៅ»។
សាសនិកឥស្លាមនឹងចាប់ផ្ដើមអនុវត្តកាតព្វកិច្ចតមអាហារពេលថ្ងៃសូម្បីតែទឹក ចាប់ពីថ្ងៃរះរហូតដល់ថ្ងៃលិច និងហាមរួមភេទ ក្នុងរយៈពេល១ខែ ដោយមិនគិតអំពីអ្នកមាន អ្នកក្រ ឬអ្នកមានអំណាចបុណ្យស័ក្ដិនោះទេ។ ជាមួយគ្នានេះ សាសនិកឥស្លាមក៏ត្រូវបំពេញនៅភារកិច្ចជាច្រើនទៀតដូចជាការសូត្រធម៌ ការបរិច្ចាគទានដល់ជនក្រីក្រ និងការផ្តល់ចំណីអាហារឱ្យអ្នកបួសជាដើម។
តាមជំនឿរបស់សាសនិកឥស្លាម បានជឿជាក់យ៉ាងមុតមាំថា «ខែរ៉ម៉ាឌន»គឺខែដ៏ពិសិដ្ឋ សម្រាប់ការអនុវត្តតាមការចង្អុលបង្ហាញតាមក្បួនច្បាប់ ដែលមានចែងនៅក្នុងគម្ពីរអាល់គួរអាន (AlQuran) ឬជាការធ្វើទង្វើល្អនៅក្នុងខែនេះ។ រីឯគោលបំណងវិញនៃ«ការបួសខែរ៉ម៉ាឌន»វិញគឺ ដើម្បីទទួលបាននូវការតបស្នងផលបុណ្យដ៏ធំធេងពី អល់ឡោះជាម្ចាស់ និងបង្ហាញភាពស្មោះស្ម័គ្ររបស់ខ្លួន ក៏ដូចជាបានយល់ដឹងពីរសជាតិនៃការអត់ឃ្លាន និងការផ្សារភ្ជាប់សុខទុក្ខគ្នារវាងអ្នកមាននិងអ្នកក្រផងដែរ។
ដ្បិតថាខែនេះ អ្នកកាន់សាសនាឥស្លាម ត្រូវតមចំណីអាហារនៅពេលថ្ងៃក៏ពិតមែនប៉ុន្តែ អាល់ឡោះ ក៏បានដាក់លក្ខខណ្ឌមួយចំនួនចំពោះអ្នកដែលបួសគឺត្រូវតែជាសាសនិកឥស្លាម ប្រុសស្រី ពេញវ័យគ្រប់ការ មានកម្លាំងពេញអាចចាប់ពីអាយុ១៥ឆ្នាំឡើងទៅ និងមានសតិបញ្ញាគ្រប់គ្រាន់ ពុំមែនជាមនុស្សវិកលចរិត មានមនសិការសម្បជញ្ញៈក្នុងការអនុវត្តកាតព្វកិច្ចកាន់អំណត់បួស។ ក្នុងករណីសម្រាប់អ្នកមានជំងឺ អ្នកធ្វើដំណើរតាមផ្លូវឆ្ងាយ នារីពពោះ ឬមានរដូវ នារីបំបៅកូនជាដើម អាចមានសិទ្ធិមិនបួសបាន តាមហេតុការណ៍កើតឡើងជាក់ស្ដែង តែត្រូវសងវិញនៅខែបន្ទាប់ ឬនៅពេលមានលទ្ធភាព។ រីឯអ្នកចាស់ជរាមិនអាចបួសបានតែម្ដងត្រូវ ផ្ដល់អំណោយទាន ដល់អ្នកក្រីក្រ ក្នុងមួយថ្ងៃ អង្ករកន្លះគីឡូ នារយៈពេលមួយខែពេញ នៃខែរ៉ម៉ាឌន៕
